13 January – Tuesday
Mk 1:21-28
Khuachia tlaihmi Damternak
Dawtmi careltu nulepa ulenau hna, theih lomi pakhat nih nawlngeitu hna he pehtlaiin phunglam pahnih kong a chim: Phunglam #1: Boss cu ahmaan zungzal. Phung #2: Boss nih a palh tikah, phunglam #1 kha zoh a ti.
Jesuh nih nihin thawngṭha kan relmi ah, an pumhnak inn ah mipi a cawnpiak hna i an khuaruah a har ti kan theih. A ruang pahnih ruangah an khuaruah a har: Pakhatnak ah, a phungchimnak nih an khuaruah a harter hna. Mithiang Mark nih Jesuh nih “nawlngeihnak he” bia a chim tiah voihnih a ti. “Cun phungbia cawnpiaktu saya hna bantuk siloin,” tiah a chimchap. Zeicatiah Jesuh nih Pathian bia a chim tikah ahohmanh nih an chim bal lomi bantukin a chim caah a si. Nawlngeihnak he bia a chim. Rabbi pawl nih an cawnpiak hna tikah, nawlngeitu dang hna nih an chimmi bia in an chimmi kha an dirpi. Profet hna nih nawlngeihnak pekmi he bia an chim: “Bawipa nih hitihin a ti.” Jesuh nih bia a chim tikah, nawlngeitu a herh lo asiloah a chimmi bia dirkamh awk le a chimmi paoh zumhawktlak siter awkah thiamsang hna i chimmi bia a lak hna lo. Amah cu minung ah aa cangmi nawlngeitu a si, Pathian Bia cu minung ah a cang. A chim tikah Pathian nih a chim. A fial tikah khuachia hmanh nih an zulh.
Jesuh nih nawlngeihnak he a cawnpiak hna, zeicahtiah Amah cu Biatak, A Ṭha le Pathian a si. Amah cu zungzal nunnak bia a ngeitu a si. Zungzal in Pa pawngah a um cang. Vancung Pennak lam a kan cawnpiak awk ah a ra. Kan chimhmi hna nih mipi an khuaruah a harter hna lo, kan ramkhel rianṭuantu cheukhat bantukin ṭihnak he kan chim caah maw asiloah mithmai ṭha kan kawl caah dah a si hnga? hi bia theih cu ngaihchia awk a si. Jesuh Khrih cu Lam, Biatak le Nunnak a si timi bia sawhsawh kha zumhnak thinlung he kan ngaih sawhsawh kho hnga lo maw?
Cawnpiaktu Beth Nelson nih “kan lungthin rian” tuahnak in hmuhmi lungtlinnak kha a kan hngalhter ṭhan. A chimmi cheukhat kan in hrawmh hna lai:
- Ngakchia hna kha an nifatin nunnak caah aṭha deuhmi lam, aa dawh deuhmi lam a um ti kha damter hngalhnak ka pek hna lai. Sibawi ka si lo, asinain damnak cu ka rian ah aa telmi a si.
- Ngakchia cheukhat kha zungzal nunnak ruahchannak, hi nunnak ah daihnak, a ra laimi thil ah zumhnak ka pek hna lai. Tlangbawi phu chungtel ka si lo nain zumhnak cu ka rianṭuannak ah aa telmi a si.
- Ngakchia hna kha dinfelnak lungput ka pek hna lai; ahmaan le apalh hngalh khawhnak; biatak dawtnak le ṭhatlonak huatnak hna an si. Upadi lei ruahnak petu ka silo, asinain dinfelnak cu ka rian ah aa telmi a si.
- Cheukhat caah cun, cawnpiaknak cu rian pakhat a si kho men; midang caah cun, a ngan deuhmi tinhmi phanhnak lam pakhat a si kho men. Mi pakhat nih tlakrawh pakhat ka chiah sawhsawh tiah a ruah men lai; a dang pakhat nih sizung saknak caah ka bawmh ti kha a hngalhthiam. Kanmah lakah aho hmanh nih kan rianṭuannak ah a sang deuhmi tinhmi kan hmu kho lo?
Pahnihnak ah, a damternak ruangah mipi nih an khuaruah a harter. Zawtnak a ngeimi hna kha a zaangfah hna caah a damter hna. A dawt hna caah a damter hna. Jesuh nih a kan dawtnak a ngol bal lo. Amah nih a kan dawt ko nain amah dawt ve dingin a kan forh lai lo. Misual cu a dawt ko nain sualnak cu a huat. Sabbath ni chungah thlarau thurhnawm a ngeimi pa kha a damter caah Farasi le Phungbia cawnpiaktu saya hna nih an mawhchiat ngam.
Dawtmi careltu nulepa ulenau hna, Jesuh nih miṭhalo pa (satan) kha nawl a pek i a ngai. Miṭhalo (khuachia) nih cun Khrih ṭhawnnak kha a ṭih. Miṭhalo cu Khrih i bia sawhsawh nih a daihter. Cucaah sualnak le ṭhatlonak nih kan hrawh khawh lo tiangin a kan uk tiah kan lungre a thei i kan thin a phang tawn. Bawipa nih a kan ruahchanmi ningin kan nung kho lai lo tiah kan lungre a thei. Sihmanhsehlaw, a bia nih miṭhalo kha a zamter colh. Amah cungah kan i bochannak dihlak kan chiah ahcun kan nunnak ah cuticun a tuah khawh ve.