VAWLEI CUNG HUAP TAHNAK AA KHAHLONAK (CAANG KHATNAK)
Minung hna i zatlang nunphung pawngkam le kokek pawngkam hna cu hmunkhat tein an rawk. Kannih cu minung le zatlang nunphung innpi a rawhnak hrampi kha theih loin kokek pawngkam rawhralnak kha tlamtlingte le hmual ngei ngaiin tlangtlak in fianternak kan tuah kho lai lo.
Ngaite tiah cun kokek pawngkam a rawhnak le minung phu chung khonden fahnak hna cu hliamfawimi minung kha tamdeuh in a khonden hna. Nifate kan hmuhtonnak le teikpan thiamsang hna an kawl an hmuh ningin kokek pawngkam khonden rawhralnak in a chuakmi dan cu misifak hna nih an tuar deuh.
Tahchunhnak ah ngatlaihnak hmun a zornak cu rianṭuannak i thlen thiamlomi ngatlaitu innchungkhar hna kha tampi a hliam hna. Dinti a thurhnawmhnak cu tithiang a cawkho lomi chungkhar kha a hliam hna. Rili tihmai a kainak cu ṭhialnak hmun dang a ngeilomi rili tlang um sifakmi hna kha a khonden hna.
Minung i zatlang nunphung thil umtu ningcang aa tluk ruanlonak dan ruangah kumno tein a thimi sifakmi hna le Vawlei chungchuak thil a har ruangah a chuakmi sikvelh raldohnak ruangah a thimi hna, tadin media ah an langhter lomi a dang harnak piahtana hna ruang i a thimi misifak tampi an um.
A hmaan ning tein kan chim ahcun mah cungah ṭhathnem lonak a chuahtermi kokek pawngkam thurhnawhnak kong kha misifak hna le hnon a ingmi hna nih an theihnak a tlawmte rih tiah kan ti khawh. Sihmanhsehlaw annih cu milu nuai tampi an si vawlei cung milu ah tamuak an si. Hi a konglam he pehtlaih in vawlei cung ramkip ramkhel le sipuazi lei he pehtlaimi tonnak (meeting) ah tulio caan tawite ah ceihmai khuakhan ṭinak an tuahmi kan hmuh. Sihmanhsehlaw hi konglam ceihmainak cu a dang konglam an ceih hnuah a hnupeh in ceihmainak, hrial awk a ṭhatlo caah ṭuanvo tlinhnak menmen in an ceihkhan tiah mitampi nih an ruah.
Ceikhannak a dih in ṭuan awk hna kha an ṭuan an tuah dih tikah sifakmi hna nih an tonmi kokek pawngkam thurhnawmhnak piahtana kong ceihmainak cu atu le atu ti bantuk in file an ponnak a tangbik lawngah a tang tawn. Cuti a sinak cu sipuazi rianṭuan hna, ruahnak petu upa hna, media in thawngzamhtu hna, nawlngeitu hna cu misifak hna umnak sang le veng he an i hlat i, cu hna nih an tonmi harnak piahtana he naihniam tein tonnak an ngei lo i, tlamtlingmi khualipi hna lawngah an um caah a si.
Cu mi hna cu vawlei cung milu tam-uak nih an banh khawh lomi lungtlin tertu tlakrawh inn hna, a dotsang in a ṭhangchomi hmun hna ah a dot sang ngaiin an ṭhudir hna i, annih an umtu nngcang an umnak hmun in misifak hna kongkau kha a langin khua an ruat, an chim cio. Hi bantuk in sifakmi hna he minung in tonnak a um lo, ton biaruahnak zong an ngei lo, khuapi, khualipi hna ah zatlang nunphung hawikomhnak umtu ningcang a rawhnak hna cu thinglung thlarau muru intuarnak kha a chunh kho lo, a pin a hit i thil umtu ningcang kha soisel tuaktan tik zongah a rak chuakmi umtu ningcang le annih an chimmi a konglam hna aa thleidan caah lung thlitum saduhthah menmen a si. A caancaan ah hi bantuk thinlung put he hmunkhat ah umter in vawlei hi hring le hning in a um lai, i titer in a aukhuangmi hna zong kan hmuh hna. Atu ahcun kokek pawngkam thurhnawmhnak kha tlangtlak in fianternak cu zatlang nunphung he pehtlaimi piahtana fianternak pungsan a si te lai, tiah kannih nih kan theihfian a hau. Cuti rian ṭuannak ah kokek pawngkam thurhnawmhnak kong zong khuakhan biaruah ṭinak ah minung nih kan sunghmi ningcangnak kongkau zong betchih in ruah ṭi ding a si. Cuticun vawlei pumpi nih a tah aihramnak thawng le misifak hna i ṭah aihramnak thawng hna cu kan theih kho lai.