Mi nih an intuarmi fahnak kha tuarpinak le i hrawmnak in dawtnak langhternak

Avoi 34nak Vawleicung Mizaw le a damlomi hna Ni (World Day of Sick) caah Pope Leo XIV nih bia a cahmi ah, zumtu hna kha Samaria miṭha pa bantukin harnak a tong i bawmhchanh a herhmi hna cungah zaangfah zawnruahnak ngeih awk ah le mi nih an intuarmi zawtnak le nganfahnak kha intuarpi ve nak thawngin an cungah dawtnak langhter awk ah a sawm hna. Samaria miṭha pa i thinlungput le zaangfah zawnruah dawtnak rianṭha ruahnolhnak le philhlonak caah tuahmi Vawilei cungpumpaluk um Mizaw Midamlo hna Ni cu a ral laimi 11 February 2026 ah Chiclayo khualipi, Peru ram ah tuah ding asi. Cu World Day of Sick caah Pope Leo XIV nih January 13 ni ah min a thutmi cakuat ah Samiria miṭha pa nunzia cawn awk le mizaw midamlomi hna cungah dawtnak ngeih dingin cakuatnak le sawmnak a ngeih. Zatlang nunphung dawh le dawtnak rianṭuannak caah, abik in mizaw le hartongmi hna bawmhchanhnak thinlung ngeihnak caah Samria miṭha pa tuanbia nih a kan cawnpiak i lam a kan hruai tiah a ti.

Mithiang Luke nih a tialmi Thawngṭha ah, phunbia cawnpiaktu say nih a dawt awk a simi innpa kha hngalhter dingin Jesuh kha bia a hal tikah, Jesuh nih a lehmi cu; Jerusalem in Jeriko lei a kalmi pa cu damiah nih an tuk an velh i a thi cang tiah an kaltak. Tlangbawi pakhat le Levi mi pakhat nih an lanhtak lio ah, Samaria mipa pakhat nih a zaangfah i a hma kha a tuam, a menpiak i khualbuk ah a kalpi i a zohkhenhnak kong kha ruahṭhan awk ah a sawm hna. 2020 kum ah tleicia Pope Francis nih thanhca a rak chuahmi (Unau ṭafar bantukin a nungmi zatlang nunphung) kong kha a chimh hna. Cu nun phung cu pumpak thazaang chuahnak le i zuamnak pakhat lawngin a za lo. Pathian sin in a ra mi, a saangbik dawtnak cu pakhat le pakhat i hawikomhnak, i bawmhchanhnak ah a langh awk asi. “Naih tein umṭi i bawmhchanhnak ah lawmhnak, mizaw hna cungah ṭha tein zohkhenhnak nih Pathian he a kan naihter i innpa chakthlang he rualrem te le i daw tein kan umnak nih Pathian dawtnak a langhter.