Minung zuarnak (Human trafficking) cu Minung caah Ṭinungral Sualnak asi
Vawleicung pumpaluk huap in 12nak Minung Zuarnak Dohnakni (World Day against Human Traficking) ah Pope Leo XIV nih thawngthanhnak a chuah i Catholic Bupi nih hi bantukin minung le minung i zuarnak sualnak nganpi hi doh le donghter awk ah teimak tein ṭan laknak a ngeihnak kong a chim. Chanthar sal sinak asi mi hi harnak hna cu online cung i rianṭuannak hna nih buainak a chuahpi chinchin tiah minung le minung i zuarnak kong ah February 8 Pope nih a mawhchiatnak a langhter. Minung le minung i zuarnak ṭihnung sualnak cu a rannak in hloh asi nak hnga le doh awk le donghter awk ah Catholic Bupi cu kawh kan si tiah a chimchap. Khrih nih thawhṭhan hnu ah a chimmi “nan cungah Daihnak cu um ko seh” a ti mi kha ruah buin “ minung miphun thar sinak ah i tharchuah awk ah lam a kan hruai” tiah a ti.
A hmaanmi daihnak cu Pathian nih minung pakhat cio sin ah a pekmi limhang (dignity) kha upat hmaizahnak le cohlan piaknak in ai thawk tiah a ti. Sihmanhsehlaw, thahnawnnak a karh chin i tampi cu mah le nawl ngeihnak le ṭhawnnak a hmunh khawhnak hnga caah hriamnam hmangin daihnak kawl an i zuam. Raltuknak, ramkhel lei le rumnak duh ruangah minung nunnak tampi nunnak tampi kha an hrawh hna tiah Pope nih ngaihchia ngai in a chim. Ram boruak a ṭhatlo ruang ah le tukdohnak hna ruangah cheukhat hna nih caan ṭha ah i lak in minung nunnak zeirel lo nak le minung zuarnak a chuahter. Hi thil hna hi a bik in nu le ngakchia hna nih an tuar bik. Online rian ṭuannak le hlennak a karh chin lengmangmi nih cu nih hlennak le ritnak sii zuarnak le a dangdang i hlenthawinak tampi a chuahpi. Cu tikah hlen a tuartu hna cu sualnak a tuahtu dirhmun lak dingin forh tik ah a lungretheihnak hma a zualter,” tiah a ti. “Hi bantuk harnak a tongmi hna kha hnon ding le hlawt ding an si lo i Khrih nih a dawt bantukin zeitindah dawt ding a si. ti a philh cangmi nunphung hmelchunhnak an si. Hi bantuk fahnak le harnak kan ton tikah Khrihfa hna nih thlacampiaknak le ralrin peknak, thawngpang i chimh cio nak in kan i bawmh cio awk a si. Thlacamnak cu dinfel lonak le zeirel lonak kan dohnak ah thazaang a kan petu “meizik” asi. Kan tonmi harnak, abik in online hlennak a phunphun tei khawhnak ṭhawnnak a kan petu le a kan bawmtu asi. “ Pathian nih a mah muisam keng in a kan sermi kan si ti mi hmuhnak thar le ruahnak thar kan ngeih lawngah “minung le minung i zuarnak le hramhram in pakhat le pakhat cung ah a miak hmuh duh ah harnak i peknak hna le sual ṭha lo” hna cu kan tei khawh lai tiah a ti.