Chungthu – Lengnaal

Mark 7:1-13 (Tuesday 2026) Fr. Abraham Hrang Hit

Dawt mi u le nau hna Thawngtha bia in thlarau ti rawl i lak dingin kan sawm hna. 

Nihin cathiang kan relmi nih a kan cawnpiak duh mi, nuncan ziaza ah cawn awk ah a kan lak ter duhmi cu “Chungthu lengnal” timi kha a bia tlangpi ah ruah ti kha kan duh hna. 

Nihin thawngtha bia kan rel nak chungah kan Bawipa Jesuh Khrih nih Farasi mi hna thinlung kha a langhter. Lamkaltu hna nih rawl an ei tikah kut tawl loin rawl an ei ti a si. Judah mi phung ah an pupa hna nih rawl an ei tikah kut tawl ding timi kha an pupa phunglam a si. Mah phunglam kha, a chanchan in, a tu tiang zongah an zulh ko hna lai. Cucaah, Jesuh lamkaltu hna kha chim loin khan Jesuh kha an chimh. “Zeiruangah dah na hnu zultu hna cu rawl an ei tikah kan pupa phung zul loin, kut tawl loin rawl an ei. Kan phung an buar, kan pupa phung pei an buar hi” tiin lamkaltu hna kha an soi piak. Cu tikah Jesuh nih zeitindah bia a leh hna, “Nan chimmi cu a hmaan, ka chimh hna lai. An theih lo caah a si” a ti maw? “A ti lo.” Lamkaltu hna cu Amah thimmi an si caah a cawnpiak ko hna. A tanh zong a tanh ko hna. Farasi mi hna nih an soi hna zongah Jesuh nih cun a hnuzultu pawl cu a tanhpi peng ko hna. 

“Nannih Farasi mi hna cu a leng lei lawnglawng kha nan kholh i a chung lei kha nan kholh tung lo.” Farasimi hna nunzia bangin kan nih zong a caan ah cun kan um kho ve. A caan ah cun leng lei zoh dawhnak lawng khi kan uar theo tawn. Sihmanhsehlaw, Jesuh Khrih nih lungthin thian a herh deuh tiah ralrin a kan pek theo. Ahohmanh nih a chung lei cu an hmu lai lo, tiin minung nih kan ruah tawn. Khuate lei zongah, biakinn chiate, biakinn fate cu kan duh lo. “Hawi nih biakinn lian taktak an sak, kan nih zong nih tlakrawh biakinn tha taktak sa ve u sih” tiin lenglei dawhnak lawng kha kan uar theo tawn. Sihmanhsehlaw, Jesuh Khrih nih cun lenglei dawhnak lawng kha a uar lo. 

Solomon Siangpahrang zong nih Biakinn a sak mi ah khan, Isarael mi lak ah Pathian um ning kha a langhter. Biakinn timi cu Pathian umnak a si. Jesuh nih zei a ti hnga? “Hi Biakinn cu ka Pa umnak a si. Ka Pa sinah thlacamnak a si. Chawleh chawhlawhnak inn a si lo” tiah a ti.  Cucaah, Biakinn timi cu Israel Pathian umnak a si. Cubantukin, nang le kei zong Thlarau Biakinn pi kan si ve. Thlarau Biakinn kan ti ah cun a leng lei kha a biapi mi a si lo, a chung lei a thian hlim mi kha a herh deuh. Cucaah, chunglei thianhlimhnak nih kan ziaza a langhter theo. 

Farasi le Phungbia cawnpiaktu saya pawl nuncan ziaza a si mi Chungthu lengnal lungput kha kan hlonh a hau lai. “Lungthin a thiang mi cu mi lunglawm an si, Pathian kha an hmuh lai” tiah Jesuh nih a ti. Cucaah lungthin thianhlim a herh tuk mi a si. 

Nihin ni ah mithiang Sholastica puai nih kha kan tuah hna. A tapa hi mithiang Benedict a si. Khuapi pakhat ah a um timi an si. A caan caan ah St. Benedict sinah St. Scholastica le a hawi le hna cu thlacam nak an ngei ti tawn hna. Nikhat cu St. Scholastica nih St. Benedict kha ‘nihin cu kan sinah riah ko’ tiah a ti. Cucu St. Scholastica a thih hlaan te nihnih aa duh a si. Sihmanhsehlaw, St. Benedict nih cun ‘a si kho lo. Ka umnak hmun ah ka kir a hau ko tiin a leh’ ti a si. Cu tikah mithiang nu nih cu a ta pa tlung hlah seh, an sin ah khan riak ko seh ti duh ah thla a cam ti a si. Cu tikah thil a hrang, ruah fakpi in a sur ti a si mithiang pa cu tlung kho ti loin St. Scholastica te sinah cun zaankhat a riak ti a si. A thaizing a umnak hmun lei a kir tikah a cung lei in thuro pakhat a zuan peng ko kha a hmuh ti a si. Cu thuro cu mithiang nu i a thlarau a si ti a si. Cucu mithiang nu nih ‘Kei cu vawlei ah ka um ti lo, Van ah ka um cang’ tinak ah langhter nak a hmuh sak nak a si ti a si. 

Nihin puai Bupi nih a kan tuah piak mi “Mithiang Sholastica le a ta pa cu mi lungthin thiang, Pathian caah an nunnak aa pe mi an si” timi kha a si. Kannih vialte zong lungthin thiang tein Bawipa rian a tuan tu, Bawipa hnu a zultu si khawh kha i zuam u sih. Zeithil kan tuah paoh ah lungthin thiang tein um khawh le nun khawh kha i zuam u sih.  

Farasi mi hna bang siloin, ‘chungthu lengnal’ mi nunzia kha kal tak in mithiang Sholastica bantukin khan Bawipa Pathian a hmu mi nunnak, Jesuh hnu zul si kha i zuam u sih. Cuticun kan nih hna zong Pathian fanu fapa kan sinak kha man kan ngeihter khawh lai. 

Vawlei thil duhnak lawng tein kan khah, kan nun ko a si ah cun, Pathian rian kan tuan ko kan ti zongah, Pathian rian kan tuan, a Biakinn thiang kan sa ka ti zongah kan lungmuru kha a thian lo a si ahcun Farasi mi hna bantuk khan midang lawng a thangchiat tu, mi lawng a soi tu, mi zei ah a rel lo mi Farasi mi bantuk, “Chungthu lengnal” kan si sual lai timi kha i ralring u sih timi kha forh kan duh hna.