ZEIZONG TUAH KHO
Pathian sining min vialte ahhin zeizong vialte a tuah khawhnak lawng hi zumhnak bia ah telh a si. Hi ṭhawnnak hi kan nunnak ah hmual a ngei ngaingai. Kannih nih a ṭhawnnak hi van le vawlei dihlak caah a si tiah kan zumh. Zeicahtiah Pathian nih zeizong vialte kha a ser lawng si loin a tuah i a uk dih. Pathian ṭhawnnak cu duhnung a si, zeicahtiah amah cu kan Pa a si, khuaruahhar awk a si, zeicahtiah derthawmnak ah a tling in a tuah” tikah zumhnak lawng nih a thleidan khawh. (Gen 1:1, Jn 1:3, Mt 6:9, IICor 12:9, ICor 1:18).
Cathiang nih Pathian ṭhawnnak kong kha atu le atu a chim. Amah cu, “A ṭhawngmi Jacob Pathian,” “Van ralkap run Bawipa,” “A ṭhawng i a liannganmi” ti in a auh. Pathian cu van le vawlei ah zeizong tuah kho a sinak cu van le vawlei kha a ser caah a si. (Gen 49:24, Is 1:24, etc. Ps 24:8-10, 135:6). Pathian caah a si kho lomi zeihmanh a um lo i zeizong vialte kha a duhning in a tuah dih. (Cf. Jer 27:5, 32:17, Lk 1:37). Amah cu van le vawlei Bawipa a si i, a ningcang tein a chiah hna, amah tangah an um dih i amah duhnak bangin an um dih. Amah cu tuanbia ṭialtu a si, lungthin le thil a cangmi kha a duhning in a uk dih hna. “Thazaang lianhnak hmuhsaknak cu na ṭhawnnak chungah a um i na ban tha cu ahonih dah a derh kho hnga? (Fim 11:21, cf. Est 4:17b, Phungt 21:1, Tob 13:2). “Nangmah cu mi vialte cungah zaangfah thiammi na si, zeicahtiah zeizong vialte kha na tuah khawh dih” (Fim 11:23). Pathian cu zeizong vialte a tuahkhotu pa a si, Pa a sinak le a ṭhawnnak hi pakhat cungah pakhat an i ceuh. Pathian nih Pa a sinak in zeizong vialte a tuahkhawhnak kha kan herhbau mi vialte ah a kan zohkhenhnak in a phuan. Fa sinak kha a kan pek i chimcawklo a zaangfahnak in kan sualnak kha a a kan ngaihthiam. (2Cor 6:18, cf 6:32).
A parpavuan in vun zoh ahcun Pathian hi zeihmanh a tuah kho lomi a lo. Zeizong tuah kho Pa Pathian cung zumhnak hi ṭhatlonak le temhinnak nih a hneksak khawh. A caancan ah Pathian hi a um lomi le ṭhatlonak a daih ter kho lomi a lo. Mah hi khuaruahhar biathuk pakhat a si. Pathian kan Pa nih zeizong vialte a tuah khawhnak ṭhawnnak cu a Fapa i lungtho tein nautatnak a innak le a thawhṭhannak in ṭhatlonak a teinak ah khan a langhter. Khrih vailamtah a innak cu Pathian ṭhawnnak le fimnak a si. “Zeicahtiah Pathian a hruhnak cu minung fimnak nakin a fim deuh i, Pathian derthawmnak cu minung ṭhawnnak nakin a ṭhawng deuh” (ICor 1:24-25). Khrih a thawhṭhannak le a hlawrhnak in a zummi hna kan chungah relcawklo a lianngan ṭhawnnak kha a hmuhsak. (Eph. 1:19-22).
Zumhnak lawng nih Pathian a ṭhawn zia kha a pawm khawh. Mah zumhnak nih hin derthawmnak chungin Khrih a ṭhawnnak kha a pawrhlawt ter. (Cf. IICor 12:9, Phil 4:13). Ngaknu Thiang Mary kha hi zumhnak ah i zohchunh awk a si. Zeicahtiah, “Pathian caah a sikho lomi zeihmanh a um lo,” ti kha a zumh i Bawipa kha a thangṭhat. “Zeicahtiah a liannganmi nih ka cungah thil lianngan kha a tuah cang, amin cu a thiang” (Lk 1:27, 49) a ti. Pathian nih a tuah khawh lomi zeihmanh a um lo tiah fek tein i tlaihnak nakin kan zumhnak le ruahchannak kha a fehter deuh khawhmi zeihmanh a um lo. Kan lung nih Pathian ṭhawnnak le lianngannak kha a vun theihthiam cangka zumhnak bia nih zumh awkah a kan chiah piakmi vialte kha i laklawh loin kan pawm, kan cohlan khawh. Zeibantuk khuaruahhar awk thil sining lengpi hmanh ah va si ko sehlaw kan zumh khawh cang lai a si.