Ngaihthiam Nun

Ngaihthiam nun timi hi Khrihfa kan nunnak ah siseh, zatlang kan nunnak ah siseh, cu bu khat le bu khat karlak ah siseh, cun Khrihfa bu ah siseh, Chungkhar le nu le va i pehtlaihnak ah siseh nu le pa, fale hna i pehtlaihnak ah a herh hringhran mi pakhat a si timi kha kan hmuh khawh. 

Jesuh nih ‘midang kha an sual va ngaithiam hna u law nan nih zong nan sual ngaihthiam nan si ve lai’ tiah (Lk6:37) chungah kan hmuh. Phunkhat lei in kan chim a si ah cun ‘zeibantuk mi hna hi dah Hell ah an kal lai’ timi kong he pehtlai in kan Bible thiang kan zoh a si ahcun “Sual aa ngaihchih lo mi hna le midang sual a ngaithiam lomi hna, ngaihthiam nun a ngei lomi hna hi an si” ti kha fiang tein kan hmuh khawh. 

Tuchan ah ngaihthiam nun timi hi zei ruangah dah kan herh timi kong zong vun langhter rih ka duh. Minung timi cu thisa in a nung mi kan si hna i ‘zeitluk in Pathian lei ah kan i zuam, kan fel, thla kan cam’ ka ti len zongah thisa in a nung mi kan si caah sualnak he aa ṭhen kho mi pakhat hmanh kan um lo. A caan ah cun kanmah lei in midang cungah sualnak kan tuah caan zong a um lai i midang zong nih kan cungah sualnak an tuah caan a um ve lai. Cubantuk caan ah zeidah kan herh bik? “Ngaihthiam nun” timi hi kan herh tuk hringhran ko.

Nihin kan vawlei, kan pawngkam kan zoh tikah kan Khrihfa bu kan zoh tikah, kan sining kan zoh tikah, kan chim ṭheo mi cu ခေတ်ပျက် tiah kawl holh in kan ti i chan a rawk kan ti. A ngai te tiah cun chan hi a rawk lo, amah te zongin a rawk lo. Chan a hrawk tu cu kanmah tu hi kan si tawn. Zeiruangah dah kan chan le kan ni caan hna hi hitin an rawh kan ti ah cun ‘Ngaihthiam nun’ kan ngeih lo ruangah a si. Cu ruangah ngaihthiam nun timi cu Khrihfa hna kan nunnak ah a herh tuk hringhran mi a si timi kha kan hmuh khawh.

Peter nih Jesuh sinah, “Bawipa, ka u nau nih ka cungah sualnak a tuah tikah voi zeizat dah ka ngaihthiam lai” tiah bia a hal tikah, ‘Voi 70 let 70’ tiah a ti. Chim duhmi cu ‘a zungzal in na ngaihthiam lai’ tinak a si. Cuasicaah, ngaihthiam nun timi hi rikhiahnak a um lo. A zungzal ngaihthiam nun ngeih ding kha Bawipa nih a kan cawnpiak. Cun zumtu hna kan thlarau lei in pedaan kan i tah khawhnak zong hi ‘Ngaihthiam nun’ a ngei maw ngai lo timi in zoh khawh, tah khawh a si. Ngaihthiam nun kan ngeih lo a si ah cun Pathian bia mi kan si taktak lo ti zong kha a lang. 

Ton bal mi pakhat ka chim a si ahcun, Khrihfa chungah siseh, sang le veng ah siseh, buaibainak tete hi a um ṭheo tawn i, ngaihthiamnak kha Khrihfa phung in siseh, Lai phung in siseh, ngaihthiamnak i hal timi a um tawn tikah, a caan ahcun Pathian he aa neih ngai, a zum ngai tiah kan ruah tawn mi hna hi ngaihthiam nun kan rak ngei tawn lo. Thlarau lei ah zei an si lo tiah kan ruah mi hna tu nih khi ngaihthiamnak lungput an rak ngei deuh tawn. Thlarau lei in zei tluk in dah kar kan hlaan timi hi ngaihthiam nun zeitluk in dah a ngeih timi zoh in kan hmuh khawh tawn. 

Dawtmi u le nau hna, nifatin Khrihfa dirhmun in kan nunnak ah Thlarau lei ah nu tling pa tling kan si khawhnak hnga caah siseh, vawlei kan nun lio hrimhrim ah hin Bawipa Sunparnak a langhter kho tu Khrihfa ṭha, zumtu ṭha kan si khawhnak hnga ca zongah hin ‘ngaihthiam nun’ in nun khawh i zuam hna u sih. Cuticun kan pawngkam, kan vawlei pi caah daihnak a phortu Pathian fanu fapa ṭha kan si kho hna lai.