A Tthawngmi Zumhnak
Atu bantukin a biathiang ah thazang i lak tti dingah caanttha, caan sunglawi a kan serpiaktu, kan biakmi kan Pathian a minthiang ka thangtthat. RVA Hakha service a rak ngaitu zumtu nan dihlak cungah Bawipa nih a thar in thluachuahnak in pe cio ko hna seh tiah thlaza ka cam.
Nihin February 16 ah kan nu Bupi nih thazang i lak tti dingah Bible cathiang a kan tarpiakmi a voi(2) Bible kha ka rak rel lai. (James 1:2- 5) “Ka u le ka nau hna nan cungah hneksak nak a phunphun a tlun tikah vanttha ah i rel u. Zeicah tiah cubantuk hneksaknak cu nan zumhnak in nan tei tikah in khawhnak nan ngei. Zeihmanh bau loin a tlingmi nan si nak hnga a karlak ah in khawhnak um sual loin a dongh tiangin ing ko u. Sihmanhsehlaw, fimnak a bau mi nan um ah cun Pathian sinah thlacam sehlaw Pathian nih a pek ko lai.”
Nihin ah thazang lak tti dingin ka duhmi cu “a tthawngmi zumhnak” timi a si lai. Zumhnak hi a tawinak in kan chim ah cun phun 2 in tthen khawh a si. A tthawngmi zumhnka timi le a dermi zumhnak, phung dangin kan chim a siahcun, a tak zumhnak le a deu zumhnak tiin kan ti khawh.
Zumhnak kan ti tikah, Pathian fa nu/pa hna lawng hi zumhnak a ngei mi kan rak si lo. Satan zong nih Pathian a rak zumh ve timi hi (James 2:19) ah kan hmuh khawh. Satan nih hin Pathian hi a um ko ti hi a zumh. A zumh sawh lawng siloin a zumhnak ah hin a ther in a ther a ti. Cheukhat Khrihfa aa timi hna kan zumhnak hi i check tthan u sihlaw, cheukhat kan zumhnak ah hin cun Satan hmanh hi kan tluk tawn rua lo tiah ka ruah. “Satan nih Pathian cun a zumh ko, Pathian duhnak tu kha a tuah duh lo” tiah a ti. Pathian kan zumh kan timi cu Pathian duhnak kan tuah kha a si kan ti khawh. Satan nih Pathian kan rak zumh hi a poi a ti lo. Satan nih a duh lo bikmi pakhat cu zei a si kan ti a si ah cun, Pathian kan zumhnak kha fek tein kan i tleih i kan i komh chih mi hi a duh lo bik cu a si. Cucaah, minung hna nih Pathian he fek tein i pehtleihter khawh lo ding caah, kan chungah hin ‘lungawttawmnak’ timi kha a rak khumh. Cu nih cun Pathian he kan i pehtlaih nak kha a hrawh tawn. A tthawngmi zumhnak, a tak zumhnak kan ngeih khawh lo ding caah lungawttawmnak nih cun kan lung cu a hrawh i Pathian he kan i pehtlaihnak kha a dermi ah a canter.
A tthawngmi zumhnak, a tak zumhnak kan ngeih khawh nak ding caah zeidah a hau? Zumhnak fek kan timi hi Pathian bia theihnak in a ra mi a si. Pathian bia hi fiang tein kan theih khawh i kan theih mi nih cun kan nunnak ah tehte kan langhter khawhnak hnga ding caah zeidah a hau? Thiangtharau bawmhank kan hau. ‘Fimnak a baumi nan um ah cun Pathian sinah thlacam seh, Pathian nih a pek lai’ tiah a ti.
Khrihfa mi hna nih kan herhbik mi cu cung lei in a ra mi Thiangthlarau Fimnak hi a si. Thiangthlarau lam hruai umpi nak hi kan herh zungzal mi a si. “Keimah te loin zeihmanh nan tuah kho lo” tiah Jesuh nih fiang tein a kan cawnpiak. Pathian bia thli theih khawhnak timi hi vawlei fimnak hi a si lo. Degree sangsang zong an si lo. Thiangthlarau lam hruai umpi nak lawng a si.
Dawtmi u le nau hna Pathian bia kan theih lawng hi a za lo. Pathian kan zumh lawng hi a za lo. Satan zong nih Pathian hi a rak zumh tuk ve ko. Kan nunnak ah Thiangthlarau lam hruai umpi nak kan herh hrimhrim ko. Thiangthlarau Pathian kha sawm zungzal hna u sih. Bible kan relnak ah siseh, kan chim kan rel nak ah siseh, Thiangthlarau Pathian kan sawm zungzal a si ah cun, kan nunnak ah Pathian Sunpar lianngannak a lang hrimhrim ko lai.
A donghnak ah, hneksak nak kan cung a tlunmi hi Khrihfa mi hna caah cun dawmhhlei pakhat, level-1 kan kainak caah a si timi zong vun chim ka duh. Cucu Bawipa Sunpar lianngannak a langh khawhnak hnga caah a si. Cucaah, “Zeihmanh a bua mi um loin a tlingmi nan si nak hnga caah, lungsau tein ing ko u” tiah Pathian bia ah kan thieh bangin kan tonmi har si seh, kan cungah a tlungmi hneksak nak vialte hna kha lungsau tein inkhawh i zuam hna u sih law, kan intuarnak hna chungin Bawipa sunpar lianngannak a langh khawh nak hnga ding caah Thiangthlarau Pathian kha sawm hna u sih. Nan dihlak in Bawipa nih thluachuahnak in pe cio ko hna seh.