12 January-Monday

Mk 1:14-20

Zultu hmasa hna auhnak

Dawtmi careltu nulepa ulenau hna, a ngaingai ti ahcun, Jesuh zultu hna cu Amah nih a auh hna tikah seminary luh bantukin luhnak camipuai tuah, hneksaknak tuah, amah Jesuh sinin ruahnak cheuhnak hmuh hmasa, hlankan in lungtlinnak tuah le biahalnak ah i tel tibantuk thil sining cu an tong lo. Nihin thawngṭha ah, Andru le Simon cu tidil ah an sur an thlak sawhsawh lio ah Jeim le Johan nih an sur kha ningcang tein an chiah lio ah Jesuh nih ‘Ra u, ka zul u, mi tlaitu ah kan ser hna lai’ tiah a auh hna. Hmanhsehlaw, lawngchung i a ummi thil vialte kha an kaltak i Jesuh kha an zulh. Cu caante ah, lungtho tein le timhcia tein! Jesuh he an seminary dirhmun cu kumthum asiloah cunakin tlawm deuh lawng an ngei.

Zultu hmasa hna i kawh auhnak kong he pehtlaiin hi thawngṭha cacang nih hin Khrihfa kan sinak ah kanmah pumpak i kawh auhnak kong ruah awk thil pathum a kan pek: Pakhatnak ah, Jesuh nih kan chan ah kan tuah tawnmi thil ah a kan auh. Jesuh nih Simon le a nau Andru cu an sur an thlak kha a hmuh hna; nga tlaitu an si.’ Annih nih rian an ṭuan i nifatin an tuah tawnmi thil kha an tlamtlinh i, Khrih cu khuaruahhar in an nunnak ah a lut i a Lamkaltu si dingin a auh hna. Amah sinah an lung a kau i Amah an i bochan caah ‘Yes- Asi’ tiah an leh. Khrih i auhnak kha fiang deuh in kan theih i thlacamnak in nifatin kan cawlcanghnak ah Amah lunglawmhter ding kan i zuam.

Pahnihnak ah, Jesuh i auhnak cu a rannak in a si. Amah nih a chimmi cu: “Atu hi a tlinnak caan a si. Pathian pennak cu a nai cang. Nan sualnak kha i ngaichih u law thawngṭha kha zum u,” tiah a ti. Jesuh bia nih a herhnak le Amah hnu zulh duhnak lungput a langhter. Simon le Andrew nih atu lio caan a biapitnak kha an hngalh i cucaah thil sining kha a dikthliar in ruahṭhan awk le an thim khawhmi thil hna kha ruahṭhan awk caan an ngei lo. Khrih nih a zultu hna kha atu ah a herh hna.

Khrih nih a rannak in a kan auhmi kan theih tawn. A auhnak cu a zungzal in a halmi le dawtnak a ngeimi a lo. Amah le a dawtnak a simi thawngtha kha pumpak in hmuhton ter a kan duh. Fr. Marcial Maciel (LC June 18, 1985) nih a chimmi cu: “Ka dawtmi mino hna, i hlen hlah u. Khrih hnu zulh cu ahar, ahar i a man a fak. Asinain hi nunnak ah lawmhnak hmuh khawhnak lamdang a umlo.” Phundang in chim ahcun thawn hlah, tlai hlah tihi a si.

Pathumnak ah, Jesuh hnu zulh timi cu kan nunnak ah a cheukhat thlennak a si tawn. Amah nih a bia tlamtling tein kan zumh khawhnak hnga le kan nun khawh nakhnga kan ziaza hlun, kan ruahning le kan nunning hna kha i ngaihchih dingin a kan auh. Pathian bia nih a kan halmi ningin a nung taktakmi kan si ahcun, kanmah le kanmah kha hlanlio ah kaltak in atu lio Khrih chung i kanmah le kanmah thar ningin nun kha a zungzal in thlennak lam ah kan um a hau.

Thlarau tampi nih Khrih khamhnak an hngak. Nga tlaitu lawng a herh hna i anih nih cun a chuak lai i a lak hna lai. Kan kut ah a chiahmi rian nih hin nga tam bik tlaih khawhnak a chuahpi lai. Kan mission hi daw hna u sih.