France ram kum 20 chung Catholic zumhnak ah tipil a ingmi an tam bik Kum
Kum 2025 ah France ram ah thil khuaruahhar pakhat a cang mi cu ‘upa 10,300 leng nih Catholic bu ah tipilnak an ing hna i hi kong he pehtlai in a luan ciami kum 20 chungah a tam bik kum zong a si.
Hi thil a cang mi kong he pehtlai in khuaruahhar a si mi cu Catholic chungkhar in a ṭhang mi hna si loin Gen Z kum 18-25 kar mino pawl Catholic zumhnak ah tipilnak an in mi hi a si.
French Institute of Public Opinion nih a langhter ning ah cun, France ram chung milu 50% nak tam nih Pathian a um lo timi zumhnak dirhmun ah an um tiah a ti.
Fontblin Priestly Center, France i hruaitu a simi MSGR. GUILLAUME DERVILLE nih “Hi thil a cang mi hi lenglei parpavuan thlen siloin, lungtak tein thlennak a ngei mi hna an si. Cun ‘hi mi hna hi khoika in dah an rat? Zeicahdah an mah tluk in an tam? Thil kan tuahmi a ṭhat deuh ruangah maw a si?’ tiah Keimah le keimah biahalnak kai tuah. Fianternak ka tuah khawh mi in ka langhter a si ahcun, “Thiang Thlarau” thawngin a si ko tiah a ti.
Atu cu, France ram i Khrihfabu nih zuamcawhnak(challange) phunhnih a ton a ngeih i pakhatnak cu, Pathian bia a cawn lio mi (catechumens) pawl kha zumtu (community) ah fonh ding le, pahnihnak ah, zumhnak ah an lung thawhnak a tlau lonak hnga ding caah a si. Atu lio ah, hi tinhmi hna pahnih hi tlinter an i zuam lio a si.
“Paris ah a bik in, pumpak hnuzulhnak hna zong a um i phu dirhnak in pakhat le pakhat i theihnak, i bawmhnak in hmunkhat ah kap hnih in an ṭhangcho kho lai” tiah Msgr. Guillaume nih a ti rih. Zumhnak in mipi naihniam tein um ter nak le zatlang nun (community) ser timi cu France ram bantuk ah hin cun a har ngaimi zong a si” tiah a rauhnak zongin a chim.
A peh rih mi cu “I pehtlaihnak ah pumpak dirhmun ruahnak(individualism) zuamcawhnak a um mi zong hi zawtnak bantuk a si.”
France bishop pawl nih ram pumpi huap in kum khat chung a rau dingmi zohfel riantuannak an thawk. A ruang cu, ‘Hi bantukin lungthlennak a chuahtertu a ruang hna kha thukpi in hlathlai ding le bu chung a lut mi hna zong thlarau lei kap in ṭhanchonak thukpi an ngeih khawhnak hnga ding caah a si.
France ram i Catholic mino hna nih hi zumhnak thlennak a karhnak hnga ding caah online in siseh, pumpak in siseh, zumhnak tharchuahnak lei ah an tha an chuah hna i biapi ngai in rianṭuan ah an i tel ve hna.
Atu cu Montmartre le biakinn dang hna ah kal in zankhuadei Sacrament biaknak caan hmannak hna hi mino tampi kar lak ah a lar ngai cang.
Harsatnak dawnkhaan tu tete zong hi an um. Sihmanhsehlaw, cu lio caan te zong ah cun lawmhnak hna zong an um len ve. Hi thil cang mi hna hi hmai lei France ram um Catholic caah zumhnak tharchuahnak caah a thar in innka a hung tu pakhat zong a si kh mi a si.