TADIN MEDIA HNA ṬHATHNEMNAK LE A CHIATNAK
Cu hleiah tuchan ah hin mizapi pehtlaihnak ningcang tadin media hna i ruahnak nih a khuhchilhmi chan ah computer, internet, kuttlaih phone hna kha hmunzakip ah kan hmuh. Tadin media hna khuhchilh ruahnak ruangah biapi ngaiin pumpak ruahnak, khuaruah tuaktan in hmuhchungnak he khuasak duhnak, siang ngai le daw tein umnak hna an tlau cang.
Hi thil umtu ningcang ah a tuchan, awthangmi hnachet thawng hna le hnakhaw i tlumlo tiangin a tamtuk paluami tadin media hna i ruahnak hna ruangah hlan upami mifim hna i chimhhrin cawnpiaknak hna kha ṭha tein ngaih khawh tiloin kan theih kho ti hna lo.
Tadin media hna hi zawnruahnak nunphung rothil hna a ṭhihtu thil hna tiin hmuh loin a ṭhami nunphung tuahtawn ningkeel hna ṭhanchonak caah bawmhchantu thilri hna a sinak hnga caah zuam in riantuan awk a rak herh cang.
A dik a hmaanmi fimnak cu mah pumpak kha cakhat tuahnak, minung le minung karlak lungthing ngai in ceihmai khuakhan ṭinak hna in hmuh khawh a si i, media sin in hmuhmi a konglam tampi aa ponnak in hmuh khawh a si lai lo. Hi a konglam hna, ruahnak hna cu a caan caan ah phawrh khawh lomi phur rit ah an cang i thinlung a tuaitamter i thinlung ah a chuakmi pawngkam thurhnawmhnak phunkhat a si tiah kan ti khawh.
Minung le minung i komhnak ah zuamcawhnak hna an um lai nain a dik a ṭhami hoikomhnak a hmuhter. Asinain tuchan ah minung khat le khat i komhnak kha mah leikap nih lungduhmi thim duh ahcun i thim in thim duhlo hlonh duh ahcun hlonh khawhnak thazaang a pemi internet hawikomhnak in an ai rawlh cang.
Cuticun minung hna cu pakhat le pakhat hawikomhnak le kokek Vawlei he i tonnak umloin seh awngnak hna, TV le kuttlaih phone hna in thlalang hmai hna he rian tuaitamnak kha hrambunhmi hlankan khuaruat cohlannak thar hna kha a chuahter.
Tuchan ah cun pehtlaihnak thilri hna cu minung khat le khat pehtlaihnak, mah i thei hngalh fimnak, theih hngalhnak (Knowledge) hna, remhter duhmi thawngpang hna ruah ṭinak le dawt tlaihchannak ser dingah tampi in a bawmhchanhnak hna zong kan hmuh.
Sihmanhsehlaw a caancaan ahcun media hna cu mi nih a takin an intuarmi harsatnak hna, thinphan thlalaunak hna, midang hna i an lunglawmhnak hna, annih a phunphun pumpak he pehtlaimi hmuhtonnak hna zong langhter oin an thuhphenhmi hna kan hmuh.
Hi a konglam hna ruangah kannih kan i ralrin awk a simi cu tadin media hna cu minung thinlung a thawhter khawh bantu in media hna ruangah minung khat le khat hawikomhnak ah lung i hmuh lonak, mah lawng ummi nunnak a si tiah intuarnak hna zong kha kan hmuh.