Pathian Bochan in Teinak
RVA a ngaitu nan dihlak cung ah Bawipa nih thlachuah inpe hna seh. Nihin kan relmi voikhatnak Bible Esther a ngan 4 chungin Esther thlacamnak in thazaang lakṭi kan duh hna. Esther hi a hngakchiat lio tein a nule pa nih an thih tak i a pa unau fa Monikai nih a rak cawm mi asi i, Persia ram chungah a biapi bik mi Israel mi an si. Monikai hi Hasirus siangpahrang inn ah sal pakhat si ve. Nikhat cu siangpahrang nupi Vasti nih siangpahrang nawl kha a rak ngai lo caah siangpahrang nih nupi thar pakhat a rak i thim i cu a thim mi nu cu a hodah asi tiah cun Israel miphun a daw ngai ngai mi nute Esther hi a rak thim.
Siangpahrang innchung ah Hamon an timi pa zong hi nawl a ngei ngai mi pakhat asi i mi nih a hmai ah an kun piak tawnmi asi, an upat ngai mi pakhat asi. Sihmanhsehlaw, Monikai nih hin a kun piak duhlo i, a hmai zah duhlo caah a thinhung ngai i siangpahrang sin ah Israel mi kong he pehtlai in lih bia a va chimh hna. Israel mi hna hi na nawl bia a ngai duhlo mi, miṭha lo an si. An dihlak in thahding an si tiah a va chimh. Cutikah siangpahrang nih a nupi Esther kha Israel mi asi ti kha a hngalh lo caah Hamon nih a chimh mi bia kha a ngai i, a zumh i Israel mi vialte cu zei ni, zei thla ah dah an dihlak in thah si hna seh ti upadi pakhat kha a ser ter hna. Cucu Monikai nih a theih tikah a awlawk a chong ngai. Esther sinah bia a hei cah mi cu ‘siangpahrang sinah valut law kan mah khamh awk ah na va nawl hrimhrim lai’ a ti.
Persia upadi ah cun a mah nih kawh loin siangpahrang kha vakal in ton phung asilo. Sihmahsehlaw, Esther nih ralṭha ngai in thih ah thi ko ning, ka va tong ko lai a ti i siangpahrangpa cu a va luh hnawh tikah siangpahrangpa nih a suibawi fung kha a hler piak i a rak cohlan. A suibawi fung kha a hler piak lo ah cun Esther cu cuni ah cun thah ding asi ko. Asi nain siangpahrangpa nih cun Esther cu a suibawi fung kha a rak hler piak i a rak cohlan ti kha kan hmuh.
Cu tikah Esther nih siangpahrangpa le Hamon kha rawl danghnak puai pakhat ah a sawm hna. Cu puai ah cun siangpahrangpa nih Esther kha ‘zeidah na duh, na duh mi ka hal tuah’ tiah a ti tikah. Esther nih siangpahrang le Hamon cu a ‘thaizing i rawl danghnak puai ah nan rak ṭhan tikah kan chimh te hna lai’ tiah a leh hna. A thaizing rawl danghnak puai ah Esther nih siangpahrang cu ‘keimah le ka miphun cu thah kan si cang lai’ tiah a chimh tikah siangpahrang cu a thinhung tuk i cubantuk thil tuah a ngamh mi cu a hodah asi tiah a ti. Esther nih cun cu mipa cu kan ral miṭhalo pa Hamon hi asi a ti. Khi tikah siangpahrang cu a thin a hung tuk i Hamon nih Israel mi thahawk ah a timhnak, Modikai i thlai awk ah a timh mi kha siangpahrang nih cun Hamon lila hi thah siseh, cu ka ah cun thlai siseh tiah nawl a pek hna i a thah ter hna ti kha kan hmuh khawh mi asi. Cucu zeiruang ah asi ti asi ah cun Esther nih a mah tein bia a khiah hlan ah anung mi Pathian kha bochan in a miphun hna le an mah he rawlulh thlacamnak an tuah caah teinak an hmuh mi asi ti hi nihin kan relmi Bible chung ah kan hmuh kawh mi asi.
Samhla chungah “kan auh tikah na ka leh” timi Siangpahrang David lung lawmh thlacamnak kha kan hmuh khawh rih. Gospel chung zongah “hal ulaw pek nan si lai, kawl ulaw nan hmuh lai, king ulaw innka hawn piak nan si lai” a ti bangin siseh, (Jeremiah 33:3) chungah “nan ka auh ah cun kan leh hna lai” tiah kan hmuh mi bantuk in, thihah thi ko ning tiah siangpahrang nu Esther nih ralṭha ngai in siangpahrang sinah rawlulh thlacamnak an tuah dihhnu ah a lut hnawh tikah siangpahrang nih mithmai ṭha a pek i Israel miphun vialte hna luatnak a pek hna tikha kan hmuh khawh mi asi.
Cucaah Khrih ah dawtmi u le nau hna “tatsa, thinlung, thlarau” ral phun zakip chung in kan luat i teinak kan hmuh khawhnak hnga dingah hin toidornak, lungrual nak le ral ṭhatnak he Esther bantuk in kan miphun, kan ram caah pumpak in zumhnak le Pathian bochan nak he thla kan cam cio asi ah cun Bawipa nih teinak, luatnak a kan pek hrimhrim lai tihi nihin ah thazaang pek kan duhhna. A ngai tu nan dihlak cungah Bawipa nih thlachuah inpe hna seh. Amen