Our Lady of Lourdes
Lourdes Siangpahrangnu Nu Mary (1858)
Audio (aw) zongin ngai khawh a si.👇👇
St. Bernadette Soviras cu France ram, Lourdes khua ah 1844 kum ah sifak mi chungkhar in a chuak. 1858 kum, 11 February ni ah a hawinu pahnih hna he (The Gave River) timi tivahor ah thingro khawmh dingin an kal hna. Masa Vile lungkua an phak tikah a hawinu pahnih nih Bernadette kha an tliktak. Ruah lopi in thlifak hran thawng a hung thang i lungkua chung vialte kha ceunak in a khat dih. Cunglei a zoh tikah Angkifual rang cungah a dummi tairek he Rosary aa thlaih mi nu pakhat cu a kehram ah rose par pahnih he a rak hmuh. Bernadette cu Vailamtah hmelchunhnak i tuah aa zuam nain a ther pah caah a tuah kho lo. Angkifual rang aa hrukmi nu nih khan Bernadette kha a rak mir hi Rosary thlacam dingin a rak sawm.
Nithum a liam hnu ah Bernadette cu lungkua leiah a kalṭhan tikah Angki rang aa hruk mi nu cu a rak langṭhan. Amah nu nih Bernadette kha niruk chungte misual hna an nunzia i thlen awk le cu hnu ah Biakinn fate sakpiak ding kha Siangbawi hna sinah chimhpiak awkah bia a cah. Cun, cu hmun pawng i a ummi tivate i khuaruahhar ṭhawnnak a ngeimi ti kha din awkah a rak fial. Bernadette cu ni (15) chung cuka hmun ahcun a va kal tikah minung a thong tampi nih an rak zulh; nain pakhatte hmanh nih cu langhnak cu an hmu kho lo. Bernadette nih cu nu i a min kha a hal tikah “Kei cu, Sualhram ngei loin a semmi Nu ka si” tiah a rak leh.
1866 kum ah Nervas khua i ‘Zaangfahnak Sister Sianginn’ ah a rak lut. Amah he a umṭi mi a hawile hna nih toidor le pumpek in a um thiamnak kha an upat ngaite. Nikhat cu a hawile nih langhnak a hmuhnak kong kha an hal i Bernadette nih “Nu Mary nih keimah kha hmunthur thianhnak hmuhphiah bantukin a ka hman” tiah a rak leh hna. 1879 kum, amah kum (35) a si ah a thiangmi Rosary in thla a cam liopi ah Bernadette cu a rak thi. 1980 kum ahcun a pum kha rawk loin le a hmurte cu Vancungram lawmhnak pangpar a par kha an hmuh. 1933 kum ah Pope Pius nih Mithiang sinak a rak pek. Kumfa tein minung thong tampi hna cu thlacam dingin le khuaruahhar ti din awkah le Pathian sinin pumsa le thlarau caah veel thluachuah hmuh awkah Lourdes khua ah an kal lengmang.