Dawtu kan pa sin ah kir cang usih

Tutan i ulhcan zerhkhatnak chungah nihin ni i kan nu Bupi nih Pathian bia Gospal chungah a kan tar piak mi chung in kan rel hna lai. (Mt 25:31-40) tiang asi i. Cu chungah kan hmuh mi cu miphun hna bia ceihnak ti asi. Tutan ah kan zapi tein thazaang i lak ṭi dingah biatlang tar i ka duhmi cu “Dawtu kan pa sin ah kir cang usih” timi tlangtar asi lai.

A pakhatnak: Hika chung i bia ceihnak kong he pehtlai in kan zoh tik ah hin, ‘Kan Bawipa Jesuh Khrih nih hma nung bik ni ah zeitindah vawlei mi vialte hi bia a kan ceih lai’ timi kong kha fiang tein a kan cawnpiak. Hika kan zohtikah hin, ni nikhat ah kan Bawipa Jesuh Khrih nih vawlei cung mi vialte bia a kan ceih tikah zeitin dah bia a kan ceih lai timi khong kha kan hmuh. Biadang kan chim ah cun, biahal nak a kan tuah tikah a mah nih a kan hal dingmi a meekhun kha a kan chimh cia. Caameepuai kan phit tikah hin a ho saya hmanh nih camepuai a raa dingkha siahngakchia hi chimh a rak si bel lo. Na ten zeiruang ah dah kan Bawipa Jesuh Khrih nih bia ceih ni ah biahalnak a kan tuah hnga dingmi meekhun hi a kan chimh timi hi kan zohtikah hin Bawipa hi a kan dawttuk hringhran ko timi kha hmuhkhawh asi. A ruang cu sung hna hlah seh, caameepuai an phit tikah sung hna hlahseh tikha a duh caah bia hal hna hi ကြိုတင် tein khan a kan chimhnak asi timi te zongkha kan hmuhkhawh. Cun kan Bawipa Jesuh Khrih nih cu bia ceihnak ni teah cun a awrhlei um mi pawl hna kha a thawh hna i “nan nih ka pa nih thlachuah an pek mi hna ra tuah uh. Vawlei ser rih in ka pa nih nan caah i a timhmi thluachuah cu rak co tuah uh” a ti. Cun a kehlei i a um mi pawl kha “nan nih ka pa nih chiat a serh mi hna” a timi kha kan theih. Ni hin zumtu nang le kei Bawipa nih zungzal nunnak kan hmuhkhawh nak ding caah hin a fa pa ngeih chun te a kan pek i cu a fa pa a zummi paoh cu zungzal nunnak an ngei lai tiah Bible nih fiangtein tiah a kan cawnpiak. Khatlei ah kan zoh ṭhan tikah nan pu nan pa hna nih Maryba lungfak in an um bantuk khan um hlah uh a kan ti. Tucaan i ulhcaan chungah khan kan nu Bupi nih a hleikhun in thlacamding, ṭhatnak tuahding, thlarau lei ah thachuh ding kha a kan sawm mi cu asi. Hi ulh can chung zong hin kan nih vialte zong nih cu a nunnak in a kan tlanh tu kan pa sin ah hin biatak tein kir hna u suh law cuticun kan nunnak hi man ngei tein nun a hmang mi fa nu fa pa kan si lai i Bawipa sunpar nak hi a lang ko lai tiin chim ka duh. 

A pahnihnak: Hika pakhat nak timi te (2:3) chungah zeitin dah kan hmuh tiah cun, Pathian nih mi vialte nih khamhnak hmu hna seh timi hi Pathian nih a duh a ti. Cucaah cun mi vialte nih khamhnak kan hmuh khawh nak ding caah a herh bik mi pakhat cu zeidah asi tiah cun sual ngeihchihnak asi. Sual ngeihchihnak kan ngeih i kan sual kan palhnak vialte kha kal tak in Pathian sin ah kan kir i Pathian sin ah kan panh ah cun cucu mipiangthar ti mi nunnak thar timi cu asi. Sual ngeihchih timi cu biadang kan chim ah cun sualnak kal tak khi asi, sualnak mer tak khi asi. Ahlan i zumhtlak lo kan rak sinak kha kal tak i Pathian sin ah zumhtlak te um kha Pathian nih a kan duhmi cu asi. Thla kan rak cam bel lo mi kha thla a cam mi Khrihfa siding ah Bawipa nih a kan sawm mi cu asi. 

A pathumnak: (1 Korin 6:16) chungah khan nannih cu nan mah ta nan si lo amah cawk mi nan si. Nan pum cu Pathian sunparnak caah hmang uh a kan ti. Nang le kei hi kan mah ta kan si lo. Pathian hrimhrim nih a Fapa ngeih chun a thisen in a kan cawk mi thisen man kan si. Cu thisen man kan sinak kha fawi le bai tein vawlei pumsa duhnak, Satan duhnak, pakpalawng men ah a hmangmi siloin kan nunnak kan zeizong vialte hi Bawipa sunpar lian ngannak a pe kho tu fanu/fapa ṭha kan si khawh nak caah zong hin nihin can ah sawm kan duh hna. 

Cun a donghnakbik te ah chim ka duhmi cu ‘hi tluk in a ngan mi Pathian khamhnak hi zeiah kan rel lo ah cun Pathian daantatnak cu kan cungah a tlunglai’ timi kha Mithiang Pual nih ralrin a kan pek. Cucaah cun Bawipa nih a kan dawt i nifa tin kan nunnak ah a dawtnak he lam a kan hruai i kan cawl canghnak vialte Bawipa dawtnak thei bu tein sual palhnak vialte, vawlei taksa duhnak vialte, vawlei sunparnak vialte kal tak in a vailamtah put in a mah hnu a zul kho mi kan si i cuticun kan pumsa in siseh, kan nunnak in siseh, kan hmurka in siseh Bawipa i a kan dawtnak a kan khamhnak, Pathian nih kan cungah a ṭhatnak kha mi vialte hmai ah tatte a khan kho tu fanu fapa ṭha kan si khawhnak ding caah sawm kan duh hna. Cun hi vial te kan ti khawhnak ding caah a kan dawtu nunnak a kan petu Pathian sinah kir usih law kan nunnak in, kan pumsa in Bawipa hi sunparnak a pe kho mi zumtu ṭha kan sinak khawh nak caah thlacamnak pek chanh hna usih timi te kha nihin caan ah Pathian bia thazaang i lak ṭi dingah chim ka duhmi si. A ngai tu kandihlak cungah Bawipa nih thlachhuahnak kan pehram ko seh. Amen…