Technology cu minung caah rian a ṭuan awk a si i minung kha a ai-awh awk a si lo

Pope Leo XIV nih minung fimthiamnak(technology le AI ) hna nih minung sinak limhang cungah upat hmaizahnak a zortertu si loin minung caah rian a ṭuan khawhnak hnga i ralrin awk a herh tiah avoi 60 nak (World Day of Social Communication) ni caah chimh thanhnak a ngei. A ra laimi 17 May 2026 ah tuah dingmi World Day of Social Communication caah Pope nih biacahnak le thawngthanhnak ca a chuah. Cu thanhca ahcun a bik in AI le a dang technology he aa pehtlaimi minung fimthiamnak kong ah ralrin peknak an i tel. Pope nih a chimmi cu, minung pakhat cio nih kan ngeihmi kan mui hmai le kan aw hna cu i dannak le i lawhlonak an ngei dih cio. Hi digital le AI chan ah minung fimthiamnak nih a chuahpi mi le a bik in i pehtlaihnak (communication) caah hmanmi thilrih le fimthiamnak cu minung caah ṭhatnak a chuahpitu le minung caah rian a ṭuantu asi awk asi i, minung ai-awhtu asi awk asi lo. Hi fimthiamnak le ṭhanchonak hna nih minung kan limhang (human dignity) a zorter awk a si lo zia kha i ralrin awk asi tiah a thanh. Minung cu, Pathian muisam keng in sermi kan si i bia (holh) hmangin i pehtlaih awk Pathian nih a kan ser i a kan kawh. Cucaah, minung pakhat cio kan muihmai le kan aw cu Pathian muisam le Pathian aw a kengmi kan si caah minung serchommi thilri le fimnak in thlen a sinak hnga lo kilven le zohkhenh awk asi. Minung cu science fimnak le biochemical formula in sermi kan si lo. Digital thiamnak, abik in mui-hmai le lungthin a thleng khomi Artificial Intelligence system hna nih minung pehtlaihnak ah a biapi tukmi thil a thlen khawh tiah Pope nih ralrin a pek. AI nih a chuahpi mi pakhat cu minung nih khulrang tuk in khuaruahnak, chiaṭha thleidan thiamnak ṭumchuknak le AI cung ah hngatchannak a karhchin ruangah minung nih konglam ngeitein khuaruah thiamnak le pakhat le pakhat i pehtlaihnak cungah hnahnawhnak le ṭihnungral a chuahter khawh. AI nih minung hna kha tuaktan khawhnak a zorter i pumpak rianṭuannak zong a tha a derter tiah a chimchap. Hi harnak le zuamcawhnak he pehtlai in ṭuanvo ngeihnak, i bawmhnak le fimcawnnak kha a herhmi hrampi ah Pope nih a chiah. Technology sertu hna, ramkhel nawlngeitu hna, thawngzamhnak lei thiamsang hna le fimcawnnak lei rianṭuantu hna nih minung sining limhang (human dignity) upatnak hmaizahnak he minung fimthiamnak hna kha hman awk ah sawmnak a tuah.