Pathian Phung Philh cu thihnak a si
Nihin kan cathiang chungin bia tlangtar ka duhmi cu “Pathian bia thieh khawhnak hna, cun Pathian lawmhnak ah kan hmur, kan lei kan ka” ti asi lai.
Nihin hi Ni 5 ni cathiang kan rel hmasa mi (1 Siangpahrang 11:29-32, 12:19) (Sam 80:10-15) a si i, (Listen to my warning) ral rinnak kan pek mi hna hi tha tein ngai tuah ti a si. (Mark 7:31-37) ah hna chet mi kha theihter i holh aa mi hna kha bia chim ter hna. Pathian nih laksawng nganpi a kan ser piak mi cu, amah bia kha kan theih i, kan hmur kan kaa in kan a thang`hatnak kan chim thiam ding kha asi.
David Siangpahrang nih (Sam 80) ah “ral rin kan pek mi hna hi `haten ngai tuah” tiah a ti. David nih Sam chung in ralrin kan pek i, “`haten ngai tuah” tiah a ti. A fapa Solomon nih a nunnak hram thawk le a rian`uannak ai dawmh tikah Pathian a `ihzah ngai bantukin a Siangpahrang rian ai thawk hlaan ah “Pathian nih na duh mi ka hal kan pek lai” tiah a ti tik ah Solomon nih “Kei cu ngakchia men kan si. Na mi Isreal mi phun uk ding ah kaa tlak lo. Cucaah hi miphun hi nangmah duh dang bantukin ka uk khawh hna nak hnga, ka hruai khawh nak hnga fimnak ka pe ko, chia`ha thleidan thiamnak run pe ko” tiah toidar in a hal. Cucaah Pathian cu aa lawm tuk i “rumnak na ka hal lo, cucaah hi na ka hal mi bangtuk in fimnak kan pek lai. Cu fimnak hlei ah na ka hal lo mi vawlei cung rumnak zong kan pek lai” tiah a ti rih. Cucaah Solomon Siangpahrang cu vawlei cungah a rum bik mi singpahrang a rak si. A chan zong a sau fawn. Cun amah chan chungah ral tuknak timi a rak um lo. Daihnak hnangam nak timi kha a rak um. Cun a fimbik mi zong a rak si fawn. Solomon fimnak kong kha nichuah lei le nitlak lei nih an rak ngaih. Vawlei deng in khan Solomon siangpahrang fimnak ngaih awk ah an rak ra ti asi. Duhdah in a min a hun than deuh tikah minung nih an chim thiam, an thang `hat. Cu tikah nupi zong tam pi a rak ngei. Isreal miphun asi lo mi lawki mi nupi tam pi a rak ngeih tik hna ah lawki mi a nupi pawl nih an rak lem i an mah duhnak lawngte a rak zulh hna tikah Solomon siangpahrang a rian aa thawh lio ah cun Pathian theih hngalh le `ihzak nak in ai rak thawk ko nain a hnu ah cun lam a pial i, nupi le ruangah lam a rak tlau ti kha kan hmuh. A rumnak le a fimnak vialte caah lawmhnak um ti loin a nupi le an biak mi siasal duhnak a zulh caah a pupa hna biak mi Pathian kha a thin a hun ter caah chiahserh nak a ton nak le a fapa le hna chan ah Isreal ram cu a `hek dih ti mi kha kan hmuh.
Kannih vialte zong Pathian pek mi theihnak hi kan hman i a kan khamh nak thawng`ha bia kha kan ngaih le theihnak i kan zulh kha a herh. A kan pek mi theih khawhnak hna cu zei ah dah kan hman lai? Minung cu kan sual kan palh kho. Pathian thinhun ter kho tu kan si kho fawn. Sihmanhsehlaw, kan sual kan palh tikah, Pathian mi asi mi Profet hna chimhhrin nak hna kha `ha ten kan zulh ding kha a herh. Cun bia chim khawhnak lei le dang zong Bawipa nih a kan pek. Mah a kan pek mi lei le dang in zei dah kan tuah lai? Bawipa a `hatnak kha thang`hat kan i zuam lai. Cun theihnak hna kan ngeih mi khan zei dah kan tuah lai? Warning a kan pek mi a kan chimh hrin nak kha (aw si maw, aw si) ti in theihthiam le ngaih kha kan i zuam ding a si fawn. A caan ah cun, thiehnak hna kan ngei ko nain Pathian aw kha a thei lo bantukin kan um `heu. Kan pawng kam ah hnachehter tu, nuamhnak phuntling le, vawlei pumsa duhnak lawng tei a khah tikah theih le ngaih a herhmi kha kan thei tawn lo. A herh lo mi kha kan theih tikah Pathian lung a tling kho lo. Cu caah nazi (1) chung tal hi cu Bawipa aw ngaih awk ah nangmah te lawng hi dai tein um law Pathian aw ngai khawh i zuam tuah. Pathian nih a kan chimh mi kan theih khawhnak hnga Pathian aw, Pathian thawng`ha bia kha rel le theih kha kan i zuam awk a si. i
Nihin kan cathiang chungah Bawipa Jesuh Khrih nih a hna a chett mi pa a damter. Theih ding le hngalh ding kan theih khawh lo a si ah cun minung kan sinak kan sung tuk. Kan chim duh, kan rel duh ko nain kan ti khawh lo tikah ngaihchiat nak in kan khat tawn. Jesuh nih mipa cu a damter lio ah khawh ah dah a kal pi?
Mizapi hmai ah a tuah piak maw? Tuah piak lo. Khua lengah a kalpi ti si. Khua lengah a kalpi i a hna kha a kut dong in a sawh i, a lei a hmur kha a cil in a thuh, a benh i a damter. Kha tikah bia a chim kho, cun khua a hmu kho. Mipa dam ning a hmu mi paoh cu an khuaruah a har dih. Bawipa nih kan caah thil `hatuk a kan tuahpiak cang an ti.
Dawtmi ule nau hna, Pathian sunpar lianngan nak thang`hat awk ah kan hmur kan ka kan hman ve awk a si. Cun, a thawng`ha bia ngaih awk ah kan hna kha kan tun awk a si. Fimnak le rumnak caah sertu Pathian thang`hat loin Pathian nung a bia lo mi, nupi nawl zulmi Solomon siangpahrang bantuk in kan biaknak, kan zumhnak kal tak in a hmaan lo mi biaknak a zulmi kan nupi kan pasal biaknak a zulmi kan um maw? A caan caan cu Solomon siangpahrang bantukin, ai zuam tuk ko nain a nupi le a `ih mi, nupi le lung ton lawng ai zuam i a nupi le duhnak lawng a tuah mi kan si sual maw? A kan palhter kho tu hna paohpaoh kha cu hlawt ding an si ko. Nang le kei zong “Khrihfa (RC Khrihfa) kan si” kan i ti. Kan khua kan ram ah kan um lio ah cun kan i zuam tuk ko lai; pumh zong kan i zuam tuk ko men lai. Pasal ngeih kan cut, nupi ngeih kan cut, ramdang hna kan hung kal hna. Ramdang kal lo mi zong nih pasal kan ngeih tikah, nupi kan ngeih hna tikah ‘kanmah RC ah cun ka lung tongmi an umlo’ ti in Bu dang ah pasal/nupi ngeih in khan bu dang pasal, nupi biaknak zulh in kan pu kan pa biakmi kan Pathian kha kal tak in, athiang mi kan zumhnak kha kal tak in a hmaan lo mi zumhnak, a tling lomi biaknak ah khan kan pial tawn.
Solomon bantuk in kan biakmi Pathian nung kan kal tak ahcun, kan Pathian thin kan hunter a si ahcun zei dah kan ton te lai ti kha ruat cio hna u sih tiin sawm kan duh hna.
Nan zapi Bawipa nih a hmaanmi biaknak chungah lam in hruai zungzal ko hna seh…..Amen.