JESUH KHRIH, PATHIAN FAPA NGEIHCHUNH KA ZUM
Thawngṭha: Pathian nih a Fapa a rak thlah
“Sihmanhsehlaw a can a tlin tikah Pathian nih a Fapa kha a rak thlah, nu nih a hrin, nawlbia tangah a ummi hna kha tlanh awk ah nawlbia tangah hrin a si i, cucu kannih kha fa cannak kan hmuhnak hnga caah a si” (Gal 4:4-5). Mah hi Pathian Fapa Thawngṭha cu a si. (Mk 1:1) Pathian nih a miphun kha a len cang hna. Amah nih Abraham le a tefa cungah a tuahmi nakin ngan deuh pi in a tuah; a dawtbik a Fapa kha a rak thlah cang. (Mk 1:11, Lk 1:55-68).
Kannih nih Herod bawi le Caesar Augustus chanah Bethlehme khua ah a chuakmi, Nazareth khuami Jesuh cu minung a cangmi Pathian Fapa a si tiah kan zumh i kan phuan. Amah cu Pathian sinin a ra. (Jn 13:3). Vancung in a rung ṭum i, (Jn 3:13, 6:39) minung ah a cang (1Jn 4:2). Zeicahtiah BIA cu minung ah a cang i kanmah lakah a um; vel le biatak he a khat; kannih nih a sunparnak kha kan hmuh. Cucu Pa sinin Fapa ngeihchunh nih a hmuhmi sunparnak kha a si. Amah a tlinnak chungin kannih nih vel chungah vel kha kan hmuh cang. (Jn 1:14, 16).
Thiang Thlarau vel thawngin le Pathian hruainak thawngin Jesuh Khrih kha kan zumh i, “Nangmah cu a nungmi Pathian Fapa, Khrih na si,” tiah kan phuan.
Khrih – a rumnak kong phuannak; (Eph 3:8).
Khrihfa zumhnak ro a hmuhnak cu midang kha Khrih zumhnak lei hruai awkah Jesuh kong chimnak ah hin a um. A hramthawk in hmasabik zultu hna cu Jesuh Khrih kong chimduhnak lungthin in an al hi, “Kannih nih kan hmuhmi le kan theihmi kha chim loin kan um kho lo” tiah an ti. (Lam 4:20). Cun annih nih khan kipah a ummi minung vialte kha Khrih he annih kawmhnak in an hmuhmi lawmhnak kha co ve awkah an sawm hna (IJn 1:1-4). “A hramthawk in a rak um cangmi, kannih nih kan theih i kan mit in kan hmuhmi, kan zoh i kan kut iin kan tonghmi nunnak bia kong ah nunnak cu langhter a si; cu kong cu kannih nih kan chi mi Pa he a rak um ṭimi zungzal nunnak, kannih sinah langhter a simi kong kha kan in chimh hna. Zeicah tiah cun Pa le Fapa Jesuh Khrih he hawikawmhnak kan ngeihmi chungah khan nan tel ve khawhnak hnga kan duh. Hi ca kan ṭialmi cu kannih lawmhnak kha a tlinnak hnga caah a si. (IJn 1:1-4).
Pathian bia cawnnak ah Khrih
Pathian bia cawnnak ah Khrih cu kanmah he a um zungzal. Pathian bia cawnpiak kan timi nih Khrih chungah Pathian a tinhnak vialte a tlinnak a phan ti kha a langhter. Pathian bia cawnnak timi cu Khrih a tuahser mi, a bia chimmi le khuaruahhar hmelchunhnak a tuahmi hna a sullam theihthiamnak kawl kha a si. Pathian bia cawnnak i tinhmi cu minung kha Khrih he kawmhter awk kha a si. Amah lawng n ih kannih kha Thlarau in a Pa dawtnak chungah a kan hruai khawh i Thumkawmh Pathian nunnak kha a kan hrawmter khawh.
Pathian bia cawnnak cu minung cannak a lami BIA, Pathian Fapa kong cawn a si. A dang kong vialte cu amah he pehtlaih in cawnpiak a si dih. Cawnpiaktu taktak cu Khrih a si. A dang cawnpiaktu hna cu Khrih can ah biachimtu lawng an si. Cawnpiaktu saya vialte nih Khrih bia kha an i lak dih cio awk a si. Khrih nih, “Ka cawnpiakmi cu keimah ta a si lo, a ka thlahtu ta a si” tiah a ti. (Jn 17:16).
Khrih kong cawnpiak awk ah auhnak a hmumi vialte Khrih Jesuh hngalhnak kha a kawl hmasa awk a si. “Khrih kha a hmuhnak hnga le Khrih chungmi ah aa hmuhnak hnga” le Khrih le a thawhṭhannak i a ṭhawnnak kha hmuh awk ah a temh innak kha i hrawm; a thihnak ah thih ve in a thawhṭhannak ah thawhṭhan ve awk ah zeizong vialte sunghnak kha a in lai,” (Phil 3:8-11).
Khrih hngalhnak in Khrih kong chim duhnak, thawngṭhabia phuan duhnak lungthin le midang kha Jesuh Khrih zumhnak ah hruai duhnak lungthin a hung chuak lai. Cu lawng a si lai lo, Khrih hngalh duhchinnak lungthin cu a rak lang chinchin rih lai. Mah duhnak tlinh awkah Khrih kong kha zumhnak bia nih a phuan ning tein zulh a hau.