ZUMHNAK RO A SULLAM PHUANNAK

Lamkaltu hna nih zumhnak rothiang kha Bible Thiang le Phungbia chung i a umning tein Bupi cungah an ap tak dih. (ITim. 6:20, IITim. 1:14). Hi zumhnak rothiang ah a tangmi miphun thiang dihlak hna cu an pastors hna he hmunkhat tein an um i, cawnpiaknak, unau sinak, changreu cheunak le thlacamnak hna kha an i tlaih zungzal. Cucaah chanhchin mi zumhnak ah i hmunhnak, zumhnak le zulhnak cu Bishop hna zumtu hna rualrem ngai in umter kho tu a si (Lam 2:42).

Bupi Cawnpiaknak Nawl

Pathian bia kha Bible ca chungah ṭialmi a si zongah, Pupa cawnpiaknak chungah a ummi a si zongah hmaan tein a sullam phuannak rian cu a nungmi cawnpiaktu Bupi cung lawnglawng ah pek a si. Mah “Nawlngeihnak” cu Jesuh Khrih min lawnglawng in hman a si. (2Peter 1:20). A sullam cu, Bible a sullam phuannak cu Rome khua Bishop, Peter changtu hna he kawmh in a ummi Bishop hna sinah pek a si, ti kha a si.

Sihmanhsehlaw mah cawnpiaknak nawl hi Pathian bia nakin a sang deuh tinak a si lo. Pathian bia a sal, a rianṭuantu lawnglawng a si. Cawnpiaknak nawl a hmumi hna nih an cawnpiakmi cu “Cawnpiak uh” timi bia cawnpiak lawng kha a si. Bawi Jesuh fialnak le Thiang Thlarau hruainak in nawlngeihnak nih upatnak in a bia a ngaih. Pumpek in a zohkhenh i fel tein a sullam phuan kha aa zuam. Zumh awk bia a timi vialte hi mah zumhnak bia chung cun a lakmi a si.

Khrih nih, “Na bia a ngaimi nih ka bia kha an ngai” tiah Lamkaltu hna sinah a chimmi bia kha i cinken in Khrihfa mi hna nih an tuukhal hna cawnpiaknak le an lamhruainak kha tawidornak in an pawm ve. (Lk 10:16).

Zumhnak Bia Hna

Cawnpiaknak nawl a ngeimi Bupi nih Khrih sinin a hmuhmi nawlngeihnak kha zumhnak bia fianternak le khiahnak ah tling tein a hman. Bupi nih a cawnpiakmi kha Khrihfa mi nih cohlan awk ṭavuan an ngei dih.

Thlarau nunnak le cawnpiaknak karlak ah pehtlaihnak a um. Cawnpiak mi biatak hna cu zumhnak lam caah ceunak a si, zumhnak kha a ceu ter i a himter. Kan nunzia a dih ahcun kan ruahnak le kan lungthin zumhnak cawnpiaknak nih a kahmi ceunak kha a cohlan duh lai. (Jn. 8: 31-32).

Zumhnak vialte nih hi phuanmi biatak theihthiamnak le chanhchinnak kha an i hrawm dih. Annih nih Thiangthlarau toihnak kha an hmuh ve. Thingthlarau nih a cawnpiak hna (1Jn. 2:20, 27) hi biatak chungah khan a hruai hna. (Cf. Jn. 16:13).

Zumtu Khrihfa pumpi nih zumhnak bia kongah a palh kho lo. Bishop hna thawkin Khrihfa hna tiang zumhnak le ziaza kong ah lungkhat tein an hnatlak mi cu palhthiam a si lo. (St. Augustine).

Mah bantuk in mi vialte nih an pawm khawh mi cu biatak thlarau nih an lung a pemter hna caah le a fehter hna caah a si. Cucaah Pathian miphun hna nih cawnpiaknak nawl in hruaimi zumhnak kha an vun hmuh tikah fek tein an i tlaih, a hmaanmi biakhiahnak in a thuk chinchin in an purh i nifate nunnak ah tling deuh in an hman. (Jud. 3).

Zumhnak Theihthiamnak ah Ṭ hannak

Thiang Thlarau bawmhnak cungah lawmhnak a tampi a um. Zeicahtiah Thiang Thlarau thawngin zumhnak robia hna theihthiamnak cu Bupi nunnak chungah a ṭhang kho. Hi thil vialte kha an lungthin chungah a rak ruatmi zumtu hna an thlacamnak le an cawnnak thawngin Theology dothlatnak nih phuanmi biatak kong hngalhnak kha a thuk ter deuh. Zumtu hna an hmuhton mi thlarau lei thil theihfiannak in Bible Thiang cu a relmi hna he a ṭhangṭi. (St. Gregory The Great). Bishop rian channak nawl a ngei i biatak laksawng a ngei mi hna phungchimnak in zumhnak theihthiamnak cu a ṭhang. Cucaah a thiangmi phungbia, Bible thiang le Bupi cawnpiaknak nawlngeihnak hi an i pehtlai dih, an i kawmh dih caah pakhat loin pakhat an dir kho lo. Mah hi Pathian nih a fimnak in a rak khan ciami a si. Mah le sining cio in Thiang Thlarau hruainak tangah rian an ṭuan ṭi i, thlarau khamhnak caah hmual ngei ngaiin an i bawm.