Nawl ngaihnak in Nunnak lei ah

Nihin ni caah Bupi nih a kan thim piakmi Bible Cathiang hna cu (Jonah 3:1-10, Luke 11:29-32) an si. (Jonah 3:1-3) “Bawipa bia cu Jonah sinah a voihnih nak a phaan ṭhan i Nineveh khualipi ah cun va kal cang law kan chimhmi bia cu va thanh tuah hna,” tiah a ti. Cucaah Jonah cu aa tim i Bawipa nih a chimh bangin Nineveh khua ah cun a kal.”

Dawtmi u le nau hna, Kan Bawipa Pathian nih avoi(2)nak chance hi a kan pek zungzal ko timi hi Jonah chungin kan hmuh khawh mi a si. Nineveh khua mi hna sinah Jonah kha Bawipa nih a thlah tikah Jonah cu kal ngam loin LAM DANG, RAM DANG lei a kal tikah Jonah harsatnak a tong. Sihmanhsehlaw, Bawipa nih Jonah cu ngapi chungin a khamh ṭhan i Nineveh khua lei a kal tikah, Bawipa nih Nineveh khua mi hna ralrin bia a thanh tikah, cu khuami hna zong cu Siangpahrang a ngan bik in a hme bik tiang ngaihchih nak an ngei ṭhan i tuahsernak he an i ngaihchihnak kha an langhter ṭhan tikah Bawipa a lung aa thleng ṭhan. Bawipa nih an sualnak a ngaihthiam hna timi kha a voi(1)nak Bible chungin kan hmuh khawh mi a si. 

Dawtmi u le nau hna nang le kei zong kan palh caan tampi a um ko lai. Nihin ni tiang Bawipa zangfahnak thawngin kan nung rih, kan kal kho rih, kan theih khawh rih, kan hmu kho rih. Pathian thluachuah a si, Bawipa thluachuah a si. Caanṭha a kan pek rih. Bawipa nih Amah lei ah i mer ṭhan u sih law, Amah Bia kha ngaih in a hnu zulh dingah kan nih hna kha caanṭha a kan pek ko rih timi kha pakhat nak ah langhter ka duh.  

Pahnih nak ah, (Lk 11:29) Mi nih Jesuh kha an zual lulh ko lioah khan a thawh hna i, “Tuchan mi hi miṭhalo an va si hringhran dah. Pathian hnatlaknak a si ti hngalhnak caah khuaruahhar kan hmuhsak tuah,” an ti.

Mi tampi nih, mi bupi ruahning, hmuh ning, chimmi hna kha tuaktaan satsai loin zulh kan hmang tawn. Jonah nih amah ruahnak zulh in Bawipa bia kha a hlawt tikah harsatnak a ton. Sihmahsehlaw, amah duhnak kha zulh ti loin, Pathian nih a fial mi khua le ram ah va kal in mi hna sinah thawng a thanh tikah thluachuah tampi a um timi kha kan hmuh. 

Nihin ni zongah mi tampi nih mi bupi kha zulh kan hmang tawn. Thil chia maw thil ṭha maw a si tiah hlat satsai loin, a dik maw a si a hmaan maw a si timi ruat tuk loin mi bupi nih an ruahmi an chimmi kha kan nih nih zumh in zulh kan hmang tawn. 

Kan Bawipa Jesuh Khrih kha biaknak lei hruaitu hna nih sual a phunphun an phawt tikah “Amah nih Pathian Fapa ka si a ti” tiin sual an puh tikah, thil dik lo lam an zulh tikah palhnak tampi an rak tuah. Jesuh cu thihnak tiangin a rak tong. 

Nang le kei zong Bawipa nih chang အခွင့်အရေး avoi(2)nak a kan pek lio caan te ah hin “Kanmah ruangah mi ṭha hna zeitik hmanh ah harsatnak tong hna hlah seh” tiin i ralring thiam hna u sih. ‘Bawipa nih zeidah tuah hna seh ti a kan duh timi thiehthiam, hngalh thiam in mi bupi chimmi hna kha zulh sawh loin, Bawipa nih zeidah a tuah duhmi a si, Bawipa cu thil ṭha, thildik, thil hmaan tuah a duhmi a si’ timi hngalh in Khrihfa kan sinak ah Bupi cawnpiaknak siseh, Bawipa cawnpiaknak a Cathiang in siseh, kannih vialte hna nih nun khawh i zuam hna u sih. 

Hi ulh-caan ah dai tein Pathian he i pehtlaihnak, biachim ṭinak caanṭha kawl zungzal hna u sih. Mi bupi kan zulh sawh ko a si ahcun palhnak a si. Thihnak ah kan phaan sual lai. Bawipa bia, Pathian bia kha kan ngaih a si ahcun Nineveh khua mi hna thluachuah an hmuh bantukin kannih hna zong khamh kan si ve ko lai. 

RVA a ngaitu nan dihlak in Bawipa nih thluachuah in pe ko hna seh. Amen