Pathian duhnak tuah

RVA in thawngṭha chimnak caan sunglawi a kan pe tu kan biak kan Pathian a min ka thangṭhat. Feb 27, 2026 nihin ni i Bupi nih thawngṭha relding a kan pek mi (Mt 5:20-26). (Mt 5:20 a ) zawn kha tlangtar ah kan hman lai, “Pathian duhnak tuah”. Pathian duhnak cu zeidah asi? (Johan 6:29) ah Jesuh nih “Pathian nih tuah hna seh” ti an duhmi hna rian cu a thlahmi zumh hi asi ati. A thlah mi cu kan Bawipa Jesuh Khrih kha asi i kan Bawipa Jesuh Khrih cu a kan khamh tu le kan Bawipa le kan Pathian, Mesia tiah kan cohlan cang bangin kan Bawipa Jesuh Khrih a zumtu a hnuzul kan si bantuk in a nun zia kha i cawn dinghi kan rian ngan pi asi. Cucu Jesuh Khrih zong nih (Mt 11:29) ah kei cu nunnem mi le mitoidor ka si caah ka nawl hi i cawn uh tiah a kan fial asi. Minunnem le mitangdor cu khoika paoh ah an i tlum i khoika paoh ah an thut an to nak ah remnak in a khat i daihnak a um i, Pathian he zong an i rem i hawile minung cung zongah daihnak he khua an sa kho. Palh in tuah mi thil vialte hi sual an si dihko tiah (1 Johan 5:17) ah fiangte in a kan chimh. Sualnak hi minung nih kan tuah tikah Pathian sinah direct kan tuah mi sualnak a um i, cun minung cungah kan tuahmi sualnak a um. 

Pathian sin i (direct) in kan tuahmi sualnak le (indirect) minung in Pathian sin i sualnak kan tuah mi.

Pakhatnak: ah direct in Pathian sin i sualnak kan tuahmi cu biana ah van char ka duhmi cu, (Exodus 32:3-5)chungah Israel mi hna cu Moses hruainak in Ezipt sal in an chuah tikah rili sen kha an tan hnu ah Moses nih nawl bia (10) lak ding in Sinai tlangcung ah a kai tikah caan sauipi a rohcang tikah Israel mi pawl an lung a dong i Ezipt sal tannak in a kan chuah pi tu Moses khoi ka a kal kan hngalh ti lo caah kanmah a kan hruai tuding Pathian kan ser piak tuah tiah Israel mi nih Aaron an fial tikah Aaron nih an hna tonh vialte, kutdong hrawlh vialte a phoih ter dih hna i suicawfa ah a tit i cuticun an biak. “Hihi nan Pathian cu asi” tiah Aaron nih a ti. Cucu Pathian sinah direct in minungnih sualnak an tuah mi sualnak asi. 

Biakamthar chung ah cun (Luka 23:39) ah Jesuh Khrih vailam an taar lio ah khat lei kam i an tar mi mifir pa nih “Messiah cu na si kun asi ah cun nangmah le nangmah kha i khamh law kan mah zong hi kan khamh kon ngat” tiah Fapa Pathian Jesuh Khrih cungah direct in sual an tuah si. Indirect sualnak cu zeidah si kan ti siah cun minung cungin Pathian sinah asi i (Genesis 4:10) ah “Cain nih Abel cungah hnah chuahnak a ngei i a thah”. Pathian nih a ti mi cu “Cain na nau thisen vawlei khan ka hna ah a thiseh nih a ka auh cang” ati. Cain nih a nau pa Abel a thah mi cu minung cungzong ah a sual bantuk in sertu Pathian sin zongah a sual a si. Indirect sualnak asi. 

(Mt 5:22) nihin i Bupi nih relding a kan pek mi chungah “A u a nau cu zei ruaram lo mihrut a timi cu hell ah tlak awk ah aa tlak ee” tiah kan Bawipa Jesuh Khrih nih a kan ti. Kan unau, kan rualchan, kanmah minung cung i mawhnak, sualpalhnak ngeih hi minung cung lawn ah siloin sertu Pathian sin zongah sualnak tuah asi. Direct in kan tuahmi sualnak asi zongah indirect in kan tuahmi sualnak asi zongah a hmual cu ai khat ṭhiamṭhiam asi.

Nihin kan relmi Bible (Mt 5) chung i kan relmi chungah hin indirect sualnak pawl asi i hawikom le minung cung i sualnak va tuah asi. “Pathian tlang thiang na kal tikah, raithawi nak pekchanh dingin na kal tikah na unau cungah na mawhnak kha nai hngalh asi ah cun laksawng naiput mi sa kha na chiahṭhan lai si kaw, remnak vatuah hmasa. Cuhnu ah ra kirṭhan law na sa cun Pathian cu laksawng pe tuah” tiah a ti. 

Minung tampi nih kan i palh tawnmi cu Pathian lungtonh lawng kha kan i tim i a mihna cung, minung hna cung i kan mawhnak ngeih thiam vahal kha kan i ruat tawn lo. Cucu bantuk thinlung put cu Pathian nih a duh lo mi asi i Patian sin i kan pekchanh mi, Pathian sin i kan i put mi kan laksawng, Pathian sin ah thla kancam mi Bawipa nih a cohlan mi asi nak hnga dingcaah cun kan unau cung i mawhnak kan ngeih mi kha an lung diriam lak in ngaih thiamnak va hal khi asi. Cuhnu lawnglawng ah Pathian sinah rat in laksawng kha i put in Pathian pekmi kha kan biak kan Pathian nih a cohlan mi cu asi i, kan sualnak ngeih thiam kan sive bantuk in mi cung i kan ngeihmi sualnak zong kha ngeihthiam dinghi Bawipa nih a kan duhsak mi asi caah nihin ni ah kan laksawng cu kan i put hlan ah kan u kan nau cungah ‘sualnak kan ngei maw’ i ruat hna usih law kan ngeih asi siahcun ngeihthiam nak vahal in cuhnu ah tlingtein thinlung i siam remh in laksawng i put in Bawipa ṭangah lungthiang tein kal hna  usih. 

Cucu Bawipa i cohlan mi raithawi nak cu asi. Thawngṭha a ngaitu vialte Pathian nih thlachuah a thong le zaa in ṭhumthla ko hna seh.