Pope Leo: Iran ah hriamnam puah thawng dai cang hram ko seh
Zarhpi ni St Peter’s Square ah Angelus thlacam nak i aa pummi hna sinah thlacam a donghnak ah Pope Leo nih Middle East lei kong he pehtlai in bia a chim i “lungdonghnak a chuahtertu thawngpang a um leng mang” tiah a ti.
St Peter’s Square ah aa pummi 15,000 hrawng hna sinah bia a chim lio ah, Pope nih a bik in Iran le a pengtlang ah “thahnawnnak le rawhralnak” le “huatnak le tihphannak a karhnak” kong a chim.
Cun, cu buainak nih a pawngkam ram hna a simi, “Lebanon” tibantuk ram hna zong “buaibainak ah a phanhter ṭhan sual hna lai” tiah a thinphannak zong Pope nih a langhter.
Pope Leo nih a bia a ngaimi hna kha “bom puah thawng a daih nakhnga, hriamnam hna chiah in mipi hna aw theih khawhnak caah biaruahnak hmun a um khawh nakhnga” thlacam ding zong in mipi hna sin zongah sawmnak a tuah.
“Raltuk nak ruangah harnak a tongmi hna caah thlacamnak tuah” ding le “remnak le ruahchannak lam kawlnak lei ah hruaitu hna lungthin a hruai hna nak hnga” caah tiin Daihnak Siangpahrangnu Mary sinah ka thlcamnak ka chanh tiah a bia donghnak ah a ti.
Hrocernak in daihnak ser khawh a si lo
“Daihnak timi cu pakhat le pakhat i hrocernak in ser khawh a si lo. Cun rawhralnak, fahnak le thihnak a chuahtertu hriamnam hna zongin ser khawh a si lo. Ṭuanvo ngei tu hna nih a hmaanmi khuaruah thiamnak ngeihnak le biaruah ṭinak lawngin ser khawh a si lai,” tiah a ti.
Pope nih buainak a karh ahcun ngaihchiatnak nganpi lawng a chuah lai tiah ralrinnak bia zong a chim.
Pope Leo nih ‘daihnak lam kawl khawhnak ding caah ram hruaitu hna nih biaruah ṭi nak ngei kho ko hna seh’ tiin thlacamnak zong a tuah.