Pope Leo: Lenten vutcam nih a langhter mi cu ‘a kang cuahmahmi vawlei thilrihnak’ kha a si

Pope Leo XIV nih Feb. 18 ah Rome’s Aventine tlang ah phungning tein Ash Wednesday pumhnak a tuah pi hna. Siangbawi le zumtu hna he Santa Sabina Basilica ah cun a kal i cuka ahcun Lent thawknak hmelchunhnak Vutcam puai Missa a tuah.

Zumtu hna lu cung ah Vutcam in hmelchunhnak tuahmi sullam kong he pehtlai in, Pope Leo nih 1966 kum St. Paul VI nih a rak tuahmi Pathian bia cawnnak in a thawk. Hi vutcam puai nih a langhter mi cu “a fak hringhranmi le a hleikhunmi ngaihchihnak” caan a si hlei ah, “Biatak a simi cawnpiaknak a si” tiah a ti. “Hi tuahser nak nih chanthar lungput le hlennak hmangin nunnak hna kha a zorter khawh” a ti.

“Nihin ah, Pathian bia nih a chimchung mi hna zong kha hngalh khawh tthan a si. Zeicahtiah hi vutcam chungah hin a kang mi vawlei, ral nih a hrawhmi khuapi dihlak an rihnak zong kha kan hmuh khawh,” tiah Leo nih a chim.

Rawhralnak cu hi vutcam ah a lang.  Cun“international law le dinnak(justice) vutcam,” “thilnung vialte hna le i tluk-khah, remdaihnak vutcam,” “thil ttha lei in ruahdamh thiamnak le hlanlio mi hna fimnak vutcam,” le “sermi thil vialte hna chung i a ummi a thiangmi ruahnak vutcam” hna ah a lang tiah a ti.

Phungchimnak ah, Pope nih “i hawikomhnak, i fonhnak hna har hmanhsehlaw, Lent chungah Khrihfa mi hna nih a hmaanmi zatlangbu pakhat in tharchuah caan a si” tiah ruah dingin forh fialnak zong a chim.

Sualnak kong he pehtlai in Pope nih, “Sualnak timi cu pumpak thimnak le sining ah pehtlaihnak a um zungzal. Cun a caan ah cun sipuazi, nunphung, ramkhel lei le biaknak lei thil sining hmanh ah pehtlaihnak a um tawn” tiah a ti. “Pathian tak a si lomi hna kha doh-hlawt in, Exodus –  khualtlawnnak thar he nunzia i thawk tthan ding in Khrihfa mi hna cu auh kan si” tiah a ti. 

Mino hna he pehtlai in “Mino pawl nih dingfel tein nun khawh kan si ko timi kha fiang tein nan theih bantukin, bupi chungah siseh, hi vawlei cungah siseh, pumpak sual ruangah a chuakmi theipar cungah ttavuan laknak, inngam ding kong zong nan theih ko. Khrifabu chung le vawleicung zongah thil diklo tuahmi hna caah biaceihnak a um awk a si,” tiah a ti. Ulhcaan-Lent nih a cawnpiakmi ‘a hmaanmi le a ding mi lam ah nun tthan dingin’ forh fialnak zong a tuah.

Kum fatin Santa Sabina biakinn in rak thawkmi Lent caan cu hlaan Khrihfa(Roman) phunglam a si nak kha Pope nih chimh fiannak zong a tuah. “Hlaanlio Khrihfa hna phunglam ‘Lenten stationes’ cu nihin ah hin thawk hmasa bik a si. Hi tuahsernak zong cu a chanchan cawnpiak nak a si” tiah a ti. Rome Basilica hna cu Pathian caah nunnak pe tu mithiang hna (martar hna) philh lonak caah Rome khua chungah sak mi a si. Cun vailam hnu zulh caan, hmunkhat hnu hmun khat i tthial, i dinhnak hna zong hi vawlei cung khual tlawngmi kan si nak hna kha theihternak a si.