Intro nak Ending a Biapi deuh

Nihin February 12,  ni i thlarau thazaang i lak `i ding in a voikhat Bible kan rel mi chung in thazaang la `ii hna u sih! (1 Siangpahrang 11:4-13) kan rel i, hi chungah Solomon siangpahrang nih Bawipa a kal taknak kong asi. Bawipa zongnih Solomon siangpahrang thil tuahnak ruangah a thlachuah a zuhtak nak kong kha asi. (1 Siangpahrang 11:2) ah zeitin dah kan hmuh ti si ah cun Bawipa nih Isreal mi hna sin ah “Nannih nih nan `hi hna i, in la ve hna hlah seh, zeitintiah annih nih nan lung kha an Pathian hna lei ah an in mer hrimhrim ko hna lai” tiah a rak chimmi miphun hna nu kha a duh hna i aa tlaih peng hna tiah a ti.

Bawipa Pathian nih Isreal miphung chung lawnglawng in amah cung ah a zummi hna, a nawl a zul mi hna lawng `hit dingin Bawipa nih ralrin a rak pek ko nain Solomon nih amah ruahning, amah duhning a zulh tikah palhnak tampi a um. Mah nih a kan cawn piak duh mi cu kan mah i kan ruatnak lawngah kan nun kan zulh sawh peng asi ahcun duhsah tenin rawhral nak kan phan timi hi asi. Zumtu Khrihfa hna zong Bible thiang rel nak ah siseh, thlacamnak ah siseh, kan daithlan asi ahcun kan zumhnak Solomon siangpahrang bantuk in a tlau ve ko lai. Bawipa nih amah he pehtlaihding, amah he bia chimding, amah sin thlacamding, amah bochan ding a kan duhpiak mi asi. Sihmanhsehlaw, kanmah ruahnak, kan mah timhnak cung lawnglawng ah kan lung kan chiah asi ah cun duhsah in kan sin in pathian thluachuah lak piak kan si ve lai timi kha a pakhat nak ah chim ka duh. Cun Catholic Khrihfa hna zong mah zumhnak a lo lo mi midang hna kha `hit umh asi tikah, zumhnak aa lo lo mi hna nih tei ansi tikah duhsah tein Catholic zumhning in nun lo in zumhnak daithlan nak ruangah dauhsah in thlarau lei zong in thazaang a der tawn. Cupin ah mah rian, tangka lawnglawng kawl duhnak, cun midang hna i duhnak lawnglawng ah an duhnak va tlinh piak dingin kan lung a pial sual tikah Bawipa duh ningin kan nung kho tawn lo.

A pakhat nak bikah kan nih caah a biapi bik mi cu Pathian duhning, Bawipa i cawn piak ning, Bupi i cawnpiak ningin kan nun ding kha Bawipa nih a kan duhpiak mi cu asi. Cu asi caah Solomon siangpahrang zong Bawipa ralrin pek ningin nun ti loin, a profet hna sinin ralrin peknak zong zulduh lo in, amah fimnak a mah thil tikhawh nak amah ruahnak lawng a zulh tikah duhsah in a tlau i a sin in thlachuah an tlau. Cu asi caah kan lungthin hi a biapituk mi asi, kan ruah nak hi a biapi tukmi asi. Kan ruahnak kan lungthin kan zeizong vialte hi Bawipa duhning Bawipa sin ah kan chiah si ah cun kan nunnak ah himnak a um ko lai. Kanlung kan pial ter i Bawipa cawnpiak ning kan zulhduh ti lo, pumhduh ti lo hna in kan um tikah, thlacam duhlo in kan um tikah kan sin in thlachuah a tlau lai timi kha a voikhatnak in thazaang la `i hna usih tin sawm kan duh hna.

A pahnih nak ah kan pawngkam ummi hna hi a biapi tuk mi an si. Zeicaah tiah thlarau lei in kan pawngah mi`ha an um asi ah cun kannih hna zong thlarau lei in thazaang `hawnnak, cahnak, himnak kan ngei ve. Sihmanhsehlaw, kan pawngkam ah hrawk tu, tukforh tu, lam a kan pial ter tu hna nih an kan kulh asi ah cun kannih hna kan nunnak zongah lam kan tlau kho ve. Solomon siangpahrang zong nihin kan rel mi Bible voikhat nak a ngan 11:3 ah zeitin dah a ti si ah cun nupi 700, Bawi fanu le nuchun 300 a ngai hna i a nupi le nih cun a lung cu an pial ter tiah ati. Cu asi caah minung kan si caah ahohmanh hi a fimdih cikcek mi, a thei hnal dih cikcek mi, a tling dih cikcek mi aho mah kan um lo. Kan pawngkam ah thlarau lei in lam a kan hmuhsak tu an um ding hi kan herh zungzal mi asi. Biakinn chung ah thil `ha lo a kan hmuhsak lo, thlarau lei a kan hruaitu hna nih lamding lamhman a kan cawn piak i Bawipa he kan i neih chinchin nak hnga ding lawng lawng kha a kan cawn piak tawn.

Cucaah pumh zong hi dai thlang hlah uh sih. Thla kan cam tik zongah Bawipa lawnglawng kha kan i bochan mi asi caah amah lawng kha kan ruah tawn. Thlacam kan dai thlan tikah kanmah duhning paoh in kan nung, khua kan ruat i vawlei chawva cungah siseh, thil si lo si lo cungah biak duhnak lungthin kan ngeih tikah kan tlau tawn. Cucaah Solomon siangpahrang i a pawngkam um mi hna hi profet hna siseh law zeitluk in dah a rak i dawh hnga, Pathian a `ih zahtu si hna sehlaw zeitluk in dah ai dawh hnga. Sihmanhsehlaw, mifimbik mifim cem ti mi asi ko nain amah ruahning lawngin a pawngkam i ai chiah mi hna, miphun dang a chiah hna tikah, nu phunphun ai chiah tikah Bawipa cung ah lungfek tein a nun khawh ti lo nak hi asi. A zumhnak a pial. Cutik ah Bawipa sin in thluachuah chuhpiak `han asi, hnuh piak `han asi. 

Cu asi caah dawtmi ule nau hna, na hawi kom nangmah nih na komh mi kha fimthiam ngai tein na thimthiam a herh. Kan thlarau caah kan nunnak caah lam a kan pial ter tu an si maw si lo timi fimthiam nak zong hi Pathian sin in kan hal zungzal ding hi kan rian asi. Philh hna hlah u sih. Bawipa a `ihzah tu hna kan pawng an um asi ah cun kan nih kan nunnak zong ah kan him ve lai. Thlarau lei zongin thazaang `hawngnak kan ngei lai timi kha a pahnih nak ah thazaang i lak hna u sih.

A pathumnak ah nawl ngeih lo nak i a theipar cu rawhralnak, thihnak asi. Zeitintiah Solomon cu a nupi hna nih a lungthin kha pathian dang hna lei ah an pial ter i a pa David lung bang khan cun a lung cu a dih umnak in a Pathian Bawipa sin ah khan a hmun kho lo. Cun v13 ah zeidah a ti `han ti asi ah cun “asi nain ram cu a dihlak in ka `hek lai lo ka sal David le ka thim mi khua Jerusalem ruangah hin hrin khat cu na fapa hi ka pek lai” tiah ati. Nawl ngeih lonak ruangah rawhral nak a um. Chimh kan ngeih lo ruangah fahnak tamp i kan ing tuar tawn. Zeitluk hmanh in intro `ha hmanh sehlaw ending a `hat lo tik ah, hla pakhat zonghi a dawhmi hla tiah ti a har ngai tawn. Hla `ha tiah kan ti kho tawn lo.

Solomon siangpahrang cu a intro a nunnak siangpahrang a hun can kaa ah Pathian sinin fimnak thlachuah a hmu mi asi. Intro aa dawh ngai ngai. Sihmanhsehlaw, a dongh nak ah a pawngkam ah ai chiah mi hna a kulh tu hna, miphun dang pathian hna, siasal kha a biakve tikah a cohlan tikah a nunnak a dongh lai ah cun a uk mi Bawipa nih a pek mi ram miphun hna chung hmanh in `hek dih cikcek an si. Sualnak ruangah bawipa nih a kan ngaih thiam ko lai. Sihmanhsehlaw, kan sualnak caah, intuar dingcu a tang rih hrimhrim mi asi. Solomon siangpahrang i a thil tinak ruangah Bawipa nih dan a tat.

Sihmanhsehlaw, a pa i Pathian cung i a ngeih mi zumhnak ruangah miphun phun khat cu a rak zuah piak. Cu asi caah Dawtmi ule nau hna kan nunnak ah pakhat le pakhat kan i theih palh tik, kan i sik tik zongah i ngaihthiam nak cu a um tawn. Sihmanhsehlaw, mah i a theipar a rawk mi kha cu hrawhkhawh, hlohkhawh dihcikcek asi lo. Cu caah Solomon siangpahrang zeitluk hmanh in a nunnak ah rak i dawh hmanh sehlaw, a dongh nak, a nunnak a dihlai ah pathian danghna sinin a zumhnak a pial tikah a nunnak a dawh ti lo. Khrihfa kan si nak ah zeitluk hmah in biaknak lei ah rak i zuam hmanh u sih, zeitluk hmanh in ra kan thang`hat hmanh hna seh a dongh nak hi a biapi mi asi. Pathian kan zumhnak cu zeitik hmanh ah thlah hlah uh sih. Mary Mandalin cu khua ah misual nu tiah timi a rak siko nain zeitluk a nun intro rak i dawh hlah seh law Bawipa Jesuh he an i ton tikah anun zia aa thleng i, thihnak in a tho `han mi kan Bawipa Jesuh Khrih tonnak caan `ha, hmuhnak caan `ha a ngei mi nu a rak si. Zeitluk hmanh in a nunnak intro rak i dawhhlah hmanhseh law a donghnak kha a bia pi mi asi.

Kannih hna zong Bawipa cungah zeitik hmanh ah titsaphaoh lo tein nun khawh kan i zuam ding hi kan rian asi. Bawipa cungah dingfel tele duhfek tein kan um mihi Pathian sinin fimnak ngan bik kan hmuh mi cu asi ko. Bawipa nih kan sin in zeihmah a kan hal lo. Bawipa nih kan sin zeihmanh a ruahchan mi um lo. A mah kha zumhfek tein kan nun a dih tiang i bochan ding le biakding kha a kan duh piak mi asi. Solomon siangpahrang bantuk si lo in Mary Mandalin ban tuk in kan nih hna zong Pathian sin ah zumhnak a dih nak in bochan hna u sih…. 

RVA in thawng`ha a rak ngai tu, thazaang a rak i lak tu nandih lak in Bawipa nih thlachuah in peko hna seh. Amen