Nan ral kha va daw hna uh
Nihin RVA in Pathian bia thazaang a la tu RVA chungkhar, nan dihlak cungah lunglawmhnak tampi ka ngei. Nihin thawngṭha bia kan relmi (Mt 5:43-48) chung in tlangtar ka duhmi, “Nan ral kha va daw hna uh” timi in thazaang la hna usih. (Levitikas 19:18) chungah “Nan mah na phung hawi chungah phu na hlam lai lo. Na lungchung i huatnak zong na pawi lai lo. Sihmanhsehlaw, na inn pa cu nanmah na dawt bantuk in na dawt lai” a ti. (Phungthlukbia 25:21) ah “Na ral kha a rawl a tam ah cun eiawk rawl va pe uh” a timi kha kan hmuh ṭhan.
Cucaah kan biakmi kan Pathian hi minung a kan thleidang tu Pathian asilo timi kha kan hmuh. Na ral kha va daw hna uh timi cu a fawi mi asilo. Sihmanhsehlaw, kan ral kan dawt khawhnak cu Khrih Jesuh zumtu ṭha kan sinak kha kan langhter kha mi asi. Zultu (12) hna zong an nunzia nih Khrih salṭha sinak kha an langhter. Vancung khua i a um mi nan pa a tling bantuk in nan nih zong nan tling ve awk asi. Miṭha he miṭha lomi he an cungah nikha a tlanter i ruah a surter mi kan Pathian asi. Mithlei dan tu asilo, mihua tu asilo, midaw tu asi timi kha nihin thawngṭha bia nih a kan chimh duhmi asi. Nan ral kha va daw hna uh a kan ti tikah minung lei in a huai mi cu asi lo. Sihmanhsehlaw, Pathiannih a duhmi cu amah Pathian ah pakhat kan sinak le unau kan si dih timi a langhter nak asi. (Genesis 1:26) ah “A tu cu minung kan ser cang hna lai. Kanmah mui an kenglai i kan mah he kan i lo lai” ati. Cucaah minung cu amah Pathian muisam keng mi lawng kan si dih. (1Korin 6:19-20) ah “A thisen in cawkmi kan si dih. Kanmah ta kan silo, Pathian ta kan si dih. (Efesa 2:16) ah “Vailam cung i a thihnak in Khrih nih an i ralnak kha a hrawh” timi kha kan hmuh. Khrih thawngin Khrih ah unau kan si dih cang. Cun ni hma nungbik ni ah zungzal nunnak ro a co hnga mi lawngte kan si. Cucaah Pathian nih nan ral kha va daw hna uh a kan tinak cu asi. Pathian nih minung hi ral tiah a hmuh mi a um lo. (1John 2:2) ah sual ngeihthiamnak kan sinak cu Khrih thawngin asi i kan mah sualnak lawng siloin mi vialte zong an sualnak kha ngiehthiam an si lai a ti. Cucaah Pathian nih minung hi ral tiah a hmuh mi a um lo.
Nihin thawngṭha bia nih a kan chimhmi cu na ral kha va daw hna uh a kan tinak asi. American tamarah AbrahamLincoln cu tamarah rianṭuan kho lo dingin pianphet asi mi Edwin M. Stanton nih a phun phun in rian a rak ṭuan. Sihmanhsehlaw, mipi nih Abraham Lincoln cu mee an pek i tamarah rian a ṭuan. Abraham Lincoln nih amah a rawi tu, amah a hua tu Edwin M. Stanton cu secretary rian a pek i mipi an khua ruah a har dih. Bia kakhat an hal “Zeicahdah nan mah an hua tu, nan mah an rawi tu cu nanmah he rianṭuan ṭi dingle rawl ei ṭi dingin khua na khan” an ti. Abraham Lincoln nih Amerian ram le mipi caah dawtnak lungthin a ngei mi cu a mah lawng hi ka hmuh tiah a ti. Abraham Lincoln a thih hnu a thlan ah Edwin M. Stanton nih caa a ṭial piak. “Kei ka saya ṭhabik cu hi pa hi asi” tiah a ti. Edwin Stanton a saya ṭhabik cu Abraham Lincoln kha asi. Nang le kei kan sia ṭha bik cu Jesuh asi.
Nihin thawngṭha bia nih a kan chimh mi cu na ral kha va daw hna uh tiah a kan fial bantuk in mihua tu, mirawi tu siloin midaw tu mizaangfah tu kan si khawhnak hnga nihin a bia thiang kan theih mi hi nunpi cio u sih. Dawtnak a langhter mi Pathian fanu/pa kan si lai. Nihin RVA a ngai tu nan dihlak cungah lunglawmhnak tampi ka ngei. Pathian nih thlachuah inpe cio ko hna seh. Kaa lawm.