Pope nih March thla chung Thlacam a timhmi: ‘Hriamnam hloh i Daihnak caah’
Pope Leo XIV nih March thla caah thlacam a timhmi a chuah, Catholic pawl kha ‘hriamnam hloh le daihnak’ caah amah he thlacam ṭi dingin a sawm hna, cun ‘nuclear ṭihnung nih minung hmailei kha a uk ti lai lo’ tiah thla a cam.
Pope Leo XIV nih March thla caah thlacam a timhmi cu “hriamnam hlohnak le daihnak caah” timi in a si.
Pope nih March thla chung vialte cu Catholic Khrihfa vialte hna nih a tinhmi thlacam nak kha “Pope’s Worldwide Prayer Network” timi website in thlacam ṭi dingin a sawm hna.
Pope Leo a thlacamnak ah ‘Bawipa nih minung vialte cu amah muisam keng in a ser hna i “raltuknak le hrawhnak caah si loin hawikomhnak caah,” a kan ser tiah a ti.
Himnak taktak le daihnak peknak
“Nan cungah daihnak um ko seh” tiah na zultu hna sin ah a rak ti tu Bawipa, na daihnak laksawng cu a tak in a can khawhnak hnga ding caah thazang ṭhawnnak kan pe ko sawh.
Pope nih, “Nihin kan thlacam nak cu vawleicung vialte daihnak a um khawhnak hnga caah kan pekchanh. Ram uktu hna zong nih an hriamnam hna chiah tak in biaruah ṭinak le i pehtlaihnak lam kha i thim ding in kan nawl ko hna” tiah a ti.
“I huatnak le pakhat le pakhat zei i rel lonak lungthin hna kha hrial in i remnak thil ṭha a kawl tu kan si khawh nak hnga” Bawipa sin ah thla kan cam.
“Himnak taktak timi cu tihphannak nih a chuahtermi uknak in a chuakmi si loin, zumhnak, dinnak le miphun hna karlak ah lungrualnak in a chuakmi a si ti kha kan hngalhthiam nak hnga kan bawm ko,” tiah a ti.
Nuclear hrocernak nih minung hna hmailei sining uk ti hlah seh
Pope nih cun Bawipa nih ram hruaitu hna kha fimter ko hna seh tiah thla a cam. Cuticun thihnak project pawl hlawt khawhnak ralthatnak an ngei lai i , hriamnam in i zuamnak hna kha an ngol khawh lai. Cun a thazang dermi hna i nunnak kha biapi deuh ah an chiah khawh lai” tiah a ti.
Cun “Nuclear ṭihnung nih hin minung hmailei kong uk ti hlah seh,” tiah a ti.
Thiang Thlarau Pathian nih zumhzawktlak sinak le kan khua kan ram, kan chungkhar le kan thinlung hna chungah daihnak a sertu kan siter hram ko seh tiah thlacamnak zong a tuah chih rih.
A donghnak ah, Pope nih remdaihnak a chuahter khotu tuahsernak paoh le bia chimṭinak paoh cu vawlei thar a chuahnak hnga ding caah thlaici an si tiah a ti.
Pope Muicawl ah
Pope he thlacam ṭi timi cu Pope nih thla fatin thlacam a timhmi kong he pehtlai in vawlei cung pumpi huap in thlacam ṭinak a si. thanh ding timi tinhmi he vawleicung pumpi huap in tuahmi a si. Cucu Pope’s Worldwide Prayer Network, timi website in Society of Jesus Bu tawlrelnak in tuah mi a si. Hi thlacamnak tiah tuah mi cu 1844 ah rak dirhmi a si. 2016 thawk in, Pope he thlacamnak cu Vatican social network he pehtlaihnak a ngei mi vialte hna ah a zohtu 247 million leng an si cang. Cun holh phun 23 leng in leh a si cang i ram 114 ah thawngzamh nak hna nih an langhter fawn cang.