Mante asiloah mantlau pawl
1.Lamvah man
A ni nih a vahnute kha him tein a va inn tiang a thlah man a si i Annas 8 a hal hna lai.
2.Tualkai man
A nih nih a va inn tiang a thlah i a va tual cung tiang ba lengmang in a kai man kha a si i Rs. 1-10 tiang a si tawn.
3.Tivatan man
A ni nih a va inn tiang a thlah tikah tiva luang a tannak ah a ke a cin man kha a si. Tiva a tam zat in a duh ahcun a hauh khawh. Annas 2-8 tiang a si tawn.
4.Hleikai man
A ni nih a va inn tiang a thlah hleiah, a va inn cung tiang a kainak ah a bat man kha a si i Annas 2-8 tiang a hauh khawh.
5.Thirliak
Thir kan liah i a kan lem bantukin hawi he i komh i, i lemnak ti duhnak ah a si i thir in an sermi namte, hreitlung asiloah Annas 2-8 tiang pek a si tawn.
6.Ṭhutphah man
A ni nih a va inn ah a taw fak cikcek i a to, a ṭhut man kha a si i puan zun khat, Rs. (1) man asilole Rs. (1) in pek a si.
7.Zuhrai man
Chawdawr ah hrai phar 4 man kha cawk i zureu a khat tein thlet hnu ah, a hrai he pek chih a si. A ni nih palei pawl he bia an i ruah pah ah din awk a si i a hrai zong aa laak beh lai.
8.Ti-awk man
A ni a thin damnak ah a si. Maihum khap 5-7 tiang an manh lai. Asilole puan kun, hni kun, Rs. 5-7 kar an manh lai. Ti-awk man timi ahhin awkpi le awkte tiah a um i, awkpi cu marlei khap 8, awkte caah cun marlei khap 6 a si tawn.
9.Kuanfang
Kuanfang 5-10 tiang a ṭang caah an pekmi a si.
10.Hrangkha (coral belt)
Bawi nih vel 2, chia nih vel khat an pek lai.
11.Puakpuan
Vangeinu kha a ngakchiat lioah a ni nih a rak puak i, a puan ṭet cikcek tein a puaknak ah a puan a ṭiam man kha a si i cham a hau. Puan zun khat an pek lai.
12.Vokrial-ah
A va nih vok a nung kun, thah cia kun in, a duh tik paoh ah a ni kha Rs. 1-2 he a pek hrimhrim lai (It is given compulsory).
13.Tai nawn man
A hnu ah mah nu le va hna nih an hawile he an i nuamh nak ding caah a si. Mah ni ah asilole a hnu zongah ei le din khawh a si. Mah kong ahhin a ni kha a hnatlaknak hal a hau lai i zuh le hlemh zong a hau lai.
HBC Khuahlun biakinn luhnak magazine chungah hitihin an ṭial. Man phun 8 chungah hin ni lawng hi arsathah a si lo i hi man hi va a ngei cia lawng nih an co phung a si fawn. Niman hi phun 40 a um. Cu hna cu a changchang in;
- Tualkainak Ks. 300
- Tiawk awkpi Ks. 400 asiloah marlei khap 10
- Tiawk awkte Ks. 300 asiloah marlei khap 8
- Ṭhutphah Pher Ks. 50
- Lamvat Namtong Ks. 30
- Hleikainak Ks. 20
- Rei ṭhu (awrhlei) Ks. 50
- Rei ṭhu (kehlei) Ks. 50
- Tiawk hni Kawl hni Ks. 100
- Maimaw puan Ks. 150
- Tiawk hni Maimawi hni khuk tang ṭial Ks. 150
- Puanṭha bil pupuan Ks. 150
- Puanchia bil Ks. 100
- Ruakpuan Maimaw puan Ks. 150 man
- Vokrial ah Vok Ks. 200 man
- Tiawk awkpi a leuh Marlei khap 5 Ks. 50 man
- Tiawk awkte a leuh Marlei khap 3 Ks. 30 man
- Khuang hni Ks. 50 man
- Khang hni Ks. 50 man
- Eih rua puan Ks. 30 man Aih rua puan ti a si kho
- Feih rua puan Ks. 30 man Fenh rua puan ti a si kho
- Cawngnak ca Ks. 50
- Canlo ca Ks. 50
- Tanpok hni Ks. 50 man
- Tanpok kor Ks. 50 man
- Fei ca Ks. 30
- Nam ca Ks. 30
- Bannal Ks. 100 man
- Theisep Ks. 20 manṭhi kha a si.
- Hrangkha Ks. 10 man taikhih a si.
- Hrihrual vel khat Ks. 15 man
- Ṭhi dum le ṭhi rang rual Ks. 20 man
- Khuangtan bor Ks. 10 man
- Cumci Ks. 10 man
- Ṭhi pumṭek fang hnih Ks. 10 man
- Zucuaphor Ks. 25
- Sahrangphor Ks. 25
- Rawlchuang hni Ks. 50 man
- Nuphor Ks. 20
- Hrai Ks. 10
An chap rih mi cu Tualkainak hleikainak man kha an i rem lai i an i rem khawh lo ahcun a vahnu le a mawle rual he tualpar kutka hram ah an ṭhu ko lai. An rem khawh hnu lawngah inn chungah a lut lai i inn chungah a dang cu an i nawl lai.
Hi hna lengah ṭial a herh rih mi cu innka kar man le hnihlim man a um rih. Innka kar man cu a nih nih a va innka a kar man kha a si i Annas 2-5 tiang a si ko.
Cu lengah hnihlim man hi vangeinu kha a va nih, ruah nih a surh bal lomi le ni nih a tlanh bal lomi thlatang a kau, a hlim te lai nak caah a hauh mi a si i a hauh dingmi zeidang mante vialte a lim cikcek hnu ah a ni nih a hauh lai.
Ni hi hi bantuk nu le va an i umh nikhua ah biapi ngaingai a si. Artlaihzulh tikah hmai a sa i a vahnu kha a bante in aa hruai i a va inn ah a kalpi. A lung an tluan lo ahcun i kirpi khawhnak nawl a ngei. Cucaah a si khawh chungin a lung tluanh khawh an i zuam tawn. Hi bantukin inncung an luh hnu ah ṭuanglai ah a ṭhu i zahrai aa put ahcun a duhmi paoh pakhat hnu pakhat a hauh hna lai, capo a sam pah lai, tu chan holh cun social tuahtu bantuk khin, aa batter, a kawng le keng aa father, an dih an nam i capo thiam hna a si ahcun khua a nuamhter ngaite hna.