Bawipa Tinhmi Khuaruahhar
06 March 206, nihin ni i Bupi nih thawngṭha rel ding a kan pekmi (Mt. 21:33-43, 45-46) tiang hi chungah kan hmuh khawhmi cu Dum ngeitu pa le a fapa le a rianṭuantu a sal hna hlawnhmi minung hna kha kong kha kan hmuh khawh. Hlawmh mi minung hna nih Dum ngeitu pa kha Thingthei an pek khawh lo caah, a lung an ton lo caah nihin relmi (Mt. 21: 43) chungah “Hitihin kan chimh hna, nannih cu Pathian pennak kha chuh nan si lai i theih ṭha tein a tlai dingmi kha pek an si lai” tiah a ti. Cu Pathian i a pennak cu midang sinah Judah kut chungin Israel pennak in chuh a si i Khrih pennak chungah Biakam thar pennak chungah pek a si cang.
Biakam hlun biaknak, Israel biaknak, Judah biaknak cu Pathian innchungkhar an rak si i Pathian dum an rak sina tein Pathian lung an rak tong lo. Pathian nih a khamhnak thawngṭha phuang dingin Profet tampi a rak thlah natein an rak thah hna a si. Zeiah an rak rel lo. Cu pennak cu a lak i Fapa Jesuh Khrih kha a pek i dum a ngeitu cu Pa Pathian a si i cu dum cu kan Bawipa Jesuh Khrih a si. Kan Bawipa Jesuh Khrih cu Israel mi pawl nih, Judah mi pawl nih lung santlai lo ah an rak rel i an rak hlawt. (Mt 21:42) ah “inn satu hna nih santlai lo tiin an hlawtmi lung cu lung santlai bik ah a cang” a ti. Kan Bawipa Jesuh Khrih cu lung santlai lo ah an hlawt nain kan Bawipa Jesuh Khrih cu Khrihfa Bupi i Pathian a dum i Pathian innchungkhar i innkil lung, Khrihfa Bupi i innkil lung, a pum a simi innkil lung ah a cang.
(Johan 3:16) nihin i thawngṭha aupinak i kan relmi ah Pathian nih vawlei hi a dawt hrinhran caah a ngeihchun a fapa a pek a ti. Vawlei in sermi minung kanmah cu a kan dawt tuk i cu Pathian i dum a simi, a chungkhar a simi cu Khrihfabu chung i a ummi kannih hna kan nunnak hnga ding caah Fapa Jesuh Khrih cu pek kan si. Nihin kan relmi bible (Gen 37) chungah kan hmuh khawhmi cu Jacob i a fapa hniang Joseph cu a u le nih zeiah an rel lo i santlai lo minung ah an ruah i an hnachuah i an zuar sihmanhsehlaw hmailei caan ah mangṭam thihnak in an luatnak hnga ding caah Jacob le a fale vialte hna rawlṭam tihal in an luatnak ding hnga caah santlai lo ah an ruahmi Joseph nunnak hmang in a pa le chungkhar a u le nau vialte cu mangṭam in an luat. Santlai lo lung i relmi kan Bawipa Jesuh Khrih rak hlawtmi cu a pum a simi Khrihfabu caah cerhti a si i khamhtu pa a si. Nu Mary nih a pawimi a paw chung i thingthei a simi, fa thluachuah a simi kan Bawipa Jesuh Khrih cu dum chungah a ummi Khrihfa Bupi nih cu thingthei in dum a ngeitu Pa Pathian cu sunpar a pek, lawmhnak a pek. Cucu Bawipa thisa raithawinak in, kan Bawipa Jesuh Khrih a thi le sa in Pa Pathian cu raithawinak Khrihfa Bupi nih a pek. Cucu Pathian thilung a tawngmi theitlai cu a si.
Asi ahcun nihin ni ah pumpak kan nunnak cio in cu dum chung i a ummi kannih hna nih Pa Pathian cu Thiang Thlarau nih a chuahpi mi dawtnak, lawmhnak, daihnak, lungsaunak, ṭhatnak, zumh awktlak sinak le toidornak le mah le mah i tei khawhnak hi Thiang Thlarau nih a chuahpi mi a si bantuk in pumpak kan nunnak cio ah tu lent caan chungah kan biak kan Pathian cu sunparnak Thiang Thlarau theitlai, theitlai ṭha kha pek khawh i zuam cio hna usih.
Duh dawtmi u le nau, nu le pa hna Jesuh Khrih cu Khrihfa ka si ko tiah a timi hna nih tampi nih cohlan a si nain Khrihfa Bupi a simi, a pum a simi, a thisen a luanh hnawh mi cu Khrihfa Bupi cu mi nih santlai lo lung ah an rel i an hlawt. Sihmanhsehlaw, kannih cu Khrihfa Bupi cu Jesuh Khrih a pum a si bantuk in Khrihfa Bupi a khamhtu cu Jesuh Khrih a si ko caah Jesuh Khrih i a tlinnak hrimhrim kha a pum a simi a dum ah a innchungkhar ah a si caah Khrih le Khrihfa Bupi ṭhen khawh a si lo i cu dum chung i a ummi cu theih ṭha an tlai khawhnak ding caah Jesuh Khrih nih nunnak a pe bangin khamh kan conak hnga ding caah Jesuh Khrih nih a thisen in vawlei in sermi kan nunnak a dawt tuk caah a thisen a luanter mi caah Pathian cu zungzal in lawm in thangṭhatnak pe ko usih. Thangṭha a rak ngaitu nan zapi te kan biak kan Pathian nih thluachuah bawmng bal za in ṭhumh thlak ko hna seh.