Nan Nunnak hnga Nunnak kha i Thim Tuah U!

Bawi Khrih ah dawtmi ule nau nu le pa hna nan dihlak cungah Bawipa nih daihnak, damnak, hnga ngamnak in pe cio ko hna seh tiah thla kan cam piak hna. 

Nihin kan nu Bupi nih a kan thimpiak mi voikhat nak Bible chungin thazaang lak `ii ka duh mi hna cu (Deutronomy 30:19-20) tiang asi lai. “Nan nih hmai ah nunnak le thihnak, thluachuahnak le chiatserhnak ka chiah kha a hngal tu ah tihih ah van le vawlei kha ka khawh hna. Cucaah nunnak kha i thim tuah uh nan mah le nan tefa hna nan nunnak hnga Bawipa nan Pathian kha daw u law a aw kha ngai tuah uh. Amah lei ah i bet tuah uh. Zeitin tiah mah cucu nannih cah nunnak le nunsau nak a si. Bawipa nih nan pupa Aabraham, Isak le cikap sin ah pek awk in chiat a serh mi ram chungah khan nan um nak hnga nunnak kha i thim deuh uh” tiah ati. Bawipa bia asi.

            Nannunnak hnga nunnak kha i thim tuah uh ti mi tlangtar in ruah `i kan duh hna. Pathian nih a mah mui keng in a ser mi minung Adam sinah thimnak nawl a pek mi chungin Adam le Eve nih Edan dum chungah zeidah an rak i thim? Pathian nih an nih hmai ah nunnak le thihnak, thlachuahnak le chiatserhnak a rak chiah i, annih nih thimnak an palh caah sermi minung vialte Pathian hmai ah misual ah kan cang dih ti kha pakhat nak ah chimh kan duh hna. 

Pahnih nak ah Pathian nih a thim mi Isreal mi hna kha a mah nawlbia a pek hna tikah cu nawlbia chungah nawlbia (10) i a hmasa bik nawlbia cu zeidah asi i zumhawk tlak Isreal mi hna nih mah nawlbia ngaih awk ah zeitindah an rak i thim timi ruah `i kan duh hna. Pathian nih keimah cu “Bawipa nan Pathian Egypt ram sal sinak chungin an chuah pi tu kha ka si” tiah Isreal mi kha a ti hna. (Deutromony 5:6) chungah kan hmuh khawh mi asi. (BC 1513) kum ah Isreal mi hna nih Egypt ram sal sinak in khuarauhhar in an luat caah mah bia hna cu zumh lo awk zeihmanh a um lo mi asi. Nawlbia (10) i a hmasa bik nawl bia ah Pathian nih amah aiawh in bia a chim tu Moses kha hmangin “Keimah hlei in Pathian dang zeihmah nan bia lai lo” tiah a ti hna. Khacaan lio ah Isreal mi hna nih kha bia ngeih kha an rak i thim i Pathian kha an rak biak. Cuticun annih nih Pathian kha zeihmah ngan lo in lungtho tein an rak biak ti kha (Exodus 20) chungah kan hmuh khawh mi asi. 

Pathumnak ah Moses nih Isreal hna kha zei i thim awk dah a chimh hna i nihin ah kannih nih zei thimnak dah kan tuah lai tihi ruah `i kan duh hna. Kum 40 tluk a rauh hnu ah Isreal mi hna kha an i thim ding mi kong ah Moses nih fak piin rakrin a pek hna tikah nihin kan rel mi Bible chungah “Nan nih hmai ah nunnak le thihnak, thlachuahnak le chiatserhnak ka chiah kha a hngal tu ah nihin ah van le vawlei kha ka khawh hna. Cucaah nunnak kha i thim tuah uh, nanmah le nan tefa hna nih nannun nak hnga” tiah ati. Cu bantuk in nihin ah kan nih zong thimnak kan tuah khawhmi si. Zungzal nunnak kha i ruahchan in Pathian kha zumhawk tlak tein biakding asiloah Pathian nawlngaih lo ruangah a chuahmi harnak hna in ding kha kan i thim khawh mi asi. Zeidah nai thim lai?

Pali nak ah Joshua nih zeidah a rak i thim i zei tthatnak dah a hmuh ti hi ruah tti kan duh hna. Joshua nih a thih hlaan ah Israel mi hna kha hmual ngei ngai in bia a rak forh hna. “Bawipa biak kha nan duh lo ah cun nihin ah hin nan biak ding cu i thim tuah u. Tiva ral khat lei ram ah nan pupa hna nih an biakmi Pathian hna maw a siloah, an ram umnak mi Amor mi hna Pathian hna hi dik” tiah a rak ti hna tikah a innchungkhar he pehtlai in hitin a chim. “Keimah le ka innchungkhar tu nih cun Bawipa kha kan biak ko lai” tiah Pathian Biak ding kha aa rak thim ti kha (Joshua 24:15) chungah kan hmuh khawh mi a si. Psalm chungah ‘mitha lo hna khuakhaan nak ah aa tel lo i misual mi hna lam zong a zul lo i Pathian a nehsawh mi hna sinah a tthu lo mi cu thluachuak mi an si. An i lawmhnak tu cu Bawipa nawlbia tu ah khan a si i cu nawlbia cu chunzaan in an ruat ee’ a ti. ‘Cu mi hna cu tiva pawngah a kho mi thingkung, a caan hmaan teah a thei a tlai i a hnah a uai bal lomi bantuk an si ee’ a ti. 

Dawtmi u le nau hna zeitindah nifatin kan nunnak hi kan liamter ti hi i check tthan cio u si. 

Nihin kan relmi Gospel chungah Jesuh nih, “Ahohmanh nih zulh nan ka duh a si ahcun mah zawnruahnak kha a ngol lai i nifate in nan vailam kha nan i put lai i nan ka zulh lai. Zeicah tiah mah himnak lawng kha a ruatmi cu an nunnak kha a sung lai. Sihmanhsehlaw keimah ruangah a nunnak a sungmi cu khamhnak kha a hmuh lai. Mi pakhatkhat nih vawlei hi a dihlak in co sehlaw amah cu lo tlau ttung sehlaw a siloah rawkral ttung sehlaw zeital a miak hnga maw? Miak hlah! A ti.” Fianter ding zeihmanh a um lo. A fiang ngai mi a si. Hi vawlei pumpi kan co hmanh ah zungzal nunnak, kan nunnak hi a caw kho lai lo’ tihi a si. Jesuh Khrih lawnglawng kan ngeih lawng ah zungzal nunnak cu kan co khawh lai. Amah hi kan zulh i, a nawlbia kan ngaih i, nifa kan nunnak ah Amah he temh innak in in, cutin kan nun ah cun zungzal nunnak cu kan co khawh ding mi a si” ti kha Gospel chungah kan hmuh mi cu a si. 

Cucaah dawtmi u le nau hna, nifatin kan nunnak ah, kan hmai ah nunnak le thihnak, thluachuahnak le vanchiatnak a um pengmi a si caah hin, Bawi Khrih he kan nunkhawhnak hnga, Bawipa kan Pathian kha daw u sihlaw, nifate Amah aw kha ngai u si law Amah lei ah i mer tuah u sih. Zeicah tiah cun, kan caah nunnak le nun saunak a si. 

RVA a ngaitu nan dihlak cungah Bawipa nih thluachuah za in in pe cio ko hna seh. Amen