St. Paul Lungthlennak, Apostle (64)

Audio (aw) zong in ngai khawh a si. 👇👇

Biaknak dang (Gentile) mi hna lamkaltu Paul cu Turkey ram, Tarsus khua ah Judah phung aa tlaih mi nu le pa nih an rak hrin. Amah cu Rome mi sinak in an hrin mi a si. Fimnak rum deuh dingah Jerusalem khua i an hun mi Camilite Sianginn ah a kai i a reng ngaimi Farasi hna upadi kilven nak tangah fimnak a rak cawng. Judah mi upadi ah a lung a ṭhawntuk caah St. Stephen kha lung in an cheh i an thah lio ahkhan a bawmh hna i Khrihfa hna hremnak an tuah i a hmaan lomi zumtu bu pakhat si awk an tuah lio zongah a rak i tel ve. Cu bantuk rian hna ṭuan awkah tlangbawi ngan hna nih ṭuanvo an rak pek caah Damascus khua i Khrihfa hna kha va tlaih i Jerusalem leiah rak hruai dingin Saul cu a rak kal.

Damascus khua a phak laite, chun laicer ah Vancung in ceunak pakhat nih ruah lopi in Saul cu a rak cerh i vawlei ah a tlu. Cun, awthawng pakhat nih, “Saul, Saul zeicahdah na ka hrem?” tiah a ti i, Saul nih, “Bawipa, ahodah na si?” tiah a hal ve. Aw nih cun, “Keimah cu na hrem liomi Jesuh ka si, atu bak ah tho law khua chungah va lut tuah, zeidah na tuah lai timi kha kan chimh lai” tiah a ti. (Lam 9:4-6). Sual he a kalṭi mi hna cu holh kho loin an dir hna. Annih nih awthawng kha an theih ko nain zeihmanh an hmu lo. Saul a dir lioah a mit pahnih cu khua zeihmanh a hmuh lo caah a hawile nihcun khuachung tiang an hruai. Nithum a rauh hnu ah Ananias timi pa cu inn chungah a ra lut i a lu cungah a kut a chuan hnu ah “Ka naupa Saul, Bawipa Jesuh nih nangmah mit hmuhṭhan ding in le Thiangthlarau he na khahnak ding caah keimah kha a ka thlah” tiah a ti. Cu hnu ah Saul (Paul) zu tipilnak a ing.