Pope Leo nih harnak a tongmi tlangbawi mino hna cu an thazaang dernak i hrawm dingin thazaang a pek hna
Pope Leo XIV nih tlangbawi (mino) hna cu an riantuannak a theipar an hmuh colh lo hmanh ah lungtho tein Bawipa rian ṭuan peng ding le an harsatnak hna zong kha tlangbawi dang sin ah chim ding in thazaang a pek hna.
“Nan sining kha nanmah le nanmah i khar khumh hlah u tiah forh kan duh hna. A kan bawmh khawh lia tiah nan zumhmi tlangbawi hna sinah nan thazaang dernak le nan harnak kong hna kha chim ding ṭih hlah u,” tiah pope nih Rome Diocese tlangbawi pawl he tonnak an ngeih lio Feb. 19 ni ah a chim.
Vatican i Paul VI Hall ah tonnak an ngeih lio ah, Pope nih Rome tlangbawi pawl kha an riantuannak ah sersiam khawhnak ngan deuh ngeih ding le rianṭuan loin um lo dingin forh fialnak zong a chim.
Cun tlangbawi hna cu ‘Thawngṭha phuannak tharchuah ding, hmunkhat te ah riantuan ti ding le mino hna he naihniam tein um ding’ zong a forhfial hna.
Mino tlangbawi pawl kha a bik in bia a chimh hna tikah, Pope nih “an chan le tu chan i an thilti khawhnak le an harnak hna hi mah le chan sining cio in ton a si tawn ko” tiah a ti hna.
“A har deuhnak hmun le hlawknak a tlawm deuhnak hmun ah mah lawngin um a si tikah, lungdonghnak le thazaang zor-dihnak a um tawn. Bawipa he nan i pehtlaihnak ah nifatin zumhtlak tein um ding, cun atu lio caan ah nan rianṭuannak theipar nan hmuh lo hmanh ah lungtho tein riantuan khawh zungzal ding in kan forh ko hna,” tiah a chimchap.
Pope nih tlangbawi vialte sinah ruahnak a pekmi hna cu ‘a hleiin thazaang dernak, lungdonghnak, asiloah thlarau le ziaza lei tlaknak an ton tikah, Bawipa caah rian an tuannak, an lungthawhnak mei kha alh-ter ṭhan ding’ timi hna a si.
Thawngṭha chimnak kha biapi ngai in chiah ṭhan ding
Tlangbawi rian an ṭuannak ah lungthawhnak ngeih khawh ṭhannak hnga caah Pope nih “Thawngṭha kha a thar in thanh le chim phuan” ṭhan a herhnak le a hleiin Khrihfa hramthawknak le thawngṭha chimnak karlak pehtlaihnak a um nak kha a chim.
‘Sacrament hna kong lawng chim a za lo’ tiah a ti. “Khrihfa bu zohkhenh hruainak ah mi hna le Jesuh pehtlaihnak an ngeih ṭhan khawhnak hnga caah lam kawl thar kawl in Thawngṭha chim ding a herh” tiah a ti.
Pope nih Khrihfa hramthawknak cu zohfel ṭhan a hau tiah a chim i “ngakchia, mino le chungkhar hna kha phu chungah, lam thar in telter khawh i zuam ding, cun tuahkel phung leng hmanh in an zumhnak karhternak ding lam dangdang kha kawl piak ding a si” tiah a ti.
Pope nih cun a diocese chungum tlangbawi hna kha hmunkhat ah riantuan ṭi dingin ruahnak a pek hna. ‘Mah lawng um le mah thil ti khawhnak lawngah zumhnak ngeih’ timi tukforhnak kha hrial ding, cun pawngkam um parish dang hna karlak zongah pakhat le pakhat i bawmhnak ngan deuh ser ding in ruahnak zong a pek hna.
Mino pawl cohlaan ding
Pope nih mino hna nih an tonmi harnak kong he pehtlai in, Rome tlangbawi hna kha “mino hna nih an tonmi lungretheihnak, harsatnak, cun lenglei (vawlei) thil sining nih a chuahter mi lungretheihnak an ton mi” hna kha hngalh piak thiam dingin a sawm hna. Zeicah tiah cun ‘cu thil sining hna nih thahnawnnak a chuahter’ tiah a ti.
Cun mino hna kha lam onh in cohlaan – don hna ding, “an nunnak theih piak thiam ding,” le mipi he biaruahnak zong ngeih dingin a sawm hna.
A donghnak ah, Pope nih tlangbawi no bik pawl sinah biapi deuh in bia a chim. Pope nih mino deuh tlangbawi pawl nih an tonmi harnak hna kha a hngalh caah, “hmunhma har deuhnak um mi tlangbawi hna, an mah lawng an um tikah lungdonhnak le thazaang zornak ṭihnung nih a tlunh deuh hna” tiah ralrin nak zong a pek hna.