St. Francis de Sales, Bishop & Doctor, (1567-1622)
Audio (aw) zong in ngai khawh a si. 👇👇
Bishop Geniva min pek mi St. Francis de Sales cu France ram, Saboul khua ah 1567 kum ah a chuak. A ngakchiat tein pekchanh raithawinak kha a tlaihchan mi a si bantukin zungzal in a thianhlimnak kha biakam in amah cu Ngaknuthiang Mary i bawmhnak le khamhnak tangah a pum kha a rak pekchanh. Paris khua ah kum tam nawnpi fimnak a cawn hnu, kum (24) a si ah Padua University in upadi le professor degree a laak. 1593 kum ah a pa nawlpeknak in Siangbawi cannak a lak hnu ah hriamtlai protestant an tamnak hmun a simi Genivao tlang lei i ṭihnung ngaimi Charle Blace peng leiah mission rianṭuan dingah amah tein aa thawh. Zankhat cu cenghngia pakhat dohnak ral kha a rak ing i zan khuadei te thingkung cungah kai in a nunnak a himter. A thaizing zingka ah a thi deng mi St. Francis de Sales kha “Pathian nih a thimmi minung hna cu a veel thawng lawnglawng in khamhnak an hmu te lai” tiah zumhnak a ngeimi phu nih an rak hmuh i an rak zohkhenh. St. Francis de Sales i dawtnak le a fimnak in phung a chimnak thawngin cu zumhnak a ngeimi hna cu Catholic zumhnak ah an i thleng. 1595 chungah amah thah awkah chiat aa serh mi mithattu pa nih voihnih khengte a fuh nain khuaruahhar awkin thihnak chungin a luat. A rianṭuannak karlak in caan a laak i Bupi cawnpiaknak karh dingah thanhnak cazual hna le cauk hna zong a rak ṭial. St. Francis de Sales a phakka ahcun Charle Blace peng ah Khrihfa zumtu (20) tluk lawng an si nain a hnu kumli a rauh hnu ahcun zumh a thong tampi cu Bupi chungah a rak lut. A mission teinak a hrampi kha an hal tikah amah nih, ‘dawtnak kha hmaisa in a cawnpiakmi hna cu bia alnak kaa khat hmanh an tuah lo nain zumhnak a palh mi hna kha fiang tein a cawnpiak khawh hna’ tiah a leh hna.
1602 kum ah Geniva Bishop sinak ah a rak thim ni thawkin Pathian bia cawnpiaknak, phungchim in cawnpiaknak le sualthlah ngaihpiaknak hna in lungtho ngaiin rian a rak ṭuan. Amah cu a nun a nem i a peksian lawng si loin mikip cungah zaangfah zawnruahnak a ngeihnak kha a langhter. Pathian dawtnak kong hrilhfiahnak cauk chungah “Dawtnak pedan cu rikhiah loin dawtnak a si” tiah a rak ṭial. Martin an timi hnachet pa kha a inn ah a au hi kutke in biachim thiamnak he Khrihfa zumhnak kha a cawnpiak. Cu caah St. Francis de Sales cu hnachet mi hna bochan awktlak Mithiang pakhat a rak si. 1610 kum ah St. Jane Francis bawmhnak in “Nu Mary nih Elizabeth sin a va lennak bu” kha a rak dirh. St. Francis de Sales cu a kaa in “Jesuh” tiah a chim buin 1622 kum, Louis khua ah a rak thi.