PATHIAN CU BIATAK LE DAWTNAK A SI
Pathian nih Israel sinah, “Dawt awktlak le zumh awktlak he a tlingmi” tiin aa phuang. (Ez 34:6). Mah nih hin Pathian min a rumnak kha kaa hnih in a chim. Pathian nih thil vialte a tuah tikah, a zaangfahnak, a ṭhatnak, a velngeihnak le dawtnak lawng kha a hmuhsak lo. Bochan awktlak a sinak, a hmunhnak, a felnak (zumhtlak a sinak) le biatak a sinak zong kha a hmuhsak. “Na dawtnak le zumhtlak na sinak caah na min cungah lawmhnak kan pek” (Ps 138:2 cf. Ps 85:11). Amah cu biatak a si. Zeicatiah, Pathian cu ceunak a si i amah chungah muihnak a um lo. Pathian cu dawtnak a si,” tiah Lamkaltu Johan nih a cawnpiak. (1Jn 1:5-4:8).
Pathian cu Biatak a si
“Na bia a muru cu biatak a si; a dingmi na phunglam kip hi zungzal a hmun” (Ps 119:160). “Maw, Bawipa Pathian, Nangmah cu Pathian na si, na bia cu a ding” (2Sam 7:28). Cucaah Pathian biakamnak cu a hmun zungzal. (Deut 7:9). Pathian cu biatak hrimhrim a si a bia nih mi a hlang kho bal lo: Cucaa minung nih zeizong vialte ah Pathian biatak le zumhtlak a sinak ah an pum kha an pek khawh. Sualnak hram a thawhnak le minung sualnak chung an tlaknak cu tukforhtu pa lihbia ruangah a si i amah nih Pathian bia le dawtnak le zumhtlak a sinak cungah lungawtawmnak kha a ngeih ter.
Pathian a biatak cu fimnak a si i sermi thil vialte kha ningcang tein a umter i vawlei kha a uk. (Cf. Fimnak 3:1-7). Van le Vawlei kha a sertu Pathian lawnglawng nih amah he i pehtlaih in sermi thil vialte hngalhnak kha a pek khawh. (Cf. Ps 115:15, Fim 7:17-21).
Pathian cu a dingmi Pathian a si caah a sin in a rami cawnpiaknak vialte zong hi, “A hmaanmi cawnpiaknak” a si dih (Mal 2:6). Pathian nih a Fapa kha vawlei ah a rak thlah cu “Biatak kha tehte khan awkah” a si. (Jn 18:37). Kannih nih Pathian fapa cu a ra cang i a hmanmi Pathian k ha hngalh awkah theihthiamnak kha a pek cang ti kha kan hngalh. (1Jn 5:20, Cf. Jn 17:3).
Pathian cu Dawtnak a si
Israel miphun hna nih an tuanbia chungah zeicadah Pathian nih annih kha a thim hna? timi kha a konglam pakhat lawnglawng an hmuh khawh. Cucu “a dawtnak” ruangah a si. (Cf. Deut 4:37, 8, 10, 15). Profet hna thawngin Israel mi hna nih Pathian nih annih kha zumhtlak loin an umnak le an sualnak in a khamh hna i a ngaihthiam zungzal hna cu, “a dawtnak” in a si ti kha an theihthiam. (Is 43:1-7, Hos 2).
Pathian nih Israel a dawtnak hi pa nih fa a dawtnak he tahchunh a rak si. A miphun a dawtnak hi nu nih a fale a dawtnak hna nakin a ngan deuh, a thawng deuh. Pathian nih a miphun a dawtnak hi tlangval pa nih a nungak a dawtnak nakin a ngan deuh. A dawtnak hi zumhtlak lo bik hmanh kha a dawt khawh hna i a sungbik laksawng pek tiang kha a si.
Pathian nih hi vawlei kha a dawt tuk hringhran caah a Fapa ngeihchunh kha a pek” (Jn 3:16, cf. Hos. 11:1, Is. 49:14-15, 62:4-5, Ez 16, Hos 2)
Pathian a dawtnak cu zungzal in a hmun. (Is 54). Zeicah tiah tlang hna cu an cim lai i fing hna cu an lo lai, sihmanhsehlaw ka dawtnak cu nan sinin aa ṭhen bal lai lo. (Is 42:10, cf. 54:8). Jeremiah hmang in Pathian nih a mi kha a chim hna: “A zungzal a hmunmi dawtnak in kan dawt cang, cucaah na cungah zumhtlak ka si zungzal. (Jer 31:3).
Sihmanhsehlaw, “Pathian cu dawtnak a si” ti kha Johan nih fak deuh in a rak chim. (1Jn 4:8, 16). Pathian sinak hrimhrim hi dawtnak cu a si. A caan a tlin tikah a Fapa ngeihchunh le dawtnak Thlarau kha a rak thlah i a lungthlitum bik bia kha a phuan. (Cf. 1Cor. 2:7-16, Eph 3:9-12). Pathian hrimhrim hi Pa le Fapa le Thiang Thlarau ti in zungzal a hmunmi dawtnak in thlen a si i mah dawtnak i thlennak kha i hrawm ve hna sieh, ti a kan duh.