Aho sinin dah zungzal Nunnak na kawl?

Ulh caan zarh(3)nak ah kan rel mi Cathiang hna cu Exodus 17:3-7, Psalm 94:1-2,6-9; Romans 5:1-2,5-8; John 4:5-42hna an si. 

Mother Teresa of Kolkata nih hi tin a rak chim: “Sifah timi cu rawlṭam le hrukaihnak awk ngaihlo le umnak ngeih lo lawng hi kan rak ruah saul tawn. A tak chim ah cun, daw tu ngeihlo, zohkhenhtu ngeih lo te hna tu hi a rak si deuh” tiah a rak ti.

Nihiin Thawngṭha bia chungah zeitin kan hmuh tiah cun Samaritan mi nu le Jesuh an i tonnak kong a si. Mah minu hi an khua chungah hawi dang hna he ti than ṭi ding hmanh a ngamh lomi, mi hmai a khap lomi mi nu a si tiah ti khawh a si. Mi dang an um lo lio caan theng te ah khan ti khur ah ti than dingin a kal lio ah Jesuh he an rak i tong. 

Jesuh cu ahmohmanh a kan theidang lo mi Pathian, a kan hnem tu a si. Minu zong a ningzah ter lo. A rak sining tu kha a theihter ṭhan i Pathian nih minung vialte cu khamh a duh hna nak kha a theihter.  Nang le kei zong kan tlamtlin lonak ah Jesuh nih sual a kan phaw lo. Minu sin a kal i a ton bantukin nifatin kan nunnak ah Jesuh nih a kan ton a kan len ve ko. Kan sinning tak kha a sin ah kan chimh a si ah cun tlamtling lomi kan si zong ah Jesuh nih a dawtnak he a kan cohlaan ṭhiamṭhiam ko lai. Amah hmai ah zeihmanh kan thuh khawh mi a um lo. Kan sining tak tein a sin ah kal in kan va ton cio ding kha kan rian a si. 

Mithiang Augustine nih: “Porhlawtnak nih vancungmi kha khuachia sining ah a thlen i, toidornak tu nih cun minung kha vancungmi bantuk ah a thlen khawh” tiah a rak ti. Jesuh hnu zul tiah aa timi kan nih hna kan nunnak ah porhlawtnak in maw kan khah a siloah toidornak nun in maw kan nun ti kha i ruat ṭhan hna u sih. Jesuh hnu zul a simi paoh cu porhlawtnak nun in a nungmi ahohmanh an um kho lo. Zeicah tiah cun Jesuh hrimhrim cu Pa Pathian nawl anun dih tiangin a zul i nawl a ngai mi a si caah asi. 

CCC 2560 ah Pathian kha tihal bantukin kan hal, kan herh kan duh nak hnga ding caah a kan cawnpiak. Pathian sin lawnglawng in kan duh mi thil tling tein kan hmuh khawh. Vawlei thil sining ah zeihmanh nih kan tihalnak, kan duh herhnak diriam in a kan pe kho lo. Pathian lawng nih a kan pek khawh. Vawlei nuamhnak ah kan tihal nak, duhnak le nuamnak kan kawl a si ah cun chikhat caan tawi te lawng a nguh lai. Zungzal nuamhnak le hngangamnak cu Pathian sin lawng ah a um.

Dawtmi u le nau hna, nihin hi ah hin aho sinin dah na ti halnak riamhter ding in na kawl. Pathian sin in maw Vawlei chawva in dah. Ṭha tein ruat law timh tuahnak ṭha ngei cang tuah.