Chunglei Nun a Zohtu Jesuh
Bawi Khrih ah dawtmi nu le pa ule nau vialte hna nan um hmunhma kipcio ah Bawipa nih daihnak in pe hna sehlaw nan herh mi kip ah thlachuah in hrawmh cio ko hna seh. 2026, Feb 18, Vuhcam puai ni ah kan Bawipa Jesuh Khrih nih a kan cawn piakmi he pehtlai in a tawi tein i ruah tti hna u sih ti ka duh mi cu kan Bawipa Jesuh Khrih hi chunglei nun a zoh mi asi i lenglei thil minung palh nak a zoh mi si lo ti kha fiangte in kan hmuh.
Minung nih cun vawlei ah hin mifim, mithiam, misang, mirum ti bantuk kha kan ttihzah hna, upatnak kan pek hna i, sihmanhsehlaw kan Bawipa Jesuh Khrih tu nih cun chunglei nun, chunglei ziaza a ttha mi kha a cohlan i thlachuah a pek timi kha kan hmuhmi kha asi. Kan cathiang chungah kan Bawipa Jesuh Khrih nih Frasi mi hi vawitam pi sual a phawh hna i a ti mi kha, a sik mi kha kan hmuh. Frasi mi hna nan nih cu tthlan bantuk nan si. Leng dawhnak in a khat mi a chung a thu ttung mi tthlan bantuk nan si. Nan thinlung nan ziaza nan ruatnak hi a ttha lo. Keimah tinak lawngte in i cua nak le i uahnak, minih kan thangtthat hna seh, minih ka fak hna seh ti a duhmi nan si tiah kan Bawipa Jesuh Khrih nih khan sual a phawt mi hna kha kan hmuh. Frasi mi hna nundan, nungning kan zoh tikah hin biaknak zongah an i zuam, chawva zongin cheu hra cheu hnih a pe mi tampi an um, zerhkhat ah voihnih rawl a ulh mi an um, minung hmuh ning minung tah ning in cun an tling ngai ngai. Sihmahsehlaw, kan Bawipa Jesuh Khrih nih kha kha a pawm lo, a co loh. Zeiruang kan ti siah cun an thinlung put ziaza kha a hmuh tikah cun kha kha kan Bawipa Jesuh Khrih nih sual a phawt mi hna kha asi.
Cucaah dawtmi nu le pa unau vialte hna zeithil kan tuah kan ttuanmi kip ah hin kan thinlungput a ttha maw, kan thinlung ruatning ziaza a hmaanmaw a dikmaw ti i ruah kha a biapi ngai ngai mi kha asi. Thinlung chungin dawtnak tak tak zawngruahnak tak tak thinlung kan ngeih tung lo ah cun thla kan cam mi siseh, midang kan bawmh chanh mi hna siseh, zeithil kan tuah mi paoh hi pak pa lawng kan si ko. Pathian mithmuh ah cun cohlan awk an tlat lo ti kha fiangte in kan hmuh mi asi. Cathiang chung zongah kan Bawipa Jesuh Khrih nih mi nan bawmh tik hna ah, mi nan tthenh tik hna ah nan thinlung put kha i ralring uh tiah bia a kan cah mi asi. Minih ka hmu hna seh, minih ka thangtthat hna seh, minih ka cawnglawmh hna seh ti thinlung put in va tuah hlah uh tiah bia an kan cah mi kha kan hmuhmi kha si. Cuahcun Mithiang Agustine nih a kan cawn piak, a kan chimh bantuk tein “nangmah kha zei na tuah ti kha Pathian nih a zoh lo. Sihmanhsehlaw, zei ruangah dah na tuah timi tu kha a zoh mi si” tiah a ti bantuk tein vawlei cungah kan tuah mi thil tampi a um lengluang ko lai, ai dang cio ko lai. Sihmanhsehlaw zei ruangah dah kan tuah, zei thinlung put in dah kan tuah timi kha a biapi ngai mi kha asi. Vawlei asi caah hin kan ruahmi le kan tuahmi le kan sining hi ai lo cio lai lo. Vawlei cung asi caah sifak deuh zong kan um lai santlai lo zong kan um lai. Sihmanhsehlaw, Pathian nih a kan philh lo, a kan um pi ko. Hla phuah thiam tu pa nih a ti bantuk tein a caan ah sifak nak lakah, a caan tilet nak lakah Jesuh kut in a ka hruai ko a ti bantuk tein kan ngeih chiat caan zongah siseh, kan lungrawh caan zongah siseh, ka sii a fah caan zongah siseh Bawipa nih a kan um pi ko.
Kan mah le kan ti khawh tawk tein kan tuahmi thil le lungthiang tein ruahnak ttha he kan tuah mi thil hi Pathian nih a kan cohlan mi asi ti kha philh lo tein kanmah le kan tikhawh tawk tein Pa Pathian lei hin karr hlang hna u sih law Pathian hi i bochan ko hna u sih ti mi kha a tawi tein chim ka duh mi si. Bawipa nih thlachuah in pe dih ko hna seh!