21 January – Wednesday

Mark 3:1-6

Kut a zengmipa

The National and International Religion (August 23, 1993) nih America ram ah tuahmi hlathlainak ningin, Catholic zatuak sawmriat le pariat le Presbyterian le Methodist thawngṭha chimtu tam deuh asiloah an zumhnak hrawm aa zuammi hna nih “mi hna cu an nunchung ah midang caah thilṭha an tuah ahcun vancung ah hmunhma an hmuh lai” tiah an zumh tiah an ti. Keimah pumpak zong nih ahmaan tiah ka zumh.

Nihin thawngṭha ah, Jesuh cu Sabbath ni ah synagogue pumhnak ah i tel awk le lunghrinhnak um loin, phungchim awk le Sabbath ni ah thilṭha tuah cu a phung a si ti langhter awk ah synagogue chungah a lut ṭhan. Cucu fehternak caah, a kut a zengmipa cungah khuaruahhar thil a tuah. Mizaw kong cu zaangfah awk ngai a si. A kut a rocar caah a nunnak caah rian a ṭuan kho lo i zaangfahnak le bawmhnak caah aa tlak bikmi a si. Cucaah anmah le anmah aa bawm kho lomi hna cu bawmh an si lai.

Asinain mibu hna le Farasi pawl telin  mizawpa le Jesuh cungah zaangfahnak an ngei lo ngai. Hi sifak mipa caah thlacamnak tuah loin, a damnak kham awkah an tuah khawhmi paoh an tuah. Khrih cu Sabbath ni ah na damter ahcun Sabbath buartu tiah sual kan phawt lai tiah an hrocer. Asinain an hrocernak nih Jesuh kha rianṭha ṭuan awk le cu pa i a ngandam ṭhannak hnga bawmh awkah a kham lo.

Francis Kong i cauk, One day At A Time (book 3, pp.247-249) chungin “Na Nun Khawhnak Nawlbia 12” hi ka rel, cucu nifatin thilṭha tuahnak ah kan lamhruaitu zong a si kho lai ti ka zumh. Tahchunhnak cheukhat zong a pek hna i kan in hrawmh hna lai:

1. Na hun ahcun… khar. Pakhat nih ha ṭawlnak sii a hun nain ahohmanh nih khar an duh lo.
2. Na on ahcun… phih. Pakhat nih TV a on nain ahohmanh nih an phih lo, thazaang asiloah mei man sungh a si.
3. Na on ahcun…hrenh tuah. Mi pakhat nih innka a hun nain kharṭhan a philh, midang i fir awkah tukforhnak a si.
4. Na ṭhial ahcun… chiaṭhan. Mi pakhat nih a rembik in TV show zoh khawhnak ding caah cabuai pakhat a ṭhial, asinain a zoh hnuah cabuai kha a hramthawknak hmun ah a chiah ṭhan.
5. Midang ta a si i na duh ahcun…nawlnak hal. Na ta a si lomi thil kha hmannak nawl na hmuh hlan lo cu va lak hlah.
6. Zeitindah hman ding a si ti na hngalh lo ahcun…chiah ko. Zung thilri tampi cu hmannak kong hngalh loin tawngh ruangah a rawk.
7. Na cawi ahcun… pekṭhan. Na cawimi thil a um ahcun bia na kamcang caah pekṭhan ko.
8. Na hman ahcun… zohkhenh. Thil zohkhenhtu ṭha nih cun a hmanmi thil kha zeitindah zohkhenh ding a si ti kha a hngalh.
9. Na hrawh ahcun…remh. Mi tluangtlam nih cun cu thil hna cu a hrawh lonak hnga a zohkhenh hna.
10. Na remh khawh lo ahcun… a tuah khomi pakhatkhat kha auh. Mithiam pakhat kha auh asiloah na hrawh lai.
11. Na hrawh ahcun…thianh. Buainak hna cu na duhning in an phisin lo caah midang kha mawhchiat hna hlah.
12. Mi pakhatkhat kha ni na ceuter khawh ahcun… chim ko. A hmaanmi thangṭhatnak chim;      zeihmanh a dih lo nain midang kha an si khawh chungin tuah awkah thazaang a pek khawh hna.

Dawtmi ulenau hna, rianṭha ṭuan in Khrih caah pekchanhnak in nunnak kha tlamtling tein hmang hna u sih; hihi atu ah abiapi bikmi a si.