Pope: Biaknak nun ah nawl ngeih timi cu ‘zeizong te uknak nawl ngeih’ a si lo

Pope Leo XIV nih Legionaries of Christ chungtel hna kha uknak le nawlngeihnak hmaan timi cu midang uknak caah si loin rianṭuannak ah a si tiin ralrin theihternak a ngeih hna.

Feb. 19 ah biaknak bu i General Chapter ah aa telmi hna sin bia a chimmi ah, Pope nih ‘biaknak nunnak ah nawlngeihnak timi cu Khrih cungah hram aa bunhmi a si i “mipi nunnak a ṭhantertu” lam pakhat a si awk a si. Cun zeibantuk uknak sihmanhsehlaw “minung upatnak le zalonnak a upat lomi uknak hna cu hrial awk a si” tiah a ti.

“Biaknak nunnak ah nawlngeihnak cu zeizong te tleihdih-uknak in i hruai a si lo. Thlarau lei le pakhat le pakhat ca i rianṭuannak ah ṭhatnak a chuahpi mi sining in i uk-hruai a si” tiah a ti. “Hi cawlcanghnak cu ‘i hruai thiamnak’ in a lang awk a si, tangdornak lungthin he pakhat le pakhat rian i ṭuan piak thiamnak in cawn a si.”

Legionaries of Christ timi phu cu January 3, 1941 kum ah a thi cangmi Pa Marcial Maciel Degollado nih Mexico ram ah a rak dirhmi phu a si.

Archbishop Charles Scicluna hruainak in May 2006 kum ah Father Maciel nih seminarian pawl nupa sualnak a tuah pi hna timi sualpuhnak kong hlathlainak an tuah hnu ah, Vatican nih Father Maciel cu ‘mipi hmai ah thlacamnak tuah lo dingin (Mass tuah lo ding) le sual ngaihchihnak nunnak nun dingin’ mipi sin ah dantatnak nak thawngthanhnak a tuah. 

Father Maciel a thih hnu 2008 ah, mah Father pa nih kum saupi ngakchia tampi a rak tlaihhrem hna ti a hung lang. 2010 ah, Vatican nih Father Maciel cu “a fak tukmi le a hmaan lotuk mi ziaza rawhralnak le sual lian taktakk a tuah” tiah sual a phawh i “biaknak lei he pehtlai mi nunnak sullam taktak a ngei lomi nunnak” a ngei mi a si tiah thawngthanhnak zong a rak tuah ṭhan. 

2025 HBO docuseries (record tuahmi ca hna) ah Father Maciel kong he pehtlai in ‘rithai sii a rak hmannak le nupa sualnak a tuahpi mi hna konglam hna zong’ tling ngai in chiah an si hna i 2024 lawngah langhter mi sualnak tuahmi hna cu Vatican nih 1950s lio tein khan a rak theih cangmi a si ko tiin an langhter. 

2020 kum ah an onmi Pope Pius XII archives (cazin chiahnak) ning ah cun, 1956 kum ah Vatican lei in Fr. Maciel cungah cawlcangh-reng thlak, phuak dingin timhtuahnak a rak ngei ko tiah a ti. Sihmanhsehlaw, 1958 kum Pope Pius XII a thih tikah  Father Maciel hawikom hna nih a min thianh awkah “Phu dirhtu” a si nak dirhmun min kha hmangin an rak khamh’ tiah The Associated Press in a langhter.  

Vatican ah Pope Leo nih Legionaries pawl a don hna tikah, an phu hruaitu hna cu “Lung fiang tein khuaruah thiamnak le Thiang Thlarau Pathian sin in bia ngaih nak caah caan ṭha caan sunglaw a si” tiah a ti. 

Sihmanhsehlaw, an phu hna i thil ṭha an rak tuah mi vialte cung zongah cohlaan nak a ngaih hna i, phu chungtel hna cu “harnak le fahnak a pe mi a si lo hmanhah tuanbia langhternak ah sining phunphun in a ṭhang mi rocotu “charism rocotu” an si tiah a ti hna.

“Hi bantuk phu khat chungah sining i hrawmnak ah, hlaan thil si can ning kong lawng zoh lo in, atu lio caan ah mah le mah sining thlen-tharchuah ṭhan ding le Thawngṭhabia cungah zumhawktlak tien nun ding a si” tiah a ti. 

Sihmanhsehlaw, a peh rihmi cu, Legionaries hna sinah chiahmi ‘charism’ cu “Thiang Thlarau laksawng” a si i “Pathian sin in hnemhnak a si tiin lawmhnak he cohlan ding a si” a ti. 

“Cucaah, nannih cu charism ngeitu nan si lo, a zohkhenhtu le a rianṭuantu nan si ti kha philh hlah u. Hi laksawng nih Khrihfabu le vawlei ah thei a tlai peng nakhnga nan nunnak pek awkah kawh nan si” tiah Pope nih a ti.

Pope Leo nih Legionaries phu hna cu “Pakhat le pakhat i ngaihthiamnak le Pathian duhnak nan kawlnak ah hmuh khawhmi tehte khaan ding, cun pakhat le pakhat tangdornak lungthin he bia i ngaih piak ding, zalong tein nan lung chung a um mi hna kha pakhat le pakhat i thiehternak, nan phu chung mibu ngan deuh nih hnatlak pi mi kha cohlan khawhnak lung thin hna ngeih a herh” tiah a ti. 

“Thlacamnak, toidornak le chunglei zalonnak lungput he nun peng dingin kan forh hna. Pumpak duhnak le pengtlang duhnak kha kawl hlah u. Nan phu lei zongin tuahsernak ah tlamtlin sawhsawhnak nak me lawng zong kawl hlah u. Sihmanhsehlaw, zumhnak ah chungkhar pakhat dirhmun in na umnak phu caah le Khrihfa bupi nih an pekmi rian caah Pathian duhnak kawl ding tu kha i zuam u” tiah Pope nih a ti hna.