Pathian bia theih khawhnak kan hna cun Pathian lawmhnak ah kan hmur, kan kaa, kan dang

Halo RVA in thawngṭha a rak ngaimi vialte hna nan dam cio hna lai tiah zumhnak ka ngei. Nihin kan cathiang chungin bia tlangtar ka duhmi cu Pathian bia theih khawhnak kan hna cun Pathian lawmhnak ah kan hmur, kan kaa, kan dang ti a si lai. Nihin hi cawn ni (5), thla ni (13) ni kha a si i kan rel hmasami ah hin (1Siang 11:29-32, 12:19) cun (Ps 81:10-15) tiang a si lai. Hika ah a biapi bikmi cu “Listen to my Warning” ralrinnak an pekmi hna hi ṭha tein ngai tuah ti a si. Cun thangṭhabia cu (Mk 7:31-37) kha a si lai i hna a chetmi kha theihter i holh a harmi hna kha bia chimter kho. Hika ah Pathian bia, Pathian nih hin laksawng nganpi ah a kan ser piakmi cu amah bia kha kan theih i cucun a thangṭhatnak kha kan lei kan dang in khan kan thangṭhat i kan hmur in kan chim thiam ding kha a si. Palm, David Siangpahrang nih a rak ṭialmi cu salm (80) ah hin “Ralrin kan pekmi hna hi ngai tuah uh”, a pa David nih salm chungin khan “ralrin kan pek ṭha tein ngai tuah” tiah a ti. A fapa Solomon nih a nunnak hramthawk le a rianṭuannak aa domh tikah cun Pathian a ṭihzah ngai bantuk Pathian a bochan bantuk in kan relmi hna chungah a rian aa thawk lio, Siangpahrang rian aa thawk lioah Pathian nih “na duhmi ka hal, kan pek lai” tiah a ti tikah khan Solomon Siangpahrang nih “kei cu ngakchia men ka si, na ram le Israel miphun uk dingah ka tlak lo.

Cucaah na miphun hi nangmah duhnak bantuk in ka uk khawhnak hnga, ka hruai khawhnak hnga, fimnak run ka pe ko, chia/ṭha thleidan khawhnak run ka pe ko” tiah toidornak in a hal. Kha tikah Pathian a lung a lawmtuk i “rumnak na ka hal lo, cucaah na ka halmi bantuk in khan fimnak kan pek lai cu fimnak lengah na ka hal lomi Vawlei cung rumnak zong kan pek lai” tiah a ti rih. Kha ti khan vawlei cungah Solomon Siangpahrang cu vawlei cungah a rum bik Siangpahrang a rak si. A chan zong a sau cem. Amah chan chungah raltuknak timi a rak um lo. Daihnak hnangamnak kha a rak um. A fim bikmi a rak si fawn. Solomon fimnak kha khi nichuahlei, nitlaklei nih an rak ngai. Vawlei deng tiang khan Solomon Siangpahrang fimnak ngai awkah an rak ra. Kha tlukin khan a min a thang ko nain khan minung nih an chim thiam. Kha tikah nupi zong tampi a rak ngei. Israel miphun a si lomi lawki mi nupi tampi a rak ngeih tikah lawkimi a nupi pawl nih an rak lemsoi i anmah duhnak lawngte a rak zulh tikah Solomon Siangpahrang cu hmasa ah Pathian in aa thawk ko nain khan ahnu ahcun lam a rak tlau ṭhan. A nupi le ruangah lam a tlau timi kha kan hmuh. A rumnak le a fimnak vialte caah lawmhnak chim loin a nupi le an biakmi siasal duhnak a zuh caah an pupa hna biakmi Pathian nung kha a thin a hunter caah chiatsernak a tonnak le a fapa le hna chan ah Israel ram cu a thlek. Kannih vialte zong Pathian pekmi theihnak hna kan hman i a kan khamhnak thawngṭhabia kha kan ngai le theihnak kan i zuam ve kha a herh. A kan pekmi theih khawhnak hna cu zeitindah kan hman lai. Minung cu kan sual kan palh kho, kan sual kho kan palh kho. Pathian thinhun ter khotu kan si cio ahopaoh sihmanhsehlaw kan sual kan palh tikah amah mi a simi Pathian mi a simi profet hna chimhruahnak, chimhhrinnak pawl kha ngai i zuam i aw… a si maw tiin ngai kha kan herh. Cun biachim khonak lei le dang zong kha a kan pek. Kha a kan pekmi lei le dang khan zeidah kan tuah lai. Bawipa a ṭhatnak kha thangṭha kan i zuam lai. Cun theihnak hna kan ngeihmi khan zeidah kan tuah lai. Warning a kan pekmi, chimhhrinnak a kan pekmi kha aww…a si maw tiin khan ngai kho kan i zuam lai. Cun a cancaan cu theihnak hna, hna kan ngei ko nain khan Pathian aw kha a theih lo bantuk in kan um ṭheo. Cun kan pawng kan kam ah hnachet lawng ten, nuamhnak lawngten , vawlei pumsa duhnaklawng ten a khah tikah kan ngai a herhmi kan theih a herhmi kha theih loin a herh lomi kan ngai, a herhmi lomi kan hna in kan theih. Pathian a lung a tling maw/tling lo. Cucaah a cancaan te cu ni nikhat chungah hin mithiang mi hna nih nizii pakhat cungah hi cu Bawipa aw ngai awkah nangmah te lawng dai tein um law Pathian aw ngai tuah tiah an ti.

Cucaah kannih Pathian nih a kan pekmi kan theihnak hna i Pathian aw, Pathian chimhhrinhnak theih awk ah, Pathian thawngṭhabia theih awkah khan a hmang khotu kha si i zuam usih. Nihin kan cathiang chungah hin Bawipa Jesuh Khrih nih, a hna a chetmi pa cun bia a chim kho lomi pa cu theih khawhnak le chim khawhnak a ngei lo. Minung kan si kan i ti ṭung i kan mit kan i hrah ṭung i mi chimmi pakhat hmanh kan theih lo, a thli tein vun chim lo a thangpi chim zong theih lo, minung kan sinak kha kan sung. Cun kan chim duh, kan rel duh ko nain khan kan chim kho lo kan rel kho lo kha kha kan sung taktak i nihin ah cu pa cu Bawipa Jesuh Khrih nih a damter. A damter tik zongah khoika dah a kalpi, mi zapi hmai ah a tuahpiak maw? A tuahpiak lo. Khualeng ah a kalpi ti si. Khualeng ah a kalpi i a hna kha a kutdong in a sawh i cun a lei kha a hmur kha a cil kha a ben hi kha ti khan a damter. Kha tikah bia a chim ko, khua a theih kho tikah a hmumi vialte kha an khuaruah a har tuk. Bawipa nih kan caah thil ṭha tuk a kan tuahpiak cang an ti.

Dawtmi u le nau hna a sunpar lianngannak ṭhangṭhat awkah kan hmur kan kaa kha hman ve i zuam usih. Cucun a thawngṭhabia ngai awkah kan hna kha hmang usih. Fimnak le rumnak caah sertu Pathian thangṭhat loin Pathian nung a bia lomi nupi nawl a zulmi Solomon Siangpahrang bantuk in kan biaknak kan zumhnak kaltak in a hmaan lomi biaknak a zulmi kan nupi kan pasal biaknak a zulmi kan um maw? A cancaan cu Solomon Siangpahrang kha Pathian sinah aa zuam tuk ko nain khan a nupi amah lawki a simi Pathian nun a bia lomi nupi a ṭhit hna tikah a nupi le lungton tu a zuam i kha tikah a nupi le duhnak kha a tuahpiak hna tikah khan amah a biakmi Pathian tu kha a philh i thangṭhat loin, ngai loin Pathian dang lawki siasal a biatu ah khan a cang. Kha bantuk in nang le kei zong RC Khrihfa kan si kan ti i kan khua kan um lio ahcun kan i zuam tuk pumh zong kan i zuam tuk pasal ngeih kan cu nupi ngeih kan cu ramdang ah kan kal i ramdang kal lomi zong nih pasal kan ngeih tikah nupi kan ngeih tikah kanmah RC ahcun kan lung tongmi um lo ti in khan budang ah pasal nupi ngeih in khan pasal biaknak nupi biaknak zulh in kan pu kan pa kan biakmi kan Pathian kha kan kal tak.

A thiangmi kan zumhnak kha kaltak in khan a hmaan lomi zumhnak biaknak ah khan an rak i tel tawn. Ka nunnak ah Solomon bantuk in khan kan biakmi Pathian nung kha kan kaltak ahcun kan Pathian thin kan hunter ahcun zeidah kan ton khawh lai ti kha ruat cio usih tiah sawm kan duh hna. Nan zapi Pathian nih a hmaanmi a biaknak chungah lam kan hruai zungzal ko seh…