St. Vincent, Deacon & Martyr (304)

Audio (aw) zong in ngai khawh a si. 👇👇

Spain ram caah hmasabik Mithiang a rak simi St. Vincent cu Saya Gogsa ukchung i Deacon pakhat a si. AD 304 kum, Dasium Siangpahrang nih Khrihfa hna a hremnak chan chungah amah le Bishop Balius hna cu Balamsia thong ah an rak thlak hna i rawl ei awk um lo, rawlṭam tihalnak le sifah temhnak phunphun an rak ing. Ṭhihphaihnak hna, lemcoi in minthutter nak kha zei an rel lo nak kong le an zumhnak caah zeibantuk thilrit paoh phorh dingin timhcia an sinak kong kha Bishop ai in St. Vincent nih biaceih bawi sinah ca in a rak kuat.

Cu tikah Dasium Siangpahrang cu a thin a hungtuk i St. Vincent kha hremnak, sifah temhnak phuntling a inter. Amah kha ṭemnak ṭheng ah an ihter i, a sa kha thirso in tlawm tete in an beuh hna. Cu hnu ah a titsa kha cite an thuh i a em. A hnu bik ahcun belkuai dip tampi an vorh mi thonginn zelṭuang ah an hlonh i cuka ahcun St. Vincent cu a thi. Cutluk sersat in an hrem lioah dai tein a in mi kha a hmu mi thonginn hngak pakhat cu a khuaruah a hartuk caah a sualnak hna kha aa ngaichih i a ziaza aa thleng. A ruak cu songkhoi ah an khumh i rili chungah an hlonh nain Khrihfa hna nih an kawl i an hmuh. Cu ni thawkin St. Vincent upatnak kha Bupi chungah a rak karh.