Ruahchannak a kan Petu Nu

RVA in thlarau rawl a kawltu dawtmi u le nau vialte hna, nihin mithiang St. Bernadette puai tiin tuah a si ko nain, nihin ni hi cu Nu Mary Lourdes khua a langhnak, Our Lady of Lourdes puai kha vun langhter ka duh deuh. Nihin mithiang St. Bernadette nih Nu Mary a hmuhnak, a biaknak ni, Our Lady of Lourdes puai kan kannih hna nih kan tuah. Nu Mary cu Pathian a biami, Jesuh Khrih hnuzul vialte hna caah kan nu a si ve. Mithiang Bernadette bantukin Nu Mary hi kan nu a si cio ko timi kha kan theih a herh. 

Vawlei cungah nu le pa kan ngeih bantuk in Thlarau lei zongin kan nu le kan pa timi zong kan ngeih ding kha a si. Kan Bawipa Jesuh Khrih nih (Jn 19) vailamtah cung in special robia kha a kan roh takmi a um i, robia cu Nu Mary le Mithiang Johan sin in khan a si. Jusuh vailam cung aa thlai lio caah ah khan mithiang Johan nih a umpi ve bantukin nu Mary zong kha Jesuh ke hram a um ve. Cu lio caan te ah cun Nu Mary sinah “Minu na fa hi zoh tuah” tiah a ti. Na fa a timi ahodah a si? Johan kha a si. Cun a hnuah Johan sinah a ti `hanmi cu “Na nu kha zoh tuah” timi a si. Cuticun Jesuh Khrih cu vawlei a nunnak a dong lai te ah special robia a kan roh tak bantukin, Mary cu Jesuh a daw mi Khrihfa vialte kan nu ah a cang timi kha kan theih ding a si. 

Nihin hi puai ni ah cathiang rel ding in Bupi nih a kan pekmi cu (Jn 2) chungin khan a si i “Kanan khua `hitumhnak kong kha a si. Cu `hitumhnak puai ah cun Jesuh, Mary le zultu hna zong kha an sawm ve hna. Sawmmi ciocio an si. Sawmmi nih cun zeitikahdah rawl ei a cut lai ti bawh i rak ei cang uh tiah an ti tikah khan ei ding si ko. Sihmanhsehlaw anmah an phung lam ah rawl ei cut hlanlo paoh kha cu mitsur zuu kha dangh ding a si. Hi lehthahnak puai ah zeitluk in dah mi chaw ngei an si ti kho kan thei lo. An rum zong kan thei lo. An rum an sifak timi khi cathiang nih a chim lo. Sihmanhsehlaw sawmmi hna caah mitsur zuu nih a zat ti hna lo. Puai tlangtlatu pa zong nih “ziah an zuu um ti `unglo, mitsur zuu a dih cang `ung” tiah a ti hna maw, a ti lo. A dih taktak hlan ah a theitu cu ahodah a si? Mi zapi caah mitsur zuu a dih cang lai hi tiah a hmutu cu Mary kha a si. 

Dawtmi u le nau hna, nang le kei zong nitinte kan nunnak ah kan hal duhmi, kan chim duhmi, kan kawl duhmi vialte hi zeidah si i a herh. Kan herhmi a thei hmasatu cu Nu Mary kha a si ko. Nu Mary nih zeidah an herh timi kha `hitumhnak puai ah a hmuhsak tikah Jesuh nih zeidah a tuah? Cu hlaan ah cun Jesuh Khrih nih zei bantuk khuaruahharnak hmanh a tuah rih lo. “Ka caan a phan rih lo” a ti ko. Sihmanhsehlaw a caan phanh le phanh lo cu Jesuh nih aa hngalh ko. Sihmanhsehlaw kha caan ah ahohmanh nih an ka fial zongah ka tuah lai, ka tuah lai lo timi zong kha a ruat lai lo. Cu lio caan i mitsur zuu an ngeih ti lo caan ah a dang ah va kal i va lak ding zong um fawn lo. Jesuh nih “A ngeimi sinah va kawl uh” a ti fawn hna lo. Sihmanhsehlaw hi thil a pe khotu ka Fapa a um timi kha Mary lungchungah voikhatte a rak um. Mah ruangah cun Mary cu Jesuh sinah a kal i “ka fa mitsur zuu an ngei ti lo” tiah a va chimh kha a si. Hika ah Bawipa Jesuh nih hi `ihumhnak puai i din awk ei awk timi cu keimah ka rian a si `ung lo, keimah cu na ka fial awk a si tung lo” a ti ko. Sihmanhsehlaw, a tuahpiak hna lo cun zeitin a si khawh lai?” tiah a ngiar maw, a ngiar hlei lo. Aww, na si khawh lo a si ahcun zeitindah kan ti kon lai” a ti maw? a ti hlei lo. A kal i rian`uantu pawl kha “An fialmi paoh kha rak tuah u a ti hna.” Nu Mary nih cun ka Fapa nih cucu a tuah lai, khakha a tuah lai timi vialte kha a theih dih. Amah cu ka kut chungah a um ti cu a ti lo. Sihmanhsehlaw ka halmi paoh cu pek ko lai, ka hal ahcun a ka tuah piak ko lai ti kha zakhat ah zakhat a zumh. Cucaah an fial mi hna kha rak tuah uh a ti bantuk in khan cu puai rawl sertu pawl nih an tuah tikah, ralca chungah ti an rawnmi cu Jesuh nih “puai tlangtlatu kha hei dinh hnik uh, hei tehter hnih uh” a ti. Sin um pawl zong nih khuaruahhar thil cang mi cu an zoh maw, zei zuu ah a cang canglo ti an zoh lo, an hei tehter ko. Ziah hi bantuk in mi vialte cu a thawmi kha an din i a thaw lomi kha hnu ah an din cu, nang cu a thaw lomi pei na kan dinh hmasa i a thawmi kha hnu ah na kan dinh hi” tiah puai tlangtlatu nih puai tuah tu pa kha a ti.

 Dawtmi u le nau hna hika ah Nu Mary nih kan duh kan herhmi kha kan hal hlan hmanh in a kan tuah piak ko. Cun Fapa Jesuh Khrih nih ka hal poah cu a tuah ko lai timi kha Mary nih zakhat ah zakhat a zumh bantuk in zumtu Khrihfa vialte hna zong nih ‘a Nu nih a halmi paoh cu a Fapa nih a tuah ko lai’ timi ruahchannak kha kan ngeih ding a si. 

Voikhat ah, khual kan tlawn lioah RC ah a lutmi AG pastor pa nih a ka timi cu ‘Bible ca ka duhnak hi kum (20) leng a si cang, Bible ca ka relnak hi kum (20) a si cang. Mary min timi ka hmuh dah lo’ tiah a ti. Ka khuaruah hartuk ih “ka dua… kum (20) lengluang cathiang na rel ih Mary min na hmuh lomi khuaruahhar si, Biakam hlun chung i Mary a sawh hnawhchanmi, Pathian Nu a sawh hnawhchanmi kha cu na theihthiam lo zongah phundang, sihmanhsehlaw Mathhai thawng`ha chungah, Luke thawng`ha chungah Johan thawng`ha chungah Mary kong hmun tampi ah aa `ial ko. Na hmuh khawh lomi cu ka dua… na mitcaw bak ko” ka ti. Zeihmanh a holh ti lo. Luke thawng`ha chungah (Lk 1:28, 42, 48) kan rel, (Jn 2:1-12, 19) chungah kan hmuh `han. Kha vialte chungah Mary min ka hmulo na timi ka khuaruahhar tiah ka ti. 

Dawtmi u le nau hna Mary aa telnak kong a tam cem in a `ialtu hi Luke a si. Cun Johan zong nih Mary telnak kong kha a chim. Dawtmi u le nau hna, nihin ah a biapibik in, hi Lourdes Mary Puai a si bantuk in, thla cu kan cam ko nain, Rosary kan cam ko nain zeicahdah Rosary kan cam, hi rosary kan cam kan timi hi cathiang chungah um maw/ um lo timi hngalh loin khan an kan sawi tikah lungfak le ngaihchia in kan um men i kaa khat hmanh let kho hna loin rosary cam kha kan ngol `heo tawn. Cutin a si ahcun Nu Mary kan upatnak, thla kan cam kan timi hna zong hi hmual an ngei kho lai lo. Cucaah cathiang nih Thiang Thlarau lamhruainak in rosary camnak kong, Nu Mary upatnak kong hi cathiang nih Thiang Thlarau in a kan forh timi kha kannih nih ruat in, Nu Mary nih Fapa Jesuh Khrih kha a hal tikah pek loin a umlo timi kha kannih vialte nih nihin Lourdes Mary puai ni ah hin thei ko hna u sih. Mithiang Bernadette nih thla a cam tikah Nu Mary nih a dam lonak, a takpharnak zawtnak zong kha “khi zawnte ah vun huat law a chuakmi ti in khan i thuh law na dam lai” tiah a ti bantuk in mithiang nu nih a tuah i a dam `han,” timi kha kan hmuh. 

Cucaah “kan taksa-thlarau kan damnak hnga Pathian Nu a simi, Nu Mary sinah fuh ding a si ko. Zakhat ah zakhat a kan bawmh ko lai timi zumhnak ngeih in Nu Mary a bochanmi, Nu Mary sinah duhpatnak a ngei chinchin mi kan si khawhnak ding caah i zuam usih” timi kha forh buin khan ka bia ka donghter. Kan dih lak in, Nu Mary thlacam piaknak thawngin le St. Bernadette thlacam piaknak thawngin Bawipa nih lam kan hruai zungzal ko seh. Amen…