PATHIAN BIAPHUAN CHANHCHINNAK LE PHUNGBIA LE CATHIANG I PEHTLAIHNAK

Pathian biaphuan chanhchinnak

Pathian nih, Minung vialte hi khamh si hna seh law biatak kha hngal dih hna seh ti a duh. (1Tim 2:4). Cu biatak cu Khrih Jesuh kong kha a si (Jn 14:6). Khrih kong cu vawlei cung miphun vialte le mi vialte sinah chim dih awk a si i cuticun Pathian biaphuan cu van hramdeng tiang a phan lai (2Cor 1:20, 3:16, 4:6).

Khrih kan Bawipa chungah Pathian biaphuan vialte a tling dih. Khrih nih Lamkaltu hna kha Thawngṭha nih hin Pathian laksawng hna kha mi vialte cungah an pek hna. Mah thawngṭha hi khamhnak biatak le ziaza cawnpiaknak hrampi ah a hung cang. (Mt 28:19-20, Mk 16:15).

Lamkaltu hna kha phungchim awkah Bawipa nih a fial hna. Nawl a pek hna bantuk in Thawngṭha bia cu kaa in cawnpiaknak le ca in ṭialnak, tiin phunhnih in an rak i chanchin. Lamkaltu hna nih Khrih hmurkaa in siseh, a nunnak le a rianṭuannak in siseh, asiloah Thiang Thlarau hruainak in siseh an hmuh an cohlan mi kha, an phung chimnak, an ziaza le an tuahsernak hna khan chankhat hnu chankhat an ni chanchin. Lamkaltu hna he aa kawmmi midang hna nih Thlarau thaw khumhnak in khamhnak thawngṭha kha ca in an ṭial.

A tling i a nungmi Thawngṭha kha Bupi chungah him tein fimhlawm awk caah lamkaltu hna nih bishop hna kha anmah rianchangtu ah an chiahtak hna. Cawnpiaknak nawl an hmuhmi kha an pektak hna. Lamkaltu hna he pehtlaih thliahmahnak ngeih in cawnpiakmi vialte kha caan a dongh tiang him tein zohkhenh awk le kilven awk a rak si.

Thiang Thlarau hruainak thawngin ca le bia ah tling tein i chanhchinmi hi Phungbia (Tradition) tiah auh a si. Phungbia cu cathiang he a dang nain cathiang he an i pehtlai. Phungbia in Bupi cawnpiaknak, nunnak, biaknak le sining vialte cu a zummi techin fapar chankip cungah chanhchin lengmang a si. A thiangmi Khrihfa pupa hna chimrel mi bia cu cawnpiaknak a nunnak petu ah a cang. Khrihfa Bupi tuahsernak le nunnak, zumhnak le thlacamnak kha a kauhter i a rum ter. Thlarau ah phuanmi vialte kha Bupi chungah a um zungzal i a nung zungzal ko. Hlan liopi ah bia a rak chimtu Pathian nih a dawt a Fapa i a lengnu (a Bupi) kha bia a chimh zungzal. Bupi chungah a nungmi Thawngṭhabia aw kha a rin tertu Thiang Thlarau nih Bupi thawngin vawlei cungah a zummi vialte hna kha biatak tlinnak ah a hruai hna i an chungah Khrih bia in a rummi ah a ser hna. (Cf. Col 3:16).

Phungbia le Cathiang i pehtlaihnak

Hrawm pakhat…

A thiangmi Phungbia le Cathiang hi i naih tein pehtlaihnak an ngei. Zeicahtiah an pahnih in tiput pakhat in an chuak i thil pakhat kha canter awkah hmunkhat tein an ra i tinhmi kawltung pakhat leiah an hoih. Anmah an sining in “vawlei a dongh tiang a zungzal” umpi awk bia a kami Khrih biathuk kha Bupi chungah an um ter, thei an tlai ter. (Mt 28:20).

An i dannak…

Bible cathiang cu Pathian nih a chimmi kha Thiang Thlarau thaw khumhnak in ṭialmi a si. Phungbia nih Bawi Jesuh Khrih le Thiang Thlarau nih nih Lamkaltu hna sinah a ap-takmi Pathian bia kha a dihlak in a chanhchin. Phungbia nih Pathian bia kha Lamkaltu hna chungtu hna sinah a chanhchin i cu cu Biatak kilven le a sullam peknak thawngin him tein zohkhenh kilven le a sullam purh in vawlei cung dihlak cawnpiak chin awkah a hmuhak.

Cucaah Pathian biaphuan kha phuanchin awk le a sullam phuan awkah tavuan pek a simi Bupi nih a phuanmi Biatak vialte kha Bible Thiang lawnglawng in a la lo. Bible le Phungbia an pahnih in pawm le cohlan in upat awk a si.