Sual ngiahchihnak a duh mi Pathian a si

Nihin Thawngṭhabia kan relmi Luke 5:27-32 chungin ruat ṭi hna u sih. Kei te hna hi Pathian nih a ka daw kho hnga maw tiin na ruah caan tampi a um ko lai. Kan pawngkam ah hin dawtu tampi an um bantukin huatu tampi zong an um ve. Zeitik caan paoh a kan daw zungzal tu cu kan biakmi kan Pathian a si timi kha philh hlah u sih. 

Adam le Eve sualnak an tuah hlaan ah siseh, an tuah hnu zongah siseh Bawipa nih a dawt zungzal ko hna timi kha (Gen 3: 9-21) ah kan hmuh. “Maw Adam khuazei ah dah na um a ti i a kawl hna” timi kha na theih tikah na khuaruah a har maw? Adam cu Pathian sinin aa thup. Zeicah tiah cun sualnak a tuah caah a si. Sihmanhsehlaw Pathian nih a sualnak ningzahnak kha a khuh piak ko. Mah nih hin a kan cawnpiak duhmi cu Pathian nih a kan dawt ṭhiamṭhiam ko timi kha a si. Adam a sual hnu zongah a hnu in a zulh peng i saphaw thil a tuah piak ko timi kha kan hmuh. Nang le kei zong mi sual kan si ko nain a kan dawt ṭhiamṭhiam ko. Keimah bantuk misual hi a ka daw kho hnga maw tiin ruat hlah! An dawt khawh tuk. Zeibantuk nunzia ṭhalo sihmanhsehlaw a biapi ah a chia lo. 

Nihin Thawngṭhabia kan relmi chungah, Jesuh cu misual mi hna he rawl an ei ṭi timi kan hmuh. Jesuh nih a thawh hna i, “A dam mi nih siibawi an herh lo. A zawmi lawnglawng nih an herh. Sualnak ka ngei lo tiah aa ruat mi hna kha i ngaihchih u ti awk ah ka ra lo. Mi sual mi tu kha i ngaihchih u tiin kawh awk ah ka ra,” tiah a ti. (Ezakiel 33:11) chung zong ah “Mi ṭhalo mi an thih cu ka duh mi a si lo. Mi ṭhalo mi nih an ziaza ṭhalo mi kha an ṭhinh i an nun kha ka duh deuh. Nan ziaza ṭhalo kha hlaw hna u” tiah a ti. 

Pathian nih sualnak cu a huat tuk. Sihmanhsehlaw, sual ngaihchih a duhmi Pathian a si timi kha (2Samuel 11: 1-5, 12: 1-13) chung zong ah zei dah kan hmuh? David le Bethsiba kong kha kan hmuh. David nih a Uriah kha a thah i a nupi kha a laak. Cuticun David nih sualnak nganpi a tuah. David nih a tuah mi sualnak cu a theih a hngalh tikah “Sual ngaihchihnak lungthin a ngei ṭhan” i, cutikah Profet Nathan sinah a kal i “Bawipa cungah ka sual cang” tiah a ti. Nathan nih David cu “Bawipa nih na sualnak kha an ngaihthiam cang, na thi lai lo” a ti. 

(Jonah 3:1-10) “Sualnak in a khat mi Neineveh khuahlipi ah Bawipa nih Profet Jonah kha a thlah. Neineveh khua pi cu hi hnu ni 40 chungah a rawk lai tiah a au. Neineveh Siangpahrang nih a theih tikah a bawi ṭhutdan chung khan a tho i a puan kha aa phoih i buri kha a aih i vutcam lak ah a ṭhu i thawngthanhnak a tuah. Cu thawngthanhnak cu a ram chung dihlak, a mi dihlak ahohmanh rawl nan ei lai lo, ahohmanh nan dihlak in buri nan i aih lai i Pathian sinah biatak tein thla nan cam cio lai. Nan ziaza ṭhalo hna kha nan hlawt hna lai. Pathian cu aa ngaihchih ko hnga. Kannih cu thi loin kan hnga” tiah a ti. Pathian nih an sual ngaihchih mi a hmuh tikah ‘ka tlunter lai tiah a timi ṭhat lonak kha a tlunter ṭhan lo’ timi kha kan hmuh khawh. 

Nihin Thawngṭhabia chungin, David le Pathian, Neineveh le Pathian remnak, hawikomhnak an hmuhnak cu ‘sual ngaihchihnak in a si’ timi kha kan hmuh. Mithiang Paul zong nih ‘Sualnak cu Pathian he a kan ṭhentertu tiva pakhat bantuk a si i sual ngaihchihnak cu Pathian he i rem ṭhannak a si’ tiah a ti. 

Jesuh cu misual mi kan caah hawikom ṭhabik a si.