January 16 – Friday

Mark 2:1-12

A zengmipa kha damternak

Khrih ah dawtmi ulenau nulepa hna, Martin Luther nih “Pathian cungah aa hngatmi bantukin thlacam law, cu hnuah zeizong vialte nangmah cungah aa hngatmi bantukin ṭuan” tiah a ti.

Nihin thawngṭha relnak ah Jesuh nih thlacamnak kong a kan cawnpiak. Cawn awk pakhatnak cu, thlacam awk ah, tampi chim a hau lo. Martin Luther zong nih hi kong he pehtlaiin bia pakhat a chimmi cu biafang a tlawm deuhdeuh ahcun thlacamnak aṭha deuhdeuh tiah a ti. Mi zengpa i a hawile hna nih Jesuh sinah an ratpi. Cu cacang nih cun a ke a zengmi pa nih a hawile sinah Jesuh sinah ratpi ding ka duh tiah a hal hna timi le a hawile sinin Jesuh sinah kan ratpi lai tiah bia a chimmi zeihmanh a chim lo. Sihmanhsehlaw, pakhat le pakhat bia pakhat hmanh an i chawnh ballo hmanhah, Jesuh sinah kalpi i damnak hmuhter duhnak langhternak cu amah tein thlacamnak a si. Cucaah, thla kan cam tikah bia tampi chim a herh lo, kan herhmi cu Bawipa cungah zumhnak tampi ngeih hi a si. Kan thlacamnak leh a silo tiah kan ruah ahcun mah cu thlacamnak ah bia kan chimtuk tinak a si kho men.

Cawn awk pahnihnak cu, thla kan cam tikah Pathian nih bia a kan khiahpiak ko seh. Mi pali nih mi zengpa kha Jesuh sinah an ratpi hnuah an zam colh. Jesuh sinah : “Nawlngeihnak lak law, kannih cu rian kan lim cang.” an ti bantukin a si. Pathian hmai i kan um tikah amah nih bia a kan khiahpiak seh tiah thla kan cam awk a si. Thla kan cam tikah, Pathian kha biakhiahnak tuahnak caan kan pek tilo tiangin zeidah tuah ding a si timi lamhruainak kan pek awk a silo.

A pathumnak cawnpiaknak cu, a hawile i zumhnak thawngin a zengmipa cu a dam. A tlangpi in, Jesuh nih mizaw a damter tikah, a tlingmi damnak hrampi a simi cu mipa/nu i zumhnak hrimhrim kha a si. Nain khuaruah har ngai a simi cu nihin thawngṭha ahcun a zengmipa i zumhnak siloin a hawile hna nih a sualnak kha ngaihthiam a si i damnak a hmuh timi zumhnak tuhi a si. A hawile i zumhnak nih Jesuh a tawngh i a zawmi damter awkah a forh.

Hika ah kan ngeihmi cu a caan ah kan philh tawnmi midang i zumhnak phunkhat a si. Mi pakhat nih: “Ka zumhnak a der tikah, na zumhnak nih a ka dirpi a herh, na zumhnak a der tikah ka zumhnak nih keimah i dirpimi a herh,” tiah a ti. Tahchunhnak ah, Mithiang Monica nih a fapa Mithiang Augustine i a zumhnak a thlennak ah a bawmtu a si lomaw? Mithiang Therese of Lisiux i zumhnak, amah cu Sister convent ah a ummi Sister a si nain missionary vialte caah zohkhenh bawmtu mithiang a si.

Kan zumhnak nih midang cungah zeibantuk hmual a ngeih lai ti kha kan hngal ballo. Asinain hi thawngṭha tuanbia chungin kan cawnmi cu a zumhnak a der khomi pumpak pakhat i nunnak kha midang i zumhnak hmangin Jesuh nih a tawngh tikha kan hngalh.

Kan dihlak in kan hawikom hna i zumhnak thawngin cu bantuk vel cu kan hmuh tawn, cu hawikom hna cu kan nu le kan pa, kan saya, kan riantuan hawi asiloah kan hawikom an si kho. Asinain zeitluk indah midang caah hawikom pali lakah pakhat kan si tawn? Lunghrinhnak le lungretheihnak an ton tikah zeitluk indah kan zumhnak cu an caah velngeihnak, thazaang le ruahnak petu a sitawn?

Dawtmi ulenau hna, nihin ah Bawipa nih; kanmah ihkhun cawi loin zumhnak he midang ihkhun cawi law; keimah hmaiah kalpi tuah tiah a kan ti men lai? Midang thlen kan duh hna nain a thlen khotu zumhnak kan ngei maw? tiah ruatṭhan hna usih!

YouTube Link 👇👇👇