Bawipa nih a Duhmi Rawl-ulh nak
Feb 20, 2026 nihin ni caan i thawng`ha rel dingin Bupi nih a kan pek mi (Mt 9:14-15) Khi hnu ah tipil petu Johan zultu pawl kha Jesuh sinah cun an ra i, “Zeicahdah kan nih le Farasi mi hna cu atu le a tu rawl kan ul i nang na zultu hna cu an ulh kun lo,” tiah an hal. Jesuh nih cun, “Nupi `hit rawl danghnak puai ah, nupi `hitu a um chungah cun zeitindah an sawmmi hna cu ngaihchia in an um lai? Sihmanhsehlaw nipi `hitu an sinin aa `hen caan kha a phan ve te lai i cu tikah cun rawl cu an ul te ko lai.” Khrih thawng`ha bia asi.
Duh dawtmi ule nau nu le pa hna rawl ulhnak timi le thlacamnak timi cu `hen khawh lo asi i rawl kan ulh tik ah thlakancam peng. Kan rawl ulh mi zong sullam a ngei i hmual a ngei i Pathian thinlung a khen mi rawl ulh thlacamnak asi hnga ding caah kan thinlung put kha tampi kan i siam, remh a hauhnak ding kha nihin relding in Bupi nih a kan pekmi (Isaiah 58:4) chungah a kan ti mi cu “Rawl nan ulh pah ah pei nan mah duhnak kha nan kemhchih peng cu, nan puar nan hrang i, nan i sii nan i vel lengmang. Cu bantuk rawl ulhnak nih cun ka thinlung a ka tongh lai tiah nan ruat maw? Nan thlacamnak kha kan leh hnai lai tiah nan ruat maw?” tiah Isaiah hmurka in fiangte in a chimchung cia cang. Asiah cun Bawipa duhmi rawl ulhnak cu zeidah asi?
Relnak (6-7) ah, Pakhat nak hremnak citcin kha chat hna uh tiah a ti. Bawi pawl nih an ngeih mi sal cung i hremnak a ngeih mi vialte hna kha dawtnak in, zawnruah nak in zoh khenh kha Bawipa a duhmi asi.
A pahnihnak ah dinlonak hnawngkual kha phoih hna u law a ti. Zei rian`uan dah kan si? Kanmah le kan `uanvo cio ah hin tah, zumtu kan si nak ah hin tah kan ngeih mi kan rian vialte hna hi dinlonak in kan `uanmaw? Na `uanmi rian ah dingfel tein a si maw? Na `uannak na rian ah lungthiang te le Pathian cohlan mi dotla asi mi thinlung put te, diriam tein a `uanmi na si maw? Siloah hrawkhrawl le rawnrawl in maw na rian hi na `uanpeng?
A pathum nak ah rawl a tammi rawl va hrawm hna u law a kan ti. Atu kan can kan ram a buai, a har bantuk in kan pawng kam ah rawltam ti hal tampi an um. Cucaah kan sikhawh tawk pek `enh ding le kan rawl hrawmding kha Bawipa nih a kan duhsak. A pali nak ah inn ngei lo misifak hna kha tlunh inn va onh hna u law a ti. Ralzam mi tampi kan pawngah an um. Kan sikhawh tawk tein ralzam pawl le misifak inn ngei lo pawl tlunh-inn onh ding kha Bawipa nih a kan duhsak ngai ngai.
A panga nak ah rawl ei awk a ngei lo mi misifak pawl hna kha thilpuan va `hen hna uh a ti. Atu ah kan ram boruak ruangah hnipuan fenhaih awk ngei lo in, ralzam in a har nu/ a har pa, hmui nu/ hmui pa tampi nunnak cuh in a tli zam mi lak ah, nang thilpuan zeitluk dah na ngeih? Na ngaih mi chungin tah zeitluk a hodah Pathian mi fa hna kha na `henh ve cang hna?
A paruk nak ah nasahlawh hna le na rualchan hna kha vabawm hna law a kan ti. Unau lak ah bochan mi kan sikhawh tawk tein kan ruahnak maw kan thazaang in maw siloah thil`ha tuahpiak in maw asiloah thlazaacam piak in maw kan unau kan i rualchan hna kha kan bawmhding kan Bawipa nih a kan duh piak mi asi. Cucu bawipa i a duhmi rawlulh nak ati mi cu asi.
Zeihmanh lo kan si misual kan sinak kha nihin relmi Bible (Psalm 51:1,3) ‘ka palhnak cu ka hngalh zungzal i ka sualnak cu kaa thei zungzal ati. Mitlam tling lo cio kan si,’ Sihmanhsehlaw misual kan si timi kha i thiehthiam in, mi`ha ka si, mifim ka si timi thinlung put hna kha, Bawipa nih a duh lo mi asi bantuk in misual kan si i sualcia in hrin kan si kha i hngalh in kan mah bantuk mi tlamtling lo hna sinah khan ,mizawn ruahnak ngeih ding kha cucu Bawipa nih a kan duhsak mi asi.
Mathai thawng`ha 17 chungah “Rawlulhnak le thacamnak lawnglawng in hiti bantukin khuchia nih a tuahmi hna cu a `hawl khawh, thil dang nih a `hawl kho lo.” tiah a ti bantuk in cu bantuk thinlung put ngeih bu tein ziaza i siam remh in; rawl ulhnak cu Bawipa hna a phan i Bawipa thinlung a khen mi rawl ulhnak asi bantuk in; dawtmi ule nau nu le pa hna, rawl ei lo lawng kha siloin rawl ulh pah bu ah hmuka i sum in nun ziaza i sum in taksa duhnak vialte i sum in Pathian min sunparnak ah kan hmurka le kan ruahnak kan thazaang kha hmang hna uhsih ti kha sawm kan duh hna.
Kan chim kan rel mi vialte kan biak kan Pathian nih thlachuah kan pe hram ko seh. Amen