Sining i hmuhfian hi a Biapi tuk

Nihin Thawngṭha bia kan relmi (LK 15:1-3, 11-32) chung in tlangtar ka duh mi “Sining i hmuhfian hi a biapi tuk” timi in thazaang i lak hna u sih.

 Minung nih man sungbik ah kan rak ngeih mi chawva pakhat khat a tlau ding kan sian lo bantukin kan biakmi kan Pathian nih amah mui keng in a kan ser mi, a Fapa thisen in cawk mi, minung vialte hna hi pakhat hmanh thlau sian loin a kan dawt zungzal ko timi hi nihin voikhat nak Pathian bia nih a kan chimh. (Micah 7:18-20) chungah “Bawipa nangmah bantuk Pathian ahodah a um. Nangmah nih kan ṭhat lo nak kha na kan ngeih thiam i kan sualnak kha na lanhtak i aa ṭhleng lomi na dawtnak tu kha na kan hmuhsak” timi kha nihin voikhat nak Bible ah kan hmuh. (Sam 103:1-4) “Kan sualnak vialte kha na ka ngiahthiam i ka zawtnak vialte kha na ka damter. Hmuh awk kan i tlak ningin dan na kan tat lo. Kan sualnak le ṭhatlo nak kan tuahmi ning zongin a kan lehrulh lo timi kha kan hmuh. 

Thawngṭhabia chungah (ကိုယ်ကျင့်တရား နှင့် နောင်တတရား) timi kha kan hmuh. Tuah sernak in a pa lungton aa zuam mi upa bik nih aa thawh i “Kum zei zat dah salbantuk in na rian ka ṭuan i voikhat hmanh na nawl ngai lo in kan um bel lo. Zeidah na ka pek? Ka hawikom he i nuamhnak caah meheh pakhat hmanh na ka pe lo. Sihmahsehlaw, hi na fapa na thilri vialte hlawhhlangnu sin i a hlolak dihtu cu cawthau na thah piak” tiah a ti. A pa nih “na nau cu a thi, atu cu a nung ṭhan. A rak tlau i a tu ka hmuh ṭhan. Cucaah lawmhawk a si hrimhrim” tiah a leh. Rianṭuan nak in a pa lung ton aa zuam mi upa bik le, sualngeih chihnak in a pa lung ton aa zuam mi fa hniang hna kong kha nihin Thawngṭhabia chungah kan hmuh mi cu a si. Nihin Thawngṭha bia chungah kan theih i sining ai hmufiang mi fapa tlau pa kong kha kan theih. Ei awk din awk ngei ti lo in a donghnak ah a lung a hung fim i “Ka Pa kuli vialte hmanh nih ei cawk loin ei awk an ngei. Kei vial hika ah hin rawlṭam in ka thi cuahmah ko. Ka tho lai i ka pa sin ka kal lai i ka pa Pathian sin le nangmah sinah ka sual cang. Nafa ti awk ka tlak tilo na kuli pakhat bantuk in ka chia ve ko’’ ka ti lai’ a ti i a tho i a pa sin kir ah aa thawh. Lamhlat pi in a rat lio kha a pa nih cun a hmuh, a zang fak ngai ngai i a hei tlikhnawh i a kuh i a hmanh. A fapa nih cun “Ka pa, Pathian sin le nangmah sin ah ka sual cang. Na fapa ti awk ka tlak ti lo” tiah a ti. A pa cu a lung aa lawm tuk hringhran. Cucaah a fapa caah puai ngan pi a tuah piak. A pa nih a fapa sin i a duhbik mi cu ‘kaa tlak lo’ timi kha a si. Nihin kan biak mi kan Pathian nih nangmah sin in a duhbik micu ka tlaklo timi le mi sual bik ka si timi hi asi. 

(Isaiah 66:2) ah “Van le vawilei hi keimah nih ka ser dih hna. Mitoi aa dor i a sualnak a ngai chih i a ka ṭih i ka nawl a ngai mi cu an cungah ka lung a lawm” tiah a ti. Zeitik caan ah dah Bawipa cu na cungah a lung a lawmh? Naa pumh caan zong asi lai, naa pek caan zong asi lai. Sihmanhsehlaw cu nak in a sunglawi deuhmi cu ka tlak lo na ti lio le sualngeih chihnak lungthin na ngeih i, sualthlahnak na tuah lio ah khan Bawipa cu na cungah a lung a tling i a lung aa lawm deuh. (Efesa 5:10) ah “Bawipa a lawmhter tu thil kha kawl i zuam uh” timi kha kan hmuh. Bawipa a lawmhter cu thil cu zeidah asi? Bawipa a lawmhter tu thil cu mi toidor le sual ngeihchihnak a si timi kha (Isaiah 66:2) ah kan hmuh. Sual na thlah lio ah vancungmi cu lunglawmhnak puai nganpi an tuah timi kha Mithiang Pual nih a rak chim. Sining hmuhfian hi Pathian nih a duhbik mi asi timi kha (Exodus 4:10) ah kan hmuh. Bawipa nih Moses cu a auh i a mi Israel mi hna hruai tu dingah a kawh. Moses nih “Bawipa kei cu biachim ka thiam lo, kei cu kaa tlak lo” ati. (Mathai 3:11)ah Johan nih “kei cu a kedanh hri phoih tu hmanh ah kaa tlak lo” tiah a ti. (1Korin 15:9) ah Mithiang Pual nih “Lamkaltu  vialte hna lakah minau taa bik ka si. Lamkaltu ti awk hmanh kaa tlak lo” tiah a ti. (Lk 5:8-9) chungah Mithiang Peter nih “Bawipa ka kal tak ko. Kei cu misual bik ka si” ati. (Mt 23:11) ah “Mi ngan si a duhmi cu ṭhumh a asi lai. Mitoi aa dor mi cu mi ngan ah a si lai.” Pathian nih a duhmi cu mitoidor le sual ngeihchihnak hi a si timi hi a bia thiang ah kan hmuh.Kei hi Pathian hmai ah a sualbik le a tlak lo bik mi ka si timi i hmuh fian hi a biapi tuk mi asi timi hi nihin thawngṭha bia nih a kan chimh mi cu asi. A ngai tu nan dihlak cungah Bawipa nih thlua in chuah ko hna seh. Kaa lawm.