THUMKAWMH RIANṬUANNAK LE ZUMHNAK BIA
Pathian cu dawtnak a si: Pa le Fapa le Thiang Thlarau in Pathian nih siangngai in a sungmi a nunnak i sunparnak kha pek a duh. Cu bantuk cun Pathian nih vawlei hramthawk in a dawtbik a Fapa chungah a rak ngeih ciami dawtnak khuakhannak a si! “Amah nih kannih kha a fale si awkah a kan timh cang” i fa sinak kha thlarau thawngin a Fapa muisam ah a kan ser awk kha a si. (Eph. 1:4-5, Rom 8:15, 29). Hi khuakhannak hi, “Chan a um hlanpi in Khrih ah kanmah sin pekmi veel” a si i cucu Thumkawmh Pathian dawtnak in a rung luangmi a si. (2 Tim 1:9-10). Mah khuakhannak hi van le vawlei sernak, sualnak chung tlak hnu khamhnak tuanbia le Fapa le Thiang Thlarau thlahnak ah a lang dih i, Fapa le Thiang Thalrau rianṭuannak cu Bupi rianṭuannak ah pehthluahmah a si.
Pathian rianṭuannak dihlak hi person pathum nih an tuahṭi mi a si. Zeicatiah Thumkawmh Pathian nih cannak pakhatte a ngeih bangin rianṭuannak pakhatte a ngei. Sihmanhsehlaw person pakhat cio nih anmah pumpak ngeihning cio in ria cu an ṭuan. Cucaah Bupi nih Biakam Thar kha zulh in, “Pathian pakhat a um i, amah sinin zeizong vialte cu an si dih. Bawipa Jesuh Khrih a um i amah thawngin zeizong vialte cu an si dih. Thiang Thalrau pakhat a um i amah chungin zeizong vialte an si dih,” tiah a ti. (Council of Constantinople, cf. Eph. 4:4-6). A biapi bik in Fapa minung a cannak le Thiang Thlarau laksawng ah Pathian person sinak cu a lang khun.
Voikhat tein hmunkhatte ah pumpak rianṭuan a si bangin Pathian rianṭuannak ah person he aa tlakning le an sinak he aa tlakmi kha a lang. Cucaah Khrihfa nunnak dihlak hi person pakhat cio he i kawmhnak a ngei dih. Ṭhennak zeihmanh a um thiam lo. Pa Pathian kha a thangṭhatmi nih Fapa thawngin Thiang Thlarau chungah a thangṭhat. Khrih hnu a zulmi kip cu Pathian nih a hnuh hna i Thiang Thlarau nih a bawmh hna. (Cf. Jn 6:44, Rom 8:14).
Pathian thil tuahmi a dihlak in a donghnak bikah a tinhmi cu sermi minung hna hi Thumkawmh Pathian he pumkhat sinak chungah luhawk kha a si. (Cf. Jn. 17:21-23). Sihmanhsehlaw atu hmanh ah hin kannih cu Thumkawmh Pathian umnak caah auhmi kan si. “Mi pakhat nih keimah kha a ka dawt ahcun ka bia kha a ngaih lai i, ka Pa nih amah kha a dawt lai; Kannih nih a sinah kan ra lai i amah he kan um lai” (Jn 14:23).
Thumhkawmh Pathian cu Pathian pathum kan zum lo, person pathum ah pakhat a simi Pathian pakhat kan zumh. Pathian pakhat cannak an ngei. Pathian person hna hi pakhat le pakhat an ni dang. Pathian cu pakhat a si ko. Sihmanhsehlaw mah lawngin a ummi a si lo. Pa le Fapa le Thiang Thlarau cu pakhat le pakhat an ni dang, Pa cu Fapa a si lo Thiang Thalrau cu Pa le Fapa a si lo. An thawhkehnak ah dannak an ngei. A hringtu cu Pa a si. Fapa cu hrinmi a si i, Thiang Thalrau cu a chuakmi a si.
Pathian person hna cu pakhat le pakhat an ni tlaihkhih dih. Pathian pakhat sinak chungah person hna cu tlaihkhihnak an ngei dih. Pa cu Fapa he an ni tlai. Fapa cu Pa he an ni tlai i Thiang Thlarau cu an pahnih he an ni tlaihkhih. Annih tlaihkhihnak ah person pathum in auh an si nain cannak pakhat lawng kha kan zumh.