DR Congo le Tilian ruangah har tongmi Thlanglei Africa mipi hna caah Pope nih thla a campiak hna

Democratic Republic of the Congo nichuahlei ah a cangmi buaibainak ruangah thahnawnnak a chuakmi kong le, Africa thlanglei ah nikhua chiat ruangah harnak a tongmi hna cungah kan tuarpi ve hna, an ngaitchiahnak kan i hrawm ve tiah a langhter. Cu buaibainak ruang le kahdohnak ruang ah mi tampi cu an inn le an lo kaltak in a himnak hmun ah an zam tiah January 18 ah Angelus Thlacam a dih ah Pope nih a chim. Burundi peng pawngkam i a chuakmi kahdohnak ruangah tualchungmi hna cu a himnak hmun ah zam dingin fial asinak kong a chim chih. Hi bantuk buainak cu biaruahnak le i ceihmainak in daihnak lam kawl dingah le an caah thlacam piak ding ah mipi sin ah forhfialnak a tuah.

Kahdohnak ruang i a chuakmi harnak lawng siloin ruah a surtuk ruangah lei a min, a cim i DR Congo nichuah lei khualipi pakhat ah a tlawmbik minung 18 nunnak a liamnak kong le harnak a zualnak chin a ruang zong Pope nih a chim. Ral hrial in a zammi hna cu an har ngaingai. Ei din tirawl, sii, dinti hna an herh ngai i cu lak ahcun, thisen chungtliknak zawtnak nih a den chih hna tiah a langhter. Africa thlanglei i a chuakmi hartong hna, nanmah he naihniam tein kan um tiah Pope nih a ti. Africa thlanglei ram hna ah ruahpi faktuk in a sur caah inn le lo, thilri vialte an rawk dih leng ah minung 100 leng nunnak a liam. Cu ram hna cu abikin Mozambique, le Zimbabwe hna ah hin a zual biknak hmun an si. Hi ram hna nih an tuarmi ngaichiatnak le harnak vialte cu Catholic Bupi nih kan in tuarpi ve hna, nanmah he thinkhat lungkhat le naihniam tein kan um tiah Pope nih a chimh hna.