Iran le Syria ah a cangmi thil kongah lungsau tein biaruahnak ngeih dingah Pope nih nawlnak a tuah

January 11, Zarhpi ni i Angelus Thlacam a dih ah, Iran ram le Syria ram hna ah a chuakmi buainak kong ah lungsau tein daihnak caah i ceihmainak le biaruahnak ngeih ding in Pope nih nawlnak a tuah. Iran ram ah sandahpiahnak a pehzulh in a um rih mi le Syria ram, Aleppo khualipi ah acozah ralkap le hriamtlai Kurdish ralkap kar ah a chuakmi kahdohnak hna cungah lungsau tein daihnak biaruahnak le i ton biaruahnak um seh tiah thla ka cam tiah a langhter. Cun, naite ah Russia nih Ukraine mipi a kahmi hna cungah Pope nih mawhchiatnak le sualphawtnak a langhter. Abik in Middle East ram pahnih asi mi Iran le Syria ra hna i a chuakmi buainak hna nih mi tampi a thihter hna” tiah a ti. Kan hnulei December thla dongh lei in, Iran cu cozah dohnak lamzawhnak a thar in an tuahṭhan caah, cu lamzawhnak cu ramchung hmun tampi ah a karh i acozah ralkap nih an hrem hna, an thah len cang hna.

Syria ram, chaklei Aleppo khualipi ah ralkap le Kurdish hriamtlai ralkap karlak ah kahdohnak a chuak. Hi ram pahnih ah daihnak lam kawl awk le biaruahnak, i ceihmainak ngeih i mipi caah ṭhatnak a chuahnak hnga ruahchannak he thla ka cam tiah a chim chap. Russia nih Ukraine ah bomb an thlak ruangah harnak a tongmi Ukraine mipi hna an harsatnak kong zong a chim chih. Hi tukdohnak cu a zualcei ngaimi asi i a bik in raltuknak caah hmanmi thilri pawl kha hrawh awk ah ai tinh lio ah khuasik a zual chin lengmang caah mipi nih faktuk in an tuarnak cungah a ngaihchiatnak kong a chim.“Harnak a tongmi hna caah thla ka cam i, thahnawnnak donghter ding le daihnak hmuh khawhnak ding caah fakpi in i zuam ding ah a thar in nawlnak le sawmnak ka tuah tiah Pope nih a chim chap.