Pope Leo nih a voi(6)nak vawleicung pupa le tar hna ni caah ‘Ka philh hna lai lo’ timi tlangtar a thim

• “Kan philh hna lai lo” (Isaiah 49:15) timi tlangtar cu Pope Leo XIV nih tukum July 26, 2026 Zarhpi ni ah tuah dingmi a voi (6) nak Nu le pa, Tar hna puai ni caah aa thimmi a si.

Pope nih a langhter duh mi ah “Pathian nih mi vialte cung i dawtnak a ngeihmi cu kan tar tiang hmanh ah a tlau lo” ti langhternak caah a si i; Khrihfa hna, chungkhar lei kap le nunnak lei kap he pehtlai in ttuanvo la tu zung (Dicastery) nih Feb. 10 ah a chuahmi cathanh ningin an langhter ve.

Profet Isaiah cauk chungin lakmi, “pi le pu le tar vialte caah hnemhnak le ruahchannak thawngpang” si ding zong aa tinh mi a si i, ‘amah lawng tein a um mi hna le philh cang mi kan si’ tiah aa ruat mi hna caah a hlei in tinh piak mi zong a si. 

Vatican dicastery nih cun ‘tar pawl kha philh lo ding’ le an chungah (an tonnak in theih hngalhnak) “a sunglawi tukmi umtuning le thluachuah” a umnak kong hngalhthiam-cohlaan piak thiam dingin chungkhar le Khrihfabu hna sinah sawmnak zong a si tiah a langhter.

Pi le Pu hna puai ni timi cu Pope Francis nih 2021 ah a rak thawk mi a si i July thla Zarhpi zarh (4) nak ni paoh ah tuah a si. Caanṭha lak in tinhmi cu, ‘bupi zong Tar pawl he naihniam deuh in um khawh ding le, Tar pawl nih chungkhar le zatlangbu caah rian an rak ṭuannak hna kha sunsak piak thiam ding caah a si.’

Tukum cu, Jesuh Khrih a nu Mary lei in ‘a pi le pu Joachim le Anne’ hna i an puai ni July 26 ni ah tuah a si lai. Pope nih diocese chungum cathedral biakinn ah Missa raithawinak he puai tuah cio dingin Khrihfa  vialte hna sin zongah sawmnak a tuah. 

Khrihfa lei in siseh, Chungkhar le Nunnak lei he pehtlai in siseh ṭuanvo lak in tlangta phu (discatery) nih hmun kip um Khrihfabu hna sinah, anmah le an umnak hmun cio in puai tuah dingah lam kawl cio dingin forh fialnak zong a tuah.

Pope Leo XIV nih July 2025 ah a voikhatnak Vawleicung Pupa hna puai ni a rak tuah i cu caan lio ah cun zumtu hna sinah tar pawl zohkhenh- thiamnak ngeih dingin thazaang pek bia zong a rak chim.