Midang dang sual ngeihthiam cu mah sual ngeihthiam hmuh nak a si
Nihin kan relmi cathiang chungah (Mt 18:23-35) chungah ngeihthiamnak a ngei lo mi salpa bianabia kha kan Bawipa Jesuh Khrih nih a kan chimh. Hi nihin lent caan chungah hin kan nih kan rel mi vialte hi a bik in hi lent caan chungah hin kan nih vialte nih Bawipa Pathian sin in ngeihthiam nak kan i ruahchan bantuk in kan mah vialte zong nih ngeihthiam nak kha ngeih awk ah, mi kha va ngeihthiam awk ah, kan cungah a ṭha lomi, kan cungah a lung a panh lomi, kan thang a kan chiat mi vialte hna cungah ngeihthiamnak ngeih awk ah Bawipa Jesuh Khrih nih nihin caan ah cawnpiak a kan duh mi asi.
Voi khat Thlantlang ka um lio ah mipa pakhat cu a hawi le pahinh nih khan an hruai i zei a ti ti ahcun “Na kan ngaithiam lai maw ngaithiam hlah? Na kan ngeihthiam lo ah cun a poi loh. Kan i ṭhua ko lai. Sinain na kan ngeihthiam le kan i lawm chinchin ko” tiah thlirh hroh pah phun khan ngeihthiamnak kha hramhram in an hal. Cu tikah ngeihthiam nak an hal mi pa nih khan pahinh an si caah khan a ṭih zong a ṭih pah hna lai. Sihmanhsehlaw ‘kan ngeihthiam tuk hna taa’ ti zong kha a ti ve lo. Sihmanhsehlaw kaa khat hmanh chim lo in a zoh zong zoh hna loin kha tikhan an kal. Chim duh mi cu minung nih hin a caan caan cu kan mah nih cun mi sualnak kha va ngeihthiam kha kan duh lo. လုံး၀ ka ngaithiam kho lai lo ti bak in khan kan i chang tawn. Sihmanhsehlaw kanmah kan sual nak tucu na ka ngaithiam lai maw ngaithiam lo tiin khan hramhram in ngeihthiamnak kha hal kan hmang tawn.
Dawtmi ul e nau hna, nihin ah kan Bawipa Jesuh Khrih nih ‘ngeihthiam nak a ngei lo mi sal pa kong’ kha a kan chimh tikah kannih caah ruah awk tam pi a um. Hi zawnah kan Bawipa Jesuh nih “Pa Pathian nih nan sualnak vialte an ngeihthiam hna bantukin nan hawi le cung zongah ngeihthiam nak ngei uh” ti zong kha an kan cawn piak fawn. Cun hika ah kan Bawipa Jesuh Khrih nih a duh bik mi cu “sal pa pahinh pathum a ngei mi bawi pakhat nih lei ba cham awk kha a ngeih. Pakhat pa kha na lei ba na cham lai maw cham lo. Na cham lo a si ahcun nangmah zong zuar nasi lai na nupi le nafa zong kha zuar na lai i pek hrimhrim na si lai tiah a ti hnu ah an auh ter mi sal pa nih khan “a zei a si zongah ka ngeihthiam ko sawh. ka ngang ko sawh. Chamnak ding hrimhrim in kei zuam lai” tiah khan nawl pat nak fak pi a tuah tik an bawi pa nih khan a ngeih thiam. A ngeihthiam tikah “aw na ngeih tikah ka pe ko ti zong kha si lo in a piatbak in cham a hau ti lai lo’ ti tiang in khan a ngeihthiam. လုံး၀ cham hau ti lo ding khan a ngeih thiam. Sihmanhsehlaw hi sal pa nih a bawi pa sin in ngeihthiam nak a tong mi sal pa nih a hawi salpa phaisa a tlawm deuh a ba mi pa sinah kal hruak in ‘na lei ba na kan cham lai maw cham lo, na ka cham lo asi si ahcun’ tiah a ti i sal dang nih khan “ka ngang rih ko sawh ka dua, kan pek hrim hrim ko lai” tiah a nawl pat ko nain a hawipa nawl nak kha duhlo in cu sal pa cu thong a thlak e timi kha a hawi dang nih an theih. Cu tikah an lung a ṭha lo i an bawi pa kha an va chimh. An bawi pa nih a theih tikah ‘kei nih kan ngeihthiam ko nain na hawi dang cungah ngeihthiam nak လုံး၀ a ngei khawh lo caah, a rak ngeihthiam ciami sal pa kha thong a thlak ṭhan, dan a pek ṭhan timi kha kan theih. Hi ka ah kan nih vialte nih Bawipa Pathian sin in ngeihthiam nak a hmu mi lawngte kan si. “Ka chuah ka tein kei cu mi sual ka si” tiah (Sam 51) chungah a chim bantuk in, misual kan rak si mi kha kan hngalh ding a si. Kan sual nak vialte cu Bawipa Pathian nih a kan ngeihthiam timi kha kan ruah, kan theih, kan ခံစား ding a si.
Kan ka in maw Bawipa Pathian kan sualnak zeitluk a ngan ko nain na kan ngeihthiam tiah khan kan thangṭhat ko nain, nifa te kan nunnak ah kan hawi le hna cungah ngeihthiamnak kan ngeih ve ding kha a herh mi a si. Cucaah lent caan chungah hin kan sualnak vialte caah ngeihthiam nak kha kan hal bantuk in kan nih vialte nih hi a ra lai mi lent caan a dih tiang Bawipa Pathian dawtnak, Bawipa Pathian ngeihthiamnak kha a hngal mi, a ခံစား mi kan si ah cun Bawipa Pathian nih a kan ngeihthiam bantuk khan kan nih zong nih kan hawi nu/pa cung ah ngeihthiam nak kha ngei ve u sih. Ngeihthiam nak kha ngei u sih law hmai lei zongah kan sual kan palh nak vialte kha Bawipa Pathian nih a let tampi in a kan ngeihthiam ve lai timi kha သင်ခန်းစာ i lak hna u sih.
Profet Danial cu harnak chungah a um lio ah Bawipa Pathian sinin ngeihthiam nak kha a rak hal i Bawipa Pathian i dantak nak in le vawlei huatnak in khan an luat i thong chung in khan an luat. Meiphu chung in a rak luat ṭhan bantuk in nangle kei zong kan sual kan palh nak vialte in ngeihthiam nak kha ngei ve lai. Bawipa Pathian sin in ngeihthiam nak kan hal ah cun a ra lai mi Pathian dantat nak in luat nak kan hmu ve lai. Bawipa Pathian nih pakhat cio kan cungah khan thlachuah kan pe hram ko seh. Amen.