14 January

Mk 1:29-39

Simon Nupi i nu Damnak

Sirach cauk nih hitin a ti: “Ka fapa, na zawt tikah rau hlah, Pathian sinah thlacam law an damter lai,” (38:9) tiah a ti.

Nihin thawngṭha ah Jesuh nih Peter a nupi i nu a damternak kong kan theih. Mah nih hin Jesuh zultu hna nih an tonmi harnak, fahnak le zawtnak paohpaoh tawnghtham khawhnak ding caah zeibantuk an harnak paoh kha zalong tein a sinah an put ti kha a langhter. Cucaah Simon Peter nih Jesuh cu a inn ah a ratpi i a nupi i nu cu Jesuh nih a dam colh, zeicahtiah Jesuh nih a thlacamnak a theih cah a si.

Kumzabu 3nak Khrihfabu i pacan pakhat a simi Mithiang Jerome nih Jesuh cu hika ahhin kan sinah amah le amah aa pekchanh cang tiah a ti; Kan lakah a dir ko nain kan hngal lo (Jn. 1:26). A kut kan tlaih khawh lo ahcun a ke hram ah kun hna u sih. A lu kan phak khawh lo ahcun kan mitthli in a ke kha ṭawl hna usih (Lk. 7:38). Kan sualnak nih rimchia a chuahter nain kan i ngaihchih ahcun Amah nih rimhmui ah a kan thlen lai. Cucaah, kan kut tlaih dingin Bawipa sinah hal hna usih law, amah nih ‘A taklinh nih Peter nupi i nu cu a kaltak’ a ti. Jesuh nih a kut a tlaih colh tikah, a zawtnak cu a zam.

Kan zumhnak ah aa dawh bikmi biatak pakhat cu Zungzal a hmunmi le Pathian fapa nih sualnak dah tilo cu zeizong vialte ah kanmah bantukin minung ah a cang tihi a si. Jesuh cu vancungmi khamh awkah siloin minung khamh awkah a ra caah a si. Amah cu aa dawh tukmi le siangpahrang innchungkhar ah a langlo i a chuak fawn lo. Vatican II nih hitin a ti: “Amah minung sinak thawngin, Pathian Fapa nih minung vialte he lam pakhatkhat in aa fonh. Minung kut in rian a ṭuan, minung lungthin in a ruah, minung pakhat i thimnak in a cawlcang i minung thinlung in dawtnak a ngei,” (Gaudium et Spes no. 22).

Piter nupi i nu a damternak a ruang pakhat cu amah hringtu a nu Mary cung i a lungput kha a lungthin chungah a hngalh caah a si kho. Amah cu kanmah bantuk minung a si caah Simon Peter nupi nu nih a intuarmi kha a intuar ve.

Mi tamdeuh cu kan lungdongh le harnak kan ton tikah a kan theithiam khotu kan kawl tawn; kan intuarnak a hngalhthiam khomi pakhatkhat; kanmah bantuk hmuhtonnak a tongmi pakhatkhat he kanmah hmuhtonnak i hrawm cu kanmah bantuk hmuhtonnak a ngei lomi pakhatkhat he bia i ruah nakin a hnemh deuh. Cucaah Jesuh cu kan intuarmi zong tuar ve awk, kan tonmi ton ve awk, Amah he bia i ruah awk le kanmah le kan intuarnak le fahnak hrawm awk ah a chuak.

Asinain vanchiat ah mi cheu cu Jesuh sinah thlacamnak in kan ra tawnmi cu Amah an dawt caah A sinah an rat nakin Amah sinin thil pakhatkhat kan duh caah a sitawn. Kanmah pumpak herhbaumi ṭhanchoternak ah Jesuh hman kan duh. Tlangbawi pakhat nih Pathian cu a dang mawṭaw spare ke bantukin kan hmuh hram kan thawk tikah Amah he kan i pehtlaihnak cu ngaihchiatnak ah a canter tiah a ti. Mawṭaw nih lam cungah a tlik i a ke a per (kuai) hlan tiang spare tyre cu theih lonak ah a um tawn ti kha kan dihlak in kan hngalh. Cu ve bantukin mi cheukhat cu nunnak a nuam i, a nuamh tikah Pathian kha an philh ko nain nunnak ah thlichia le buaibainak a um tikah Pathian sinah philh lo dingin an nawl tawn. Micheu cu nikhat chung Pathian philh an hmang nain zaan ah Pathian sinah ra ka philh hlah tiah an nawl tawn. Cuti a si ahcun, cu bantuk mi hna caah biaknak cu harnak hmun i thil sawhsawh a si. Pathian cu vanchiatnak ni ah hman ding a si lo. Amah cu kan nunnak ah nifatin dawt le philh lo ding a si. Caanṭha ah siseh, caanchiat ah siseh Pathian cu dawt ding le rianh (အစေခံ) ding a si.

Dawtmi careltu nulepa ulenau hna, Jesuh nih a kan tuahpiakmi ruangah, midang ca rian kan ṭuannak thawngin thluachuah kan hmuhmi cungah Pathian cungah kan i lawmhnak kan langhter maw? ti kha ruatcio hna u sih!